قازاقستاننىڭ ەكى قورىعى يۋنەسكو تىزىمىنە ەندى

استانا. قازاقپارات - قازاقستانداعى ەكى بيوسفەرالىق قورىق دۇنيەجۇزىلىك بيوسفەرالىق رەزەرۆاتتار جەلىسىنە ەندى، دەپ حابارلايدى قازاقپارات ءتىلشىسى ق ر اۋىل شارۋاشىلىعى مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتىنىڭ باسپا ءسوز قىزمەتىنە سىلتەمە جاساپ.

«بۇگىن يۋنەسكو-نىڭ ماب حالىقارالىق كوورديناتسيالىق كەڭەسىنىڭ شەشىمىمەن («ادام جانە بيوسفەرا» باعدارلاماسى) دۇنيەجۇزىلىك بيوسفەرالىق رەزەرۆاتتار جەلىسىنە شارىن جانە جوڭعار الاتاۋى ۇلتتىق پاركتەرى قوسىلدى»، - دەپ جازدى كوميتەتتىڭ باسپا ءسوز حاتشىسى ساكەن دىلداحمەت فەيسبۋكتەگى پاراقشاسىندا.

وسىلايشا، قازاقستاننىڭ بيوسفەرالىق رەزەرۆاتتارىنىڭ تىزىمىنە ۇلتتىق 10 قورىق كىرەدى. ولاردىڭ قاتارىندا اقجايىق، اقسۋ- جاباعىلى، قورعالجىن، الاكول، قاتونقاراعاي، بارساكەلمەس، قاراتاۋ، التىنەمەل، شارىن جانە جوڭعار الاتاۋى، سونداي-اق، ترانس شەكارالىق بيوسفەرالىق رەزەرۆاتتاردىڭ ءبىرى ۇلكەن التاي بار.

دۇنيەجۇزىلىك بيوسفەرالىق رەزەرۆاتتار جەلىسى يۋنەسكونىڭ «ادام جانە بيوسفەرا» باعدارلاماسى اياسىندا قۇرىلعان.

قازاقستاننىڭ ەرەكشە قورعالاتىن تابيعي ايماقتارى ءۇشىن يۋنەسكونىڭ بيوسفەرالىق رەزەرۆاتى مارتەبەسى وتە ماڭىزدى. سەبەبى ءبىزدىڭ تابيعي ايماقتارىمىزدىڭ قۇندىلىقتارىن حالىقارالىق دەڭگەيدە مويىنداتۋعا مۇمكىندىك بەرەدى.