بەيتانىس قىزعا بۇيرەگىن بەرگەن ازاماتتىڭ تويىن جۇرگىزگەندەر اقى الۋدان باس تارتقان

الماتى. قازاقپارات - بەيتانىس قىزعا بۇيرەگىن تەگىن بەرگەن جىگىت - ابزال ءادىلوۆتىڭ تويى ورالدا ءوتتى. قايىرىمدى جىگىتتىڭ تويىن جاساۋعا اسابا، ۆيدەوينجەنەر، فوتوگراف، توي كورتەجىن ۇيىمداستىرۋشىلار اقى الۋدان باس تارتقان، دەپ حابارلايدى قازاقپارات ءتىلشىسى.

 «تويىمىز جاقسى ءوتتى، شۇكىر. اسابا، ۆيدەو جانە ءفوتوتۇسىرىلىم، كورتەج ءبارى تەگىن بولدى. مەيرامحانا باسشىلىعى دا جەڭىلدىك جاسادى»، - دەدى ابزال.

تويعا ارنايى شاقىرىلعان ءجاميلا مەن اناسى دەنساۋلىعىنىڭ كۇتىمىنە بايلانىستى كەلە المادى.

جاس جىگىت سۇيىكتىسىن تۇركىستان وبلىسىنان تاپقانىن جازعان بولاتىنبىز.

ءبىر بۇيرەگىن تانىمايتىن قىزعا تەگىن بەرگەن ابزال ءادىلوۆ 2017 -جىلدان بەرى الەۋمەتتىك جەلىدە تانىمال بولىپ كەتتى. قاراپايىم وتباسىدان شىققان ورالدىق جىگىت تۇركىستان وبلىسىنىڭ تۇرعىنى ءجاميلا بايسەرىكوۆانىڭ باسىنداعى قيىن جاعدايدى ەستىپ، كومەك قولىن سوزۋعا بەل بۋادى.

جىگىت ناۋقاستان اقشا سۇراماي، ءبىر بۇيرەگىن بەرۋگە كەلىسەدى. ءجاميلا مەن ابزال 2017 -جىلدىڭ قاراشاسىندا بۇيرەك اۋىستىرۋ ءۇشىن وتاعا تۇسكەن ەدى. بىرنەشە ساعاتقا سوزىلعان وپەراتسيا ءساتتى وتكەن. 5 كۇننەن سوڭ ابزال مەن ءجاميلا جانە ءجاميلانىڭ اناسى قۇرمانگۇل شىمكەنتكە كەتكەن بولاتىن. جاس جىگىت ءوزىنىڭ ماحابباتىن شىمكەنتتە ءجۇرىپ جولىقتىرعان.

«شىمكەنتتە جۇرگەندە الەۋمەتتىك جەلى ارقىلى ايگەرىم دەگەن قىزبەن تانىستىم. ول ءوزى مەنىڭ وقيعامدى ەستىپ بىلگەن سوڭ ماعان جازعان. 1-2 اپتاداي سويلەسىپ، كەزدەسىپ جۇردىك. كەيىن ءبىر- ءبىرىمىزدى ۇناتىپ قالدىق. مەن ايگەرىمدى ورال جاققا الىپ كەتتىم. اتا- انام كەلىن اپارا جاتقانىمدى ەستىگەندە سەنبەدى. جارىم ايگەرىم ورداباسى اۋدانى، تەمىرلان اۋىلىنىڭ قىزى»، - دەدى ابزال ءادىلوۆ.

قازىر جاس وتباسى ورالدا تۇرىپ جاتىر. ايگەرىم - بالاباقشادا تاربيەشىنىڭ كومەكشىسى بولىپ جۇمىس ىستەيدى. ابزال «كۆانت» ج ش س- دا قىزمەت ەتەدى.

اۆتور: گۇلميرا عوسمانالي