كاليفورنيا «وتتى داۋىل» قۇرساۋىندا قالدى
ءورت ءسوندىرۋ قىزمەتى وكىلىنىڭ ايتۋىنشا، شاستا وكرۋگىندە بۇل كۇشتى جەل «وتتى داۋىلعا» اينالعان. اعاشتار تامىرىمەن قوپارىلدى، اۆتوموبيلدەر اۋدارىلىپ جاتىر. سونداي- اق 500 عيمارات وتقا ورانعان، بۇعان قوسا تاعى مىڭداعان قۇرىلىس نىساندارىنا قاۋىپ ءتونىپ تۇر. ءورت سوندىرۋشىلەرگە تەك 5 پايىزىن عانا ءسوندىرۋ مۇمكىن بولعان. ورمان ءورتى دۇيسەنبى كۇنى بۇزىلعان اۆتوموبيلدىڭ كەسىرىنەن باستالعان.
جالىن 194 شارشى شاقىرىمدى شارپىدى. ونىڭ كولەمى سان- فرانسيسكو اۋماعىنان دا ۇلكەن بولىپ وتىر. ءتىلسىز جاۋدى اۋىزدىقتاۋعا 3400 ءورت ءسوندىرۋشى جۇمىلدىرىلدى. ءبىراق الداعى اپتا بويى سوزىلاتىن قۇرعاق ءارى ىستىق اۋا رايى جاعدايدى ودان ءارى ۋشىقتىرۋى عاجاپ ەمەس. San Francisco Chronicle باسىلىمىنىڭ جازۋىنشا، ءۇش ادام - كەيۋانا، نەمەرەسى مەن شوبەرەسى ءىز- ءتۇزسىز جوعالعان.
