تاڭ الدىندا كەزدەسكەن قىز

نۇر-سۇلتان. قازاقپارات - كەڭەس وكىمەتىمەن بىرگە كەلمەسكە كەتىپ، شەجىرەگە قوسىلعان وقيعالاردىڭ ءبىرى - شوپاندار تويى. دۋمانعا تولى سول داۋرەندى كۇندەردەن قالعان ەستەلىكتەردىڭ ءبىرى - قىزىلوردالىق كاسىپقوي ءفوتوتىلشىنىڭ مىنا ءبىر ءساتتى سۋرەتى.

ەڭ قىمبات، ەڭ جەدەل فوتوكامەرالارمەن دە ۋىسىڭدا ۇستاي المايتىن ءساتتى جىبەرمەگەن بولات وماراليەۆ اعامىز بۇل فوتونى بىلاي سويلەتەدى.

- بايىرعىدا قىزىلوردا وبلىسى، سىرداريا اۋدانىنىڭ قويشىلارىنىڭ جايىلىمدارى جەزقازعان وڭىرىندەگى ۇلىتاۋمەن، ودان كەيىن وڭتۇستىك قازاقستان وبلىسىنىڭ سوزاق اۋداندارىمەن شەكتەسىپ جاتۋشى ەدى. سىرداريا اۋدانى سارىسۋداعى مال جايىلىمىنان ەرتە كوكتەمدە جايلاۋعا شىعىپ، قويدى تولدەتىپ، كۇزگە قاراي سەمىرتىپ، قىستاۋعا سىرعا قايتا قۇلايدى. وسى ءۇردىس 1960 -جىلدان باستاپ 1990 -جىلدارعا دەيىن جالعاستى. سول زاماندا مامىر ايىنىڭ اياعىنا تامان قوي تولدەپ بولعاسىن، ءۇش كۇن قاتارىنان شوپاندار تويى وتەدى. مالشىلار دا وسى كەزدە ءبىر سەرگىپ قالۋشى ەدى. قۇدا كەلگەندەي قىزىقتى دۋماننىڭ العاشقى كۇنى وزات شوپاندار ماراپاتتالادى. ەكىنشى كۇنى ات بايگەسى بولادى. ول كەزدە شوپاندار تويىنان باسقا جەردە ات بايگەسى وتپەيتىن. گازەت تاپسىرماسىمەن وسىنداي بايگەنىڭ تالايىنا قاتىستىم.

شامامەن 1975 -جىلى بولۋى كەرەك، اۋداندىق گازەت رەداكتورى، اقىن ماحمۇتباي امىرەيەۆ ەكەۋمىز ءىسساپارعا شىقتىق. ماحاڭ مەنىڭ باستىعىم، مەن سول اۋداندىق گازەتتە فوتوتىلشىمىن. شوپاندار تويى جەزقازعان وڭىرىمەن شەكارالاس «قىزدىڭ شۇبارى» دەگەن جەردە سارىسۋ وزەنىنىڭ بويىندا جىلدا وتەدى. ماحاڭ ەكەۋمىز تويدان ءبىر كۇن بۇرىن ەرتەرەك كەلىپ، ءبىر قويشىنىڭ ۇيىندە دەمالىپ جاتساق، تاڭ الدىندا قويشىنىڭ قىزى يىناعاشپەن سۋ الىپ كەلە جاتىر ەكەن. سيرەك كورىنىسكە تاڭدانا قاراپ، ۇيدەگى فوتوكامەراعا قاراي جۇگىردىم. فوتواپپاراتىمدى الىپ جەتەم دەگەنشە، ءبىر اتتىلى جاس جىگىت تە اتىنان ءتۇسىپ قىزدىڭ شەلەگىنەن سۋ ىشە بەرگەندە ارەڭ ۇلگىردىم. سۋرەتتى ءتۇسىرىپ بولىپ ارتىما قاراسام، ماحاڭ سىرتىمىزدان باقىلاپ تۇر ەكەن. ەكى كوزىندە جاس. وسى كورىنىسكە قاتتى تولقىعان- اۋ، شاماسى، مەنى باس سالىپ قۇشاقتاپ الدى، دەيدى ءوز ءىسىنىڭ حاس شەبەرى.

ايناش ەسالي، «ەگەمەن قازاقستان» الماتى