وسكەمەندەگى ۆوروشيلوۆ كوشەسى شاكارىم داڭعىلى بولىپ وزگەرەدى
اۋەلى وبلىس ورتالىعىنداعى 23 اتاۋسىز كوشەگە ەسىم ۇلەستىرىلدى. ونىڭ كوبى اقباۋىر، تولاعاي، اقشوقى، اراسان دەگەن سياقتى قاستەرلى مەكەن اتاۋلارىنا يە بولدى.
ال ۇزىندىعى 3,6 شاقىرىم بولاتىن، بويىندا 5000 نان استام حالىق تۇراتىن ۆوروشيلوۆ كوشەسىنە جاقيا ءشايجۇنىسوۆ پەن شاكارىم قۇدايبەردى ۇلى ەسىمدەرىن بەرۋ تۋرالى ەكى ۇسىنىس كوتەرىلدى. العاشقى ۇسىنىستى «سەنتر اكتيۆنوگو دولگولەتيا» الەۋمەتتىك باستامالار قورى مەن «كازگيپروتسۆەتمەت» ج ش س ۇجىمى بەرگەن. ال شاكارىم قۇدايبەردى ۇلىنىڭ ەسىمى قازاقستان جازۋشىلار وداعى وبلىستىق فيليالىنىڭ، مادەنيەت، سپورت جانە اقپارات سالاسى قىزمەتكەرلەرى كاسىپوداق ۇيىمىنىڭ وڭىرلىك فيليالىنىڭ جانە «التاي اسۋى» قوعامدىق بىرلەستىگى تاراپىنان ۇسىنىلعان. تۇرعىندار اراسىندا كوشەنىڭ اتىن كەڭەستىك اتاۋىمەن قالدىرۋ كەرەكتىگىن ايتقاندار دا تابىلدى. تاراپتاردىڭ پىكىرىن تىڭداي كەلە، قالالىق ءماسليحات دەپۋتاتتارى شاكارىم قۇدايبەردى ۇلىنىڭ ەسىمىن بەرۋ تۋرالى ۇسىنىستى ءبىراۋىزدان قولدادى.
بۇدان بولەك، پيتەر كوممۋنارلارى كوشەسى ليەۆ تولستويدىڭ اتىمەن، لەنينوگور كوشەسى تەمىرجولشىلار اتاۋىمەن، كومسومول كوشەسى جاستار دەگەن اتپەن قايتا اتالدى.
سونداي- اق، قالانىڭ قاق ورتاسىنداعى «جاستار» ساياباعىنا حالىق قاھارمانى قاسىم قايسەنوۆتىڭ ەسىمى بەرىلدى. وسىعان ۇقساس ۇسىنىستى جىل باسىندا ءوڭىردىڭ اقساقالدارى كوتەرگەن بولاتىن.
«ۇسىنىستاردى قالالىق ءماسليحاتتىڭ دەپۋتاتتارى ءبىر اۋىزدان قولدادى. قوعامدىق تىڭداۋ بويىنشا قاۋلى دايىندالىپ، قۇجات ەندى رەسپۋبليكالىق ونوماستيكالىق كوميسسياعا جىبەرىلەدى. اقىرعى شەشىم سول جەردەن شىعادى» - دەيدى قالالىق ءماسليحاتتىڭ دەپۋتاتى مايراش ەكىباسوۆا.
