الماتىدا ادام ءومىرى ءۇشىن قاۋىپتى قاراقۇرتتار تابىلىپ جاتىر

  استانا. قازاقپارات - قاراقۇرت - ەڭ ۋلى ورمەكشى. بۇل جاندىكتەر الماتىداعى پاتەرلەردەن تابىلا باستادى. ازامات باتي ۇلى جەلىدە پاتەرىنەن قاراقۇرت تاۋىپ العانىن جازدى، دەپ حابارلايدى ەۆرازيا ارناسى.

«الماتىلىقتار، ساق بولىڭىزدار! بۇگىن ءۇيىمنىڭ توبەسىنەن قارا ورمەكشىنى كورىپ ءولتىردىم. انىقتاپ قاراسام، قاراقۇرت ەكەن. سىرتى جالتىراپ تۇر. قۇراقۇرت شاعىپ العان جاعدايدا جەدەل جاردەم شاقىرىڭىز. ويتكەنى ونىڭ ۋى وتە قاۋىپتى» ، - دەپ جازادى ول.

قۇراقۇرت انالىعىنىڭ ۋى جىلان ۋىنان 15 ەسە ۋىتتى.

«بۇرىن قاراقۇرت دالالى ايماقتا بولاتىن. قازىر ادامدار حابارلاسىپ، ۇيىنەن تاۋىپ جاتقاندارىن ايتادى. بۇل ءبىزدى الاڭداتىپ وتىر» ، - دەيدى دەزينسەكتور مامان گۋلچەحرا يميروۆا.

قاراقۇرتتاردىڭ قالادا كوبەيۋىنىڭ ءبىر سەبەبى - كاۋاپ بيزنەسى. قۇراقۇرتتار كاۋاپ پىسىرەتىن سەكسەۋىلدەرمەن بىرگە كەلەدى. انالىقتارى سەكسەۋىلدەرگە جۇمىرتقالايدى.

ودان بولەك بالىق اۋلاۋعا، اڭشىلىققا باراتىن قالا تۇرعىندارىنىڭ ءوزى دە ۋلى جاندىكتى وزىمەن بىرگە تاسىمالدايدى.

دارىگەرلەر بيىل قاراقۇرت شاققان جاعداي تىركەلمەگەنىن ايتادى. ءبىراق ماماندار تۇرعىنداردى ساقتىققا شاقىرادى. قاراقۇرتتىڭ شاققانىن ادام سەزبەيدى. ال، ۋلانعان ادامنىڭ دەنساۋلىعى ناشارلاعان جاعدايدا ونى باسقا اۋرۋمەن شاتاستىرىپ الۋى مۇمكىن. قاراقۇرت شاققاندا ادامنىڭ جۇرەگى اينىپ، تەرلەپ، دەنەسى اۋىر بولىپ تۇرادى.

«قاراقۇرت شاعىپ العان جاعدايدا، دارىگەرلەر كەلگەنشە اۋىرعان جەرگە كەز كەلگەن انتيسەپتيك جاعۋ كەرەك. ەگەر اۋىرسىنۋ بولسا، اۋىرسىنۋدى باساتىن ءدارى بەرۋ كەرەك. ەگەر جۇرەگى اينىسا، جۇرەك اينۋدى باساتىن ءدارى ىشكىزەدى. جاندىك شاققان جەردى سىقپاۋ كەرەك» ، - دەيدى دارىگەر تالعات شاكىروۆ.

دارىگەرلەر ناۋقاسقا ۋدى قايتاراتىن ارنايى ءدارى سالادى. ءبىراق كومەككە دەر كەزىندە كەلۋ كەرەك. ەگەر قاراقۇرتتى ۇيدەن تاۋىپ الساڭىز، دەزينسەكتور ماماندارىن شاقىرىڭىز. قاراقۇرتپەن ءوز بەتىنشە كۇرەسۋ ادام ءومىرى ءۇشىن قاۋىپتى.