قازاقستاننىڭ پالەستيناعا قاتىستى ۇستانىمى وزگەرىسسىز قالادى - قايرات ءابدىراحمانوۆ

استانا. قازاقپارات - قازاقستان دوستاس پالەستينانىڭ بارلىق بەيبىت ۇمتىلىستارىنا جاردەمدەسەتىن بولادى. بۇل تۋرالى استانادا پالەستينا سىرتقى ىستەر ءمينيسترى رياد ءال-مالكيمەن كەزدەسۋدەن كەيىن ق ر سىرتقى ىستەر ءمينيسترى قايرات ءابدىراحمانوۆ ءمالىم ەتتى، دەپ حابارلايدى قازاقپارات.

«قازاقستان پالەستينامەن ەكىجاقتى ىنتىماقتاستىقتى دامىتۋعا اسا ۇلكەن ءمان بەرەدى. اتالعان ىنتىماقتاستىقتىڭ نەگىزىن قازاقستان ءوز تاۋەلسىزدىگىن جاريالاعان كەزدە 1991-جىلى پالەستينانى ازات ەتۋ ۇيىمىنىڭ، پالەستينا ۇلتتىق اكىمشىلىگىنىڭ كوشباسشىسى مارقۇم يا. ارافاتتىڭ قازاقستانعا، سونداي-اق ەلباسىمىز ن. نازاربايەۆتىڭ 1995-جىلى پالەستيناعا بارعان ساپارلارىندا قالادى. بيىل ەكى ەل اراسىندا ديپلوماتيالىق قارىم-قاتىناستاردىڭ ورناتىلعانىنا 26 جىل تولدى. وسى ۋاقىت ىشىندە ەلدەرىمىز اراسىنداعى ەكىجاقتى قارىم-قاتىناستارمەن بىرگە، ب ۇ ۇ، ي ى ۇ جانە باسقا دا حالىقارالىق ۇيىمدار اياسىندا كوپجاقتى ىنتىماقتاستىعىمىز دامي ءتۇستى»، - دەپ توقتالدى ق. ءابدىراحمانوۆ.

سونىمەن قاتار مينيستر پالەستينا حالىقارالىق ۇيىمدار شەڭبەرىندە قازاقستاننىڭ نەگىزگى حالىقارالىق باستامالارىن تۇراقتى تۇردە قولداپ كەلە جاتقانىن اتاپ ءوتتى.

«قازاقستان رەسپۋبليكاسى پالەستينا پروبلەماسىنىڭ رەتتەلۋى تاياۋ شىعىس وڭىرىندە ۇزاق مەرزىمدى بەيبىتشىلىك پەن تۇراقتىلىقتى ورناتۋدىڭ نەگىزگى شارتى بولىپ تابىلاتىنىنا سەنىم ارتا وتىرىپ، پالەستينانى تاۋەلسىز مەملەكەت رەتىندە مويىنداپ، حالىقارالىق قاۋىمداسىقتىڭ تولىققاندى مۇشەسى بولۋىن دايەكتى تۇردە جاقتايدى. قازاقستاننىڭ اتالعان ماسەلەگە وراي ۇستانىمى وزگەرىسسىز قالادى. پالەستيندىك-يزرايلدىك جانجالدىڭ شەشىمى 1967-جىلعى شەكارالاردا استاناسى شىعىس يەرۋساليم بولىپ تابىلاتىن پالەستينا مەملەكەتىنىڭ قۇرىلۋىن كوزدەيتىن «ەكى حالىققا ەكى مەملەكەت» قاعيداسى بويىنشا ىسكە اسۋى ءتيىس. ءتۇرلى قيىندىقتارعا قاراماستان، كەلىسسوزدەر پروتسەسى ءارى قاراي جالعاسۋى كەرەك»، - دەپ ناقتىلادى ق ر س ءى م باسشىسى.

ونىڭ سوزىنە قاراعاندا، قازاقستان ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە تاياۋ شىعىستا بەيبىتشىلىكتى ورناتۋدىڭ اجىراماس شارتى بولىپ تابىلاتىن وڭىردەگى تۇراقتىلىقتى قالپىنا كەلتىرۋ پروتسەسىنە تولىق قولداۋىن كورسەتۋدى جالعاستىرادى. سونداي-اق دوستاس پالەستينانىڭ بارلىق بەيبىت ۇمتىلىستارىن ءاردايىم قولداپ، بارىنشا جاردەمدەسەتىن بولادى.

بۇدان بۇرىن حابارلانعانداي، پالەستينا مەملەكەتىنىڭ سىرتقى ىستەر جانە ەكسپاتريانتتار ءمينيسترى رياد ءال-مالكينىڭ قازاقستان رەسپۋبليكاسىنا ساپارى اياسىندا ەكى قۇجاتقا قول قويىلدى.