ەۋروپالىق ۆەلوساياحاتشىلار استاناعا كەلدى

استانا. قازاقپارات - استاناعا ارنايى ات باسىن بۇرعان حالىقارالىق «سانكت-پەتەربۋرگ-ۆلاديۆوستوك» ۆەلوشەرۋىنىڭ قاتىسۋشىلارى ءوز اسەرلەرىمەن ءبولىستى، - دەپ حابارلايدى قازاقپارات ءتىلشىسى.

22 اۋەسقوي ساياحاتشىدان تۇراتىن ۆەلوشەرۋ 10- ماۋسىمدا سانكت-پەتەربۋرگتە باستالدى، ۆەلوساياحاتشىلاردىڭ ىشىندە شۆەيتساريا، گەرمانيا جانە اۆستريادان قاتىسۋشىلار بار.

«ءبىز ۇزىندىعى 3300 شاقىرىمدى قۇرايتىن جولدى ءجۇرىپ وتتىك جانە العان اسەرىمىز مول. قازاقستان ءبىزدى ەرەكشە تابيعاتىمەن جانە جىلى ءجۇزدى ادامدارىمەن قارسى الدى. تاعى ءبىر ايتا كەتەرلىگى - قازاقستاننىڭ جولدارىنىڭ قولايلىلىعى. قازاقستاندا 5 كۇندەي بولىپ، ودان ءارى ءنوۆوسىبىر، يركۋتسك، ۆلاديۆوستوكقا بەت الامىز»، - دەدى «سانكت-پەتەربۋرگ-ۆلاديۆوستوك» ۆەلوشەرۋىن ۇيىمداستىرۋشى كومپانيانىڭ ديرەكتورى مارسەل يزەلي.

ۆەلوشەرۋشىلەر 3 ايدىڭ ىشىندە رەسەي مەن قازاقستان تەرريتورياسىنىڭ 10 مىڭ شاقىرىمىن ءجۇرىپ وتەمىز دەپ جوسپارلاپ وتىر.

مارشرۋتتىڭ قازاقستاندىق بولىگى قوستاناي، اقمولا جانە پاۆلودار وبلىستارىنىڭ اۋماقتارىن قامتىپ، بارلىعى 1500 شاقىرىم قاشىقتىقتى قۇرايدى.

ۇيىمداستىرۋشىلاردىڭ ايتۋىنشا، 2- شىلدەدە ەۋروپالىق ۆەلوساياحاتشىلار قوستاناي وبلىسىنىڭ رەسەيمەن تۇيىسەتىن شەكاراسىنان ءوتىپ، 7 كۇن ىشىندە استاناعا جەتتى.

«مەنى قازاقستاندا تاڭ قالدىرعانى - شەكسىز جازىق دالا، ال استاناعا كەلسەك، وركەنيەتتىڭ ءبىر بولىگىن جازىق دالانىڭ ورتاسىنا اكەلىپ قويعانداي اسەردە بولدىم. استانادا ءبىر-بىرىنە ۇقسامايتىن ەرەكشە عيماراتتار كەشەنى ورنالاسقان، ماعان بارىنەن قاتتى ۇناعانى - «بايتەرەك» مونۋمەنتى»، - دەدى «سانكت- پەتەربۋرگ-ۆلاديۆوستوك» ۆەلوشەرۋىنىڭ ەڭ قارتاڭ قاتىسۋشىسى 75 جاستاعى ۆالتەر گلانتسمان.

ۆەلوشەرۋ قاتىسۋشىلارى قازاقستاندا 5 كۇن بولىپ، ودان ءارى رەسەي تەرريتورياسىندا ساياحاتىن جالعاستىرادى. ساياحاتتى 8-9- قىركۇيەكتە ۆلاديۆوستوكتا وتەتىن شىعىس ەكونوميكالىق فورۋمى قارساڭىندا اياقتاۋ جوسپارلانعان.