رەجەپ تاييپ ەردوعان تۇركيا پرەزيدەنتى رەتىندە انت قابىلدادى

انكارا. قازاقپارات - بۇكىل حالىقتىق سايلاۋدا داۋىستاردىڭ باسىم بولىگىن يەلەنگەن رەجەپ تاييپ ەردوعان تۇركيا پرەزيدەنتى رەتىندە سالتاناتتى جاعدايدا انت بەردى.

بۇل تۋرالى انادولۋ اگەنتتىگى حابارلادى.

پارلامەنت ءتوراعاسىنىڭ مىندەتىن اتقارۋشى دۋرمۋش يىلماز ەردوعانعا تۇركيا رەسپۋبليكاسىنىڭ پرەزيدەنتىنىڭ كۋالىگىن تابىس ەتتى.

«بارشا حالىقتىڭ الدىندا بارلىعى جاقسى ءوتتى. الداعى ۋاقىتتا دا تۇركيادا بارلىعى جاقسى بولاتىنىنا ۇمىتتەنەمىن»، - دەدى انت بەرگەننەن كەيىن ەردوعان.

پارلامەنت عيماراتىنان شىققاننان كەيىن پرەزيدەنت مۇستافا كەمال اتاتۇرىكتىڭ ماۆزولەيىنە باردى.

ەردوعان تۇركيا رەسپۋبليكاسىنىڭ نەگىزىن قالاۋشى تۇلعاعا قۇرمەت رەتىندە ماۆزولەيگە گۇلدەستەسىن قويدى.

«ۇلت بىرلىگى مەن نيەتتەستىكتى نىعايتۋ، ەلدىڭ قۋاتىن دامىتۋ جانە نىعايتۋ بويىنشا كۇش- جىگەردى جالعاستىرۋعا دايىن ەكەندىگىمىزگە كەزەكتى رەت سەندىرەمىز»، - دەدى ول اتاتۇرىك ماۆزولەيىندە.

تۇركيا باسشىسىنىڭ كورتەجى پرەزيدەنتتىك كەشەننەن پارلامەنتكە جەتكەنگە دەيىن جول بويىندا قالىڭ حالىق جينالىپ تۇردى. ادامدار ەردوعاننىڭ كولىگىن گۇلدەرمەن كومكەرىپ تاستادى.

وسىلايشا، تۇركيا پارلامەنتتىك باسقارۋ فورماسىنان رەسمي تۇردە پرەزيدەنتتىك رەسپۋبليكاعا اۋىستى.

ايتا كەتەيىك، 4 -شىلدە كۇنى تۇركيانىڭ جوعارعى سايلاۋ كوميسسياسى 24 -ماۋسىم كۇنى وتكەن ەل پرەزيدەنتى مەن پارلامەنتىنىڭ كەزەكتەن تىس جالپى ۇلتتىق سايلاۋىنىڭ قورىتىندىلارىن جاريالاعان بولاتىن.

وعان سايكەس، ادىلدىك جانە دامۋ پارتياسىمەن جانە ۇلتتىق ءىس-ارەكەت پارتياسىمەن (MHP) قۇرىلعان - «حالىق اليانسىنان» كانديدات رەتىندە ۇسىنىلعان رەجەپ تاييپ ەردوعانعا 26 ميلليون 330 مىڭ 823 (%52,59) سايلاۋشى داۋىس بەردى.

تۇركيا پرەزيدەنتتىگىنە وزگە كانديداتتاردىڭ جيناعان داۋىستارى كەلەسىدەي: رەسپۋبليكالىق حالىق پارتياسىنان ۇمىتكەر (CHP) مۋحاررەم يندجە - %30,64  داۋىس؛ İYİ پارتياسىنىڭ كوشباسشىسى مەرال اكشەنەر - %7,29  داۋىس؛ دەموكراتيالىق حالىق پارتياسىنان ۇمىتكەر (HDP) سەلاحاتتين دەميرتاش - %8,40  داۋىس؛ Saadet پارتياسىنىڭ ءتوراعاسى تەمەل كاراموللاوگلۋ - %0,89 داۋىس؛ «وتان» پارتياسىنىڭ كوشباسشىسى دوگۋ پەرينچەك %0,20 داۋىس جينادى.

ال پارلامەنتتىڭ 27- شاقىرىلىمىنا بەس پارتيا ءوتتى.

اتاپ ايتقاندا، ادىلدىك جانە دامۋ پارتياسى - 295 ماندات، رەسپۋبليكالىق حالىق پارتياسى - 146, دەموكراتيالىق حالىق پارتياسى (HDP) - 67، ۇلتتىق ءىس- ارەكەت پارتياسى - 49 جانە İYİ پارتياسى 43 ماندات الدى.

قازاقستان رەسپۋبليكاسىنىڭ پرەمەر-ءمينيسترى باقىتجان ساعىنتايەۆ رەجەپ تاييپ ەردوعاننىڭ ۇلىقتاۋ راسىمىنە قاتىسۋ ءۇشىن ءبىر توپ قازاقستاندىق دەلەگاتسيانى باستاپ باراتىنىن جازعان بولاتىنبىز.