قىمىزدى ءبىر كەزدەرى وتكىزە الماساق، قازىر جاقسى تابىس كوزىنە اينالدى - اقتوبەلىك كاسىپكەر
اقتوبە وبلىسىندا «قازاقستاننىڭ ۇزدىك تاۋارى» كورمە- بايقاۋى ءوتتى. بۇل كورمەگە «شىڭعىس» شارۋا قوجالىعى ءبىرىنشى رەت قاتىسىپ وتىر. اۋىلدا، شارۋاشىلىقتا جۇرگەن ورىنباي جولمۇراتوۆ كوبىنە مۇنداي حاباردى ەستىمەي قالادى. بۇل جولى كورمە- بايقاۋدا الىستاعى شارۋالارعا باسىمدىق بەرگەن. قىمىزدى ارنايى ىدىسقا قۇيىپ اكەلگەن شارۋا جەڭىمپاز بولۋعا ەمەس، ءوزىن تانىستىرۋعا كوپ كوڭىل ءبولدى.
«قىمىزدى شىنى ىدىسقا ساقتاعان دۇرىس. ءبىراق ءبىز قىمىز ساپالى بولسىن دەپ بيەنى وبلىس ورتالىعىنان 500 شاقىرىم جەردە باعامىز. تازا اۋا، ءشوپ تە قۇنارلى. ال تاسۋ كەزىندە شىنى ىدىس پايدالانا المايمىز. سوندىقتان باكلاجكاعا قۇيامىز. قىمىزدا ەش قوسپا جوق. 2004 -جىلدان بەرى تاسىمالداپ، ساتامىن. ءبىراق سوڭعى 4 جىلدا ارنايى ساۋىن، قىمىز ءپىسۋ اپپاراتىن ساتىپ الدىم. ايتەكە بي اۋدانىنان كەلگەنشە شايحانالار الادى، ال قالادا ءبىر ورتالىققا جەتكىزسەم، ادامدار وزدەرى كەلەدى»، - دەدى ورىنباي جولمۇراتوۆ.
كاسىپكەر ءۇيىر- ءۇيىر جىلقى ۇستاعانىمەن تەك 100 بيە ساۋىپ وتىر. سەبەبى، سۇرانىسقا وراي قىمىز شىعارىلادى. جىلىنا شامامەن 100 توننا قىمىز جەتكىزىلەدى.
«بىزدە بيە ارنايى اپپاراتپەن ساۋىلادى. مۇنداي اپپارات اقتوبەدەگى وزگە قىمىز شارۋاشىلىقتارىندا جوق. نەگىزى كاسىپتى قاراپايىم جولمەن باستادىم. 2000 -جىلداردىڭ باسىندا قىمىزدى اكەلىپ، بازار، ۆوكزالدا ساتىپ جۇرەتىن ەدىم. كەيدە ادامدارعا قىمىزدى وتكىزە المادىم. ال قازىر جاقسى تابىس كوزىنە اينالدى. شارۋاشىلىقتا 13 جۇمىسشى بار. الداعى ۋاقىتتا تۇيە، سيىر ۇستاپ، ساۋىپ، ءسۇت ونىمدەرىن شىعارۋدى جوسپارلاپ وتىرمىن»، - دەدى ورىنباي جولمۇراتوۆ.
كاسىپكەر 200 بيە ساۋۋدى جوسپارلاپ وتىر. ول ءۇشىن جىل بويى بيە ساۋىپ، قىمىز پىسۋگە ىڭعايلى عيمارات سالۋى كەرەك. ۇسىنىس ازىرگە قولداۋ تاپپادى.
«مەن ەل ىشىندەگى باعدارلامالاردى بىلەيمىن. دالادا ءجۇرىپ، كوپ جاڭالىقتى كەش ەستىپ جاتامىن. ال ايتىپ، ءتۇسىندىرىپ، جولىن كورسەتسە، بيزنەستى دامىتۋعا ءازىرمىز»، - دەدى ول.
كاسىپكەر ءىرى سۋپەرماركەتتەرگە قىمىز تاپسىرمايدى. سەبەبى، ۋاقىت وتكەن سايىن ءسۇت ءونىمىنىڭ ساپاسى جويىلىپ كەتەدى.
ايتا كەتەيىك، «قازاقستاننىڭ ۇزدىك تاۋارى» كورمە- بايقاۋىنىڭ وبلىستىق كەزەڭى قورىتىندىلاندى. «وندىرىستىك ماقساتتاعى ۇزدىك تاۋار» نوميناتسياسىندا ورتكە قارسى كۇرەس تاۋارلارى زاۋىتى مەن ارنايى كيىم تىگەتىن شەبەرحانا، اقتوبە رەلس- ارقالىق زاۋىتى جەڭىمپاز اتاندى.
ال «ۇزدىك ازىق- تۇلىك تاۋارى» ءسۇت جانە ءسۇت ونىمدەرىن شىعاراتىن «بولات ل ت د» ج ش س، «اكتيۋبينسكي مياسنوي كلاستەر» ج ش س جانە «رامازان» ج ش س الدا كەلدى. «حالىققا ارنالعان ۇزدىك تاۋار» نوميناتسياسىندا قاعاز شىعارىپ، جيھاز جاسايتىندار ۇزدىك اتاندى. جەڭىمپازدار مەن جولداما العان اقتوبەلىك كاسىپكەرلەردى وبلىس اكىمى بەردىبەك ساپاربايەۆ قۇتتىقتاپ، العىس حات بەردى.
