قىزىلوردالىق شەبەر قازاق كىلەمىن دارىپتەپ ءجۇر

قىزىلوردا. قازاقپارات - قىزىلوردالىق قولونەر شەبەرى زۋحرا تاسبولاتوۆا قازاق كىلەمىن توقۋدىڭ قىر- سىرىن جەتىك بىلەدى.

ۇلتىمىزدىڭ ۇرپاقتان ۇرپاققا جالعاسقان ۇلىق ونەرىن ەل اراسىندا كەڭىنەن دارىپتەپ كەلەدى، دەپ حابارلايدى قازاقپارات ءتىلشىسى.

جاڭاقورعان اۋدانى تومەنارىق اۋىلىندا دۇنيەگە كەلگەن ول بالا كەزىنەن اناسىنان اتالمىش ونەردى ۇيرەنىپ ءوستى. كەيىننەن ءوزى دە ورنەكتى ونەردى جەكە جۇرگىزدى. كوزدىڭ جاۋىن الاتىن قانشاما بۇيىمداردى جاساپ شىقتى. قاي كەزدە دە اناسى ءوز اقىلىن ايتىپ، بىلمەگەن تۇستارىن ۇيرەتىپ جۇرەتىن.

زۋحرا مەكتەپ بىتىرگەننەن كەيىن قازاقتىڭ قازىنالى قولونەرىنە شىنداپ دەن قويىپ، بۇل باعىتتا ءوز ىزدەنىسىن جاسادى. قازىر ءاربىر دۇنيەسى كوپشىلىك تاراپىنان زور باعاسىن الىپ ءجۇر. ول بالا كەزىنەن تىقىر(تاقىر) كىلەمدەر مەن الاشالار توقۋدى ادەتكە اينالدىردى. بۇگىنگى تاڭدا سول ۇيرەنگەنىن ءوزىنىڭ ومىرىندە پايداسىنا جاراتىپ كەلەدى.

«بۇل قاسيەت ماعان انامنان دارىعان. انام كىلەم توقۋدىڭ بارلىق قىر-سىرىن جاقسى بىلەتىن ەدى. مەكتەپ بىتىرگەننەن كەيىن بۇل كاسىپتى جەتىلدىرە باستادىم. كورمەلەرگە قاتىستىم. ەلدىڭ كوزىنە ءتۇستىم. بۇرىن كىلەم توقۋ قازاق ءۇشىن وزىندىك سالت بولعانىن ءبارىمىز بىلەمىز. كىلەم توقىلىپ جاتقان ۇيدە كىشىگىرىم توي بولىپ جاتاتىن ەدى. قوي سويىلىپ، بارلىق تاتتىلەر ۇيىلەتىن. ونى ءبىز دە بەرىدە كورىپ وستىك»، - دەيدى ول.

قولونەر شەبەرى قازىر قازاق ءۇيىنىڭ شاڭىراعىندا قولدان توقىلعان كىلەمدەر ىلىنە بەرمەيتىنىن ايتادى. كىلەمنىڭ قاسيەتىن باعالاي الماي جۇرگەن سەكىلدىمىز. بۇل دۇنيە تۇتىنۋعا ءتوزىمدى بولىپ كەلەدى. وڭايلىقپەن توزا قويمايدى. جىرتىلا بەرمەيتىنى تاعى بار. وعان قوسا شاڭ- توزاڭنان تەز تازارتىلىپ جاتادى. ىلعالدىلىق پەن قۇرعاققا دا ءتوزىمدى بولىپ كەلەدى. كۇيە تۇسە بەرمەيتىن قاسيەتىن دە جادىمىزدان شىعارماۋىمىز ءتيىس. ەرتەدە كىلەم ىلىنگەن ءۇي بارشىلىقتىڭ بەلگىسى رەتىندە باعالانعان. دەگەنمەن قازىر ونى كوپ ادامدار پايدالانۋعا نازار اۋدارماي كەلەدى.

قولونەر شەبەرى كىلەمدەردىڭ تۇرلەرىنە توقتالىپ ءوتتى. ماسەلەن، ەل اراسىندا تۇكتى دەپ اتالاتىن ءتۇرى بىرنەشە قاباتتان تۇرادى. ال تاقىر كىلەم دەگەنى ءبىر ءورىس جىبىنەن ءبىر قاباتتى ەكى جاقتى تىعىز ەتىپ توقىلادى. سونداي-اق، حالقىمىزدا كىلەمنىڭ ارالاس دەگەن ءتۇرى دە كەزدەسەدى. مۇنداي كىلەمنىڭ تۇگى كەيدە قىرقىلا قويمايدى، اراسىندا قىرقىلىپ تۇرۋى دا مۇمكىن. ال تەرى كەستەلى ورنەك كىلەم توقىما ەمەس. ول كىسىنىڭ ايتۋىنشا، ءبىر كىلەمدى توقۋ ءۇشىن ءبىر ايداي ۋاقىت كەتەتىن كورىنەدى.

قولونەر شەبەرى جاس ۇرپاققا كونە كەزەڭىنەن كەلە جاتقان ميراس ونەردى دارىپتەۋدە. ول قازىر تومەنارىق اۋىلىنداعى №53-ورتا مەكتەپ جانىنان اشىلعان قولونەر ۇيىرمەسىنە جەتەكشىلىك ەتەدى