گولوۆكيننىڭ چەمپيوندىق بەلدىكتەرى ەلباسى كىتاپحاناسىنا قويىلدى

استانا. قازاقپارات - كاسىپقوي بوكسشى گەننادي گولوۆكيننىڭ ەلباسى نۇرسۇلتان نازاربايەۆقا تارتۋ ەتكەن چەمپيوندىق بەلدىكتەرىن ەندىگىدە ەلباسى كىتاپحاناسىندا كورۋگە بولادى، دەپ حابارلايدى قازاقپارات.

قازاقستاندىق بوكسشىنىڭ بەلدىكتەرى «قازاقستانداعى وليمپيادا قوزعالىسى» تۇراقتى ەكسپوزيتسياسىنا قويىلدى. 2018-جىلدىڭ مامىرىندا تۇساۋى كەسىلگەن اتالمىش ەكسپوزيتسيادا مەملەكەت باسشىسىمەن كەزدەسۋ بارىسىندا وليمپيادا قوزعالىسىنىڭ جەتەكشىلەرى، وتاندىق جانە شەتەلدىك سپورتشىلار سىيعا تارتقان كادەسىيلار، ماراپاتتار جانە سپورت قۇرالدارى ساقتالعان.

بۇل جەردە قر پرەزيدەنتىنىڭ سپورت سالاسىنداعى مەملەكەت ساياساتىن ەل ىشىندە عانا ەمەس، شەكارادان تىس ىلگەرىلەتكەنى ءۇشىن العان ماراپاتتارى دا ورنالاسقان. ولاردىڭ قاتارىندا سپورت ۇيىمدارى مەن قوعامدار، قاۋىمداستىقتار مەن فەدەراتسيالار تارتۋ ەتكەن ماراپاتتار، سونداي-اق ق ر  ۇ و ك قۇرمەت بەلگىسى (2000)، «سپەشيال وليمپيكس قازاقستان قوزعالىسىن قولداعانى ءۇشىن» ەستەلىك مەدالى مەن بەلگىسى (2002)، ازيا وليمپيادا كەڭەسىنىڭ وردەنى (2007)، FILA حالىقارالىق كۇرەس قاۋىمداستىعىنىڭ التىن وردەنى (2003) سىندى وزگە دە وليمپيادا جانە پاراليمپيادا ويىندارىمەن بايلانىستى ماراپاتتار بار. ولاردىڭ ەڭ العاشقىسى، ءارى ەڭ ەرەكشەسى - ح و ك پرەزيدەنتى حۋان انتونيو سامارانچتىڭ مەملەكەت باسشىسىنا تابىستاعان - «ەڭبەگى ءۇشىن» التىن وليمپيادا وردەنى (1997).

ەسكە سالايىق، بيىلعى 29- ماۋسىم كۇنى قازاقستان پرەزيدەنتىمەن كەزدەسكەن گەننادي گولوۆكين ەلباسىنا WBC، WBA (Super) ، IBO جانە IBF تۇجىرىمدارى بويىنشا چەمپيوندىق بەلدىكتەرىن سىيعا تارتقان ەدى.

مەملەكەت باسشىسى بوكسشىنى «قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆ» وردەنىمەن ماراپاتتادى.

گەننادي گولوۆكين - قازاقستان رەسپۋبليكاسىنىڭ ەڭبەك سىڭىرگەن سپورت شەبەرى، كوپتەگەن حالىقارالىق تۋرنيرلەردىڭ جەڭىمپازى. اتاپ ايتقاندا، وتانداسىمىز قازاقستاننىڭ جەتى دۇركىن چەمپيونى، جاستار اراسىنداعى الەم چەمپيونى (2000)، ق ر 1- سپارتاكياداسىنىڭ چەمپيونى (2001)، مۇناي ەلدەرى اراسىنداعى الەم كۋبوگىنىڭ جەڭىمپازى (2001)، 3-شىعىس ازيا ويىندارىنىڭ چەمپيونى (2001)، كاسىپقويلار اراسىنداعى الەم چەمپيونى (2003)، وليمپيادا ويىندارىنىڭ ۆيتسە-چەمپيونى (2004)، WBC، WBA (Super) ، IBO چەمپيونى، «The Ring» جۋرنالىنىڭ نۇسقاسى بويىنشا بارلىق سالماق ساناتىنداعى ۇزدىك بوكسشى (2017)، WBA، WBC، «Boxingnews24.com» بەلگىلى باسىلىمىنىڭ نۇسقاسى بويىنشا 2017-جىلعى ۇزدىك بوكسشى.