قاراعاندىدا ارحەولوگتار قولا داۋىردە جەرلەنگەن جاۋىنگەردىڭ قابىرىن ىزدەپ جاتىر

قاراعاندى. قازاقپارات - بيىلعى جىلى قاراعاندىلىق ارحەولوگتار توبىلدى قورىمىنداعى جەرلەۋ ەسكەرتكىشتەرىن، قولا داۋىرىندەگى كۇيمە اربامەن ءجۇرۋ مادەنيەتىن زەرتتەۋدە، دەپ حابارلايدى قازاقپارات قاراعاندى وبلىسى اكىمدىگىنىڭ باسپا ءسوز قىزمەتىنە سىلتەمە جاساپ.

جۇمىستار قاراعاندى وبلىسىنىڭ مادەنيەت، مۇراعاتتار جانە قۇجاتتامالار باسقارماسىنىڭ تاپسىرىسى بويىنشا جۇرگىزىلۋدە.

توبىلدى قورىمى شەت اۋدانىندا، تالدى اۋىلىنان 9 شاقىرىم جانە قاراجارتاس قورىمىنان 4 شاقىرىم قاشىقتىقتا ورنالاسقان. زەرتتەۋلەر الدىڭعى قاتارلى عىلىمي قىزمەتكەر يگور كۋكۋشكيننىڭ جەتەكشىلىگىمەن ە. ا. بوكەتوۆ اتىنداعى قارمۋ جانىنداعى سارىارقا ارحەولوگيالىق ينستيتۋتىنىڭ قىزمەتكەرلەرىمەن جۇرگىزىلىپ جاتىر.

ارحەولوگتاردىڭ مالىمدەۋىنشە، جاقىن ارادا وسىدان شامامەن ءتورت جىل بۇرىن قولا ءداۋىرى كەزىندە جەرلەنگەن كۇيمە اربامەن جۇرەتىن جاۋىنگەردىڭ قابىرى اشىلادى.

وبلىستىق تاريحي- ولكەتانۋ مۇراجايىنىڭ اقپاراتىنا ساي، شەت اۋدانىنداعى ءقابىر ەسكەرتكىشتەرىن زەرتتەۋ بارىسىندا جۇگەن اۋىزدىعىمەن بىرگە كومىلگەن جىلقى، نايزانىڭ تاستان قاشالعان ۇشى، ساداق وعىنىڭ تاستان جاسالعان ۇشى، نايزانىڭ قولادان جاسالعان ۇشى، التىن جالاتقان سالپىنشاق پەن كوپتەگەن كەراميكالىق ىدىس-اياقتاردىڭ قوسارلانىپ جەرلەنگەنى انىقتالعان.