مارفۋعا شاپيان. «التى جاسار الپامىستىڭ» سەناريى قالاي جازىلدى؟
ول تۋرالى رەجيسسەردىڭ ءوزى «ونى نەگىزى «التى جاسار قانىمبەك» دەسە دە بولاتىن ەدى، ويتكەنى ول تاپ-تازا مەنىڭ ءومىرىم. مەن قانىمبەك دەگەن اقساقالدىڭ الپىسقا كەلگەندە دۇنيەگە كەلگەن بالاسىمىن.
شەشەمىز كوپكە دەيىن قۇرساق كوتەرمەي جۇرگەن ەكەن. ەركە بولىپ ءوستىم. بەسكە كەلگەنىمدە كۇزدىڭ العاشقى ايى كەلىپ، اۋىل بالالارى «وقىپ ءجۇرمىز» دەپ ءبىر جاققا بارىپ كەلەتىن بولدى. وعان دەيىن كۇندىز اۋىلدا قالىپ ابدەن زەرىگەم. بۇل نە ەكەن دەپ، كۇندە مۇڭايىپ، سول جاققا جەتە الماي جالعىزسىراپ جۇرەم دە قويام. مەنىڭ سول ءبىر سيقىمدى بايقاعان اكەم بارۋعا رۇقسات بەردى...» دەپ ەسكە الادى.
ارى قاراي ۆاليانىڭ مارۋسيا دەگەن كورشى نەمىس ايەلى ەكەنىن، اڭىزعا تولى نەبىر حيكاياتتاردى بىلەتىن شەجىرەشى اتانىڭ بەينەسى مۇنار اتا بولىپ شىققانىن تىلگە تيەك ەتەدى. بالالىق شاعىنداعى وسى وقيعالاردى ق. قاسىمبەكوۆ ا. كونچالوۆسكيگە ايتادى. ول قىزىعا تىڭداعانمەن قولى تيمەيتىنىن ايتىپ، وقيعا جەلىسىندە فيلم تۇسىرۋگە كەڭەس بەرەدى.
ال سەناريىن جازۋعا اتاقتى «ۆوينا ي مير» كينوسىنىڭ سەناريىن جازعان سولوۆيەۆتىڭ شەبەرحاناسىنان ۇلكەن تاعلىم العان روزا حۋسنيددينوۆا دەگەن شاكىرتتى ۇسىنادى. سولاي روزا 1974 -جىلى قانىبەكتىڭ اۋىلىندا ءبىر جارىم ايداي قوناق بولىپ، «التى جاسار الپامىستىڭ» سەناريىن جازىپ شىعادى. سەناري دايىن بولعاندا ق. قاسىمبەكوۆ «پاستەردىڭ كۇن ساعاتى» اتتى فيلم ءتۇسىرۋ ۇستىندە بولادى دا، «التى جاسار الپامىسقا» بۇرىلۋعا شاماسى كەلمەيدى. ءوزىنىڭ تۇسىرۋگە مۇمكىندىگى بولمايتىنىن ۇققان رەجيسسەر روزاعا سەناريدى ابدوللا قارساقبايەۆتان باسقا ەشكىمگە بەرمەۋىن ءوتىنىپتى. وسىلايشا «التى جاسار الپامىس» ابدوللا اعامىزدىڭ قولىنان ءبىر-اق شىعىپتى.
فيلم كەيىپكەرلەرى قالاي تاڭدالدى؟
«بالالىعىن ۇرلاتقان» - الپامىس
ءفيلمنىڭ ءساتتى شىعۋى - كوپ جاعدايدا كەيىپكەرلەرىنە بايلانىستى بولادى. «التى جاسار الپامىستىڭ» رەجيسسەرلەرى دە ءفيلمنىڭ كىشكەنتاي كەيىپكەرلەرىنە لايىق بالالاردى ۇزاق ىزدەپتى. ا. قارساقبايەۆ الپامىستىڭ ءرولىن الىپ شىققان ەرمەك تولەپبايەۆتى تۇراش ىبىرايەۆتىڭ «اق اۆتوموبيل» اتتى قىسقا مەتراجدى فيلمىنەن كورىپ قالعان ەكەن. رەجيسسەرگە اسىرەسە، بالانىڭ كوزى ۇناپتى. ول ەرمەك- الپامىستىڭ كوزىنەن سابيگە ءتان نازىكتىك، ءمولدىر تازالىقتى كورگەن ەكەن. رەجيسسەر قاتەلەسكەن جوق! بالا ەرمەك سول ءمولدىر قارا كوزدەرىمەن كورەرمەن جۇرەگىندە ارادا وتىز جىلدان ارتىق ۋاقىت وتسە دە ۇمىتىلماي قالىپ قويدى.
ال فيلم تۋرالى جۋرناليست ەسەي جەڭىس ۇلىنا بەرگەن ءبىر سۇحباتىندا ەرمەك تولەپبايەۆ («جاس الاش» 21 -قىركۇينك 2002 ج. ) «كينو مەنىڭ بالالىعىمدى ۇرلادى. مەنىڭ قۇرداستارىم وينادى، جۇگىردى، دەمالدى. مەن ول كەزدە جۇمىس ىستەپ ءجۇردىم. قازىر ويلاپ وتىرسام، بالالىق شاقتا مەنىڭ ءوز ءومىرىم بولماپتى. مەن كەيىپكەرلەرىمنىڭ ءومىرىن كەشتىم. كينوعا ءتۇسۋدىڭ ەكى ءتۇرلى زاردابىن تارتتىم. بىرىنشىدەن، دۇرىستاپ وقي العان جوقپىن. ءارقاشان ءتۇسىرۋ الاڭىندا جۇرەتىنمىن. ەكىنشىدەن، وسە كەلە ادامداردىڭ ءبارى تاني بەرەتىنى جالىقتىردى» دەپ ەسكە الادى. كينودان كوڭىلى قالعانى سونداي، ەرمەك قازىر ءوزى تۇسكەن فيلمدەردى دە كورمەيدى ەكەن. «ەگەر ابدوللا اعا بولماسا، كينوعا تۇسپەيتىن ەدىم» دەگەن ەرمەكتىڭ ءرولىنىڭ ءساتتى شىعۋىندا رەجيسسەردىڭ ۇلەسى مول بولسا كەرەك.
فيلم تۋرالى ەستەلىك ايتىپ بەرسە دەگەن ويمەن، قازىر جىگىت اعاسىنا اينالعان ەرمەك- الپامىسقا ءبىز دە حابارلاسىپ كورگەن ەدىك. سۇحبات بەرگىسى كەلمەدى مە، باس تارتتى. كينو الەمىنەن مۇلدە اجىراعىسى كەلگەندەي...
ومىردەن ەرتە وتكەن قاليحان
الپامىسقا ءارىپ، ەسەپ ۇيرەتىپ، وزىنە-ءوزى كوڭىلى تولعاندا «ءاي، ءوزىم-اي!» دەپ ءوزىن ماقتاپ قوياتىن، تەنتەك سارى بالا بارلىعىڭىزدىڭ ەستەرىڭىزدە شىعار؟! مىنە، سول قاليحان- ۇلان سارباسوۆتى ا. قارساقبايەۆ فۋتبول الاڭىنان تاۋىپتى. ءوزىنىڭ ايتقانى بولماسا وزگەگە كونبەيتىن، وزىنەن ەرەسەكتەرمەن دە ەرەگەسە كەتۋگە دايىن بالانى كورگەن ابەكەڭ قاليحان رولىنە لايىق دەپ تاۋىپتى. راسىمەن دە، سول كەزدەرى جاسى ونعا كەلىپ قالعان ۇلان ءوز ءرولىن ايتارلىقتاي الىپ شىقتى.
ول تۋرالى ەرمەك تولەپبايەۆ جوعارىدا اتى اتالعان سۇحباتىندا «ول ءوزىن-ءوزى وينادى. باسقاشا بولۋى مۇمكىن ەمەس» دەپ باعا بەرەدى. ۇلان- قاليحان فيلمنەن كەيىنگى ومىردە دە تەنتەكتىگىنەن ارىلماسا كەرەك. ونىڭ قايعىلى ءولىمى تۋرالى اڭىز اڭگىمە كوپ. بىرەۋلەر 10-سىنىپتى بىتىرگەن سوڭ ادام ولتىرۋگە قاتىستى بولىپ تۇرمەگە ءتۇستى دەسە، ەندى بىرەۋلەر اسىلىپ ءولدى دەيدى. تاعى ءبىر جاماندىققا قيمايتىندارى ونى بىرەۋلەر پىشاقتاپ كەتىپتى دەيدى. قالاي بولعاندا دا قىزعالداق- عۇمىر ەرتە ۇزىلگەن ەكەن. اتتەڭ، فيلمدە بايقاعانىمىزداي بولايىن دەپ تۇرعان بالا ەدى عوي...
كونەنىڭ كوزى - مۇنار اتا
ءبىر ءوزى الىپ تاۋ سەكىلدى توبە ۇستىندە شىنتاقتاي جاتاتىن مۇنار اتا دا ۇمىتىلا قويماعان شىعار. سول مۇنار اتانى قازاق ونەرىنىڭ باستاۋىندا تۇرعان قانابەك بايسەيىتوۆ وينايدى. ەڭ قىزىعى، العاشىندا بۇل ءرول ا. قارساقبايەۆتىڭ دوسى كەنەنباي قوجابەكوۆكە بەرىلگەن ەكەن. «مەنىڭ اتىم - قوجاداعى» سابىرلى ۇستاز شە؟ سونىڭ ءدال وزىنە. دوسى مۇگەدەك بولىپ، ارباعا تاڭىلىپ قالعاننان كەيىن دە ابدوللا اعا ول كىسىنى ءوز كينولارىنان تاستاماپتى.
ءتىپتى، «مۇگەدەكتى قايتەسىڭ» دەپ ك. قوجابەكوۆتى شەتتەتكىسى كەلگەندەردىڭ جاعاسىنان دا العان ەكەن. بۇل جولى دا رەجيسسەر دوسىن مۇنار اتا رولىنە بەكىتەدى.
ول تۋرالى ك. قوجابەكوۆ ءوز ەستەلىگىندە («قازاق ادەبيەتى» 3 -قازان، 1986 ج. ) «ابدوللا تاعى دا مەنى «الپامىسقا» تۇسۋگە شاقىردى. سەناريدى وقىپ، كوڭىلىمە توقىپ، گريمدەلۋگە باردىم. كوپتى كورگەن، اۋىلدىڭ دانا قارتى، بۇرىنعى بالۋان شال بەينەسى كوز الدىما كەلدى. فيلمگە تۇسەر الدىندا گريمدەلىپ بولىپ، ايناعا قارادىم.
الگى ابدوللا كوكەيىندەگى، سەناريدەگى دانا قاريا تۇلعاسىنا سىرت ءپىشىنىم عانا ەمەس، ىشكى جاندۇنيەم، وي سەزىمىم ۇيلەسپەيتىن سياقتى. شىعارا الماي كۇلكىگە قالام با دەپ قورقىپ، كۇدىكتەنە بەردىم. بۇل وبراز قانەكەمە كەلىپ تۇر عوي دەگەن ويدا قالدىم. كەنەت اينادان بۇرىلىپ، جاپسىرعان ساقال- مۇرتىمدى جۇلىپ تاستاپ، كولياسكىمەن ءجۇرىپ كەتتىم. ماشيناما مىنەيىن دەپ جاتقاندا قالباڭداپ ابدوللا كەلدى. مەن باس تارتتىم.
«بۇل ناعىز قانەكەڭنىڭ ءرولى» دەپ شىنىمدى ايتتىم» دەيدى. ءتىپتى، ءوزى قانابەك بايسەيىتوۆتى شاقىرتىپ اكەلىپتى. ك. قوجابەكوۆ بىردەڭە بىلگەن ەكەن، قارت بەينەسى ەكراندا قانابەك اعانىڭ اسقار تۇلعاسىمەن، ونەرىمەن دارالانىپ تۇردى. بۇل قانەكەڭنىڭ ونەردە جاساپ كەتكەن سوڭعى بەينەسى بولىپتى...
فيلم قۇرامىنداعى وزگە اكتەرلەر دە كىلەڭ كينو ونەرىنىڭ مارعاسقالارى ەدى. الپامىستىڭ اكەسىن ماكىل قۇلانبايەۆ، اناسىن قىرعىز اكتريساسى بيكەن قىدىكەيەۆا، قاليحاننىڭ اناسىن داريعا تىلەنديەۆا وينايدى. مۇعالىمدى ويناعان جەكسەن قايىرليەۆ تە ءوز ءرولىن ءتاۋىر الىپ شىققان. فيلم1977 -جىلى ريگادا وتكەن بۇكىل وداقتىق كينوفەستيۆالدە «بالا پسيحولوگياسىن جاقسى اشقانى ءۇشىن» اتتى ەڭ تاڭداۋلى بالالار فيلمىنە بەرىلەتىن باس جۇلدەنى جەڭىپ العان.
فيلم وپەراتورى كىم؟
«التى جاسار الپامىستىڭ» وپەراتورى قازاقستاننىڭ حالىق سۋرەتشىسى ءابىلحان قاستەيەۆتىڭ ۇلى - ءابىلتاي قاستەيەۆ بولعانىن بىرەۋ بىلسە، بىرەۋ بىلمەس. اسىرەسە، مۇنار اتا بەينەسىن تاۋداي ەتىپ كورسەتۋدە وپەراتوردىڭ ءرولى زور بولدى. مۇنار اتانى ءا. قاستەيەۆ كوبىنەسە تومەننەن ءتۇسىرىپ وتىرعان. ال جاقىننان الاتىن، قاريانىڭ اينالاسىنا كوز تاستايتىن كادرلەرىندە تەك موينى مەن قۇلاعىن عانا بەرىپ وتىرعان ەكەن.
رەجيسسەر تۋرالى ءبىر اۋىز ءسوز
وتكەن عاسىر قازاق كينوونەرىنىڭ قارىشتاپ، دامىعان عاسىرى ەدى. ول تۋرالى كامال سمايىلوۆ: «سول كەزدەگى قازاق كينوسى ءتورت كيتتىڭ ۇستىندە تۇر» دەيدى. ول ءتورت جايىنى - شاكەن ايمانوۆ، ءماجيت بەگالي، سۇلتانبەك قوجىقوۆ، ابدوللا قارساقبايەۆ بولاتىن.
«التى جاسار الپامىس» - ا. قارساقبايەۆتىڭ سوڭعى فيلمدەرىنىڭ ءبىرى. ونى ۇلكەن ماحابباتپەن ءتۇسىرىپ شىققان دەسەدى. تالاي قىساستىق، كورەالماۋشىلىق پەن قىزعانشاقتىقتان شارشاعان رەجيسسەر ەشتەڭەگە قاراماستان ارتىندا ولمەس تۋىندىلار قالدىردى. ءتىپتى، «كانن» كينوفەستيۆالىنەن «ۇزدىك رەجيسسەر» اتانىپ، ول اتاعىن ەكى جىل كەشىگىپ ەستىگەندە «مەن ءوز حالقىمدى الەمدەگى ەڭ ۇزدىك حالىق دەپ ەسەپتەيمىن، سول ۇزدىك حالىقتىڭ ۇل- قىزدارى ۇزدىك شىعارمالار تۋىنداتپاۋى مۇمكىن ەمەس. كوپ بولسا مەن دە سونىڭ ءبىرى شىعارمىن. ەڭ الدىمەن قازاعىم امان بولسىن» دەپ جايباراقات جۇرە بەرگەن ەكەن. دەسە دەگەنىندەي ونىڭ ۇزدىك تۋىندىلارى ولەڭ بولىپ ءورىلىپ جاتتى. سايات قامشىگەر:
ابدوللا اعا، رۋحىڭ بار العا وزا الار،
سەنى ايتسام ميدا سەڭ بولعان ويلار قوزعالار.
VK - پاراقشامىزعا جازىلىڭىز!
حالقىمنىڭ سەندەي جىگەرلى ۇلى ازايماس،
ءار ۇيدە جۇرسە «الپامىس» پەنەن «قوجالار»، - دەسە، سەيفوللا وسپان:
تانىتتىردىڭ «قول ونەرىن قازاقتىڭ»،
«التى جاسار الپامىس» بوپ. ازات كۇن، - دەيدى. قياناتتىڭ قۇربانى بولعان ەسىل رەجيسسەر ءوز فيلمدەرىنىڭ ولەڭگە اينالىپ كەتەرىن ءبىلدى مە ەكەن...
سەرىك جارمۇحامەدوۆ، «التى جاسار الپامىس» فيلمىنىڭ ەكىنشى رەجيسسەرى:
قاليحاندى فۋتبول ويناپ ءجۇرىپ تاپقان
- «التى جاسار الپامىس» فيلمىنە قالاي كەلدىڭىز؟
- كەڭەس وداعى كەزىندە ماسكەۋدە كينوگەرلەر دايىندايتىن ينستيتۋت بار بولاتىن. ءساتى ءتۇسىپ، سوعان باردىم دا، ءبىر جىلدان كەيىن وندىرىستىك تاجىريبەگە قايتىپ كەلدىم. وعان دەيىن ابدوللامەن اندا- ساندا كارتا ويناپ جۇرەتىنمىن. ارا- قاتىناسىمىز جاقسى بولاتىن. قازىرگى قازاق كونسەرتتىڭ ۇلكەن زالىندا قازاق كينوسى قايناپ، ءپىسىپ جاتاتىن. كينوعا قاتىستى كىمدى ىزدەسەڭ دە سول جەردەن تاباتىنسىڭ. سوندا كەلدىم. ۇلكەن ءدالىزدىڭ ارعى بەتىندە شاكەن ايمانوۆ كەلە جاتىر ەكەن. ء«اي، بەرى كەل!» دەپ شاقىرىپ الدى دا، «امەريكادا سەنىڭ اعالارىڭدى كوردىم. نايماندار ەكەن. وتە باي ادامدار» دەدى. سول ءدالىزدىڭ ەكىنشى باسىنان ابدوللا كورىنىپ: «ەي، سارى الباستى! بەرى كەل» دەدى. باردىم. «ءبىر كينو باستايىن دەپ جاتىرمىن. ماعان ەكىنشى رەجيسسەرلىككە كەلەسىڭ بە؟» دەدى. بىردەن كەلىستىم. مەنى ماسكەۋدە وقىپ، ءبىلىمدى بولىپ كەلدى دەپ ويلاعان بولۋى كەرەك، بىردەن رەجيسسەرلىك سەناري جازۋدى تاپسىردى. وندا كامەرانىڭ قالاي جۇمىس ىستەيتىنى، قاي كەزدە كىمنىڭ سويلەيتىنى، كوستيۋمنىڭ قانداي بولاتىنى كورسەتىلەتىن. ءبىر- ەكى جەتىدە جازىپ اپارىپ ەدىم، ونشا ۇناتپادى. راسىمەن، ناشار بولاتىن. ءبىراق، سونىڭ نەگىزىندە بارلىعىمىز بىرگە قايتا جازىپ شىقتىق.
- اكتەرلەردى تاڭداعان كەزىندە ابدوللا اعانىڭ قاسىندا بولدىڭىز با؟
- سەناري بويىنشا الپامىس پەن قاليحان رولىنە دۇرىس تاڭداۋ جاساماسا فيلم ءوز دەڭگەيىنە جەتە الماي قالۋى ابدەن مۇمكىن ەدى. الپامىس دەنە ءبىتىمى شاعىن، ءالجۋاز، باتىل ءىس- ارەكەتكە بارمايتىن نازىك جاندى بالا. الپامىستىڭ رولىنە اسا قينالعان جوقپىز. وعان ەرمەك تولەپبايەۆتى تۇسىرەتىن بولدىق. ال قاليحاننىڭ رولىنە بالا ىزدەۋ وڭايعا تۇسكەن جوق. قالا ماڭىنداعى مەكتەپتەردى تۇگەل ارالاپ شىقتىق دەسەك بولادى. فوتو، كينوبايقاۋلار تۇسىردىك. بالا تابىلا قويمادى.
ءبىر كۇنى ابدوللا «بۇگىن كەتىپ قالما، كەشكە بالالارمەن دوپ وينايمىز» دەدى. قالانىڭ شەتىندەگى الاڭقايعا كەلدىك. بالالار ەكى جاققا ءبولىنىپ، فۋتبول ويناۋعا دايىن تۇر ەكەن. 10-12 جاس شاماسىنداعى بالالار. ابەكەڭ قاقپاشى بولدى، تاپەلتەكتەۋ مىعىم كەلگەن سارى بالاعا «ورتالىق قورعاۋشى بولاسىڭ» دەدى. ادەتتە قاقپاشى قورعاۋشىلارعا «انا شابۋىلشىنى وتكىزبە، مىنا شابۋىلشىعا ساق بول» دەپ ەسكەرتپەلەر جاساپ وتىرادى. ابەكەڭ جوباعا كەلمەيتىن نۇسقاۋ بەرسە كەرەك، ءبىر كەزدە جاڭاعى مىعىم بالا جەتىپ بارىپ، ەكى قولىن سەرمەپ- سەرمەپ جىبەردى. قاتۋلانىپ، ويىننىڭ زاڭىن بۇزعان قورعاۋشىنى جەپ قويا جازدادى. مىنەز دەگەن قانداي! ءبىز ىزدەگەن قاليحان وسى ەدى.
- ابدوللا اعانى بالا پسيحولوگياسىن جەتىك بىلەتىن رەجيسسەر رەتىندە باعالايدى. فيلم ءتۇسىرۋ بارىسىندا وسى باعانىڭ راستىعىنا كوزىڭىز جەتكەن كەز بولدى ما؟
- ءبىر كۇنى ابەكەڭ «ءتۇسىرۋدى جالعاستىرا بەرىڭدەر» دەدى دە، ءوزى كەتىپ قالدى. ءابىلتاي ەكەۋمىز قاليحاننىڭ مەكتەپتەن قايتىپ كەلە جاتقانىن تۇسىردىك. قايتارىندا ونى الپامىس قارسى الادى. الپامىستى ءىس ۇستىندە كورسەتەيىك دەدىك تە، اقىرعا ءشوپ سالدىرىپ قويدىق. اۋلانىڭ ءىشى، ءبىر مايا ءشوپ، بۋىنى قاتپاعان جاس بالا مىقشىڭداپ اتقا ءشوپ دايىنداپ جاتىر. قاليحان كەلگەندە قولىنداعى ايىرىن تاستاي سالىپ الدىنان شىعادى. وزىمىزشە قاتىردىق دەپ ويلادىق. ءبىراق ابەكەڭ كەلگەننەن كەيىن «قايتا تۇسىرەمىز» دەدى. قاليحاندى جانىنا شاقىرىپ، جەيدەسىنىڭ تۇيمەلەرىن ىلگەرىلى- كەيىندى سالىپ، قولىنداعى پورتفەلىن تىزەسىمەن تەپكىزىپ قويدى. مەكتەپكە مۇنتازداي بولىپ كەتكەن بالا اياق كيىمىن شەشىپ، موينىنا ءىلىپ الىپ كەلە جاتتى. تاپقىرلىق دەگەن وسى ەمەس پە؟ راسىمەن دە، قاليحانداي بالا مەكتەپتەن تىنىش قايتۋشى ما ەدى؟ ءفيلمنىڭ تۇسىرىلگەنىنە وتىز جىل وتسە دە، كورەرمەن ءدال وسى جەرىن كورگەندە ءبىر جەلپىنىپ قالادى.
داريعا تىلەنديەۆا، «التى جاسار الپامىس» فيلمىندەگى قاليحاننىڭ اناسى:
قاليحاننىڭ ومىردەن وتكەنىن ەستىگەندە جۇرەگىم اۋىردى
- قاليحاننىڭ اناسىنىڭ رولىنە قالاي بەكىتىلدىڭىز؟
- فيلم تالعار اۋدانىنىڭ رىسقۇلوۆ كولحوزىندا ءتۇسىرىلدى. قاليحان دەگەن بۇزىق بالانىڭ اناسىن وينادىم. فيلمگە تۇسەمىن دەپ ويلاعان جوق بولاتىنمىن. وعان دەيىن «قۇلاگەر»، «قىز جىبەك» فيلمدەرىندە قوسالقى رولدەردى سومداعانمىن. ابدوللا قارساقبايەۆتىڭ فيلمدەرىنىڭ بارلىعىنا مۋزىكانى نۇراعاڭ جازعان. بۇل فيلمگە دە نۇراعاڭ مۋزىكا جازاتىن بولعان سوڭ، باس تارتپادىم. فيلم الما، ورىكتىڭ پىسكەن ۋاقىتى تامىلجىپ تۇرعان جاز ايلارىنىڭ بىرىندە ءتۇسىرىلدى. توپتاعى اكتەرلەر جاقسى بولسا ءفيلمنىڭ قالاي بىتكەنىن بىلمەي قالۋشى ەدىك. بىزدە قىس ءتۇسىپ كەتتى دە ءفيلمنىڭ جالعاسى تاجىكستاندا ءتۇسىرىلدى.
- فيلم بارىسىندا قانداي دا ءبىر قىزىق وقيعا ورىن الدى ما؟
- ەسىمدە ەرەكشە قالىپ قويعان ءبىر وقيعا بار. ءتۇسىرىلىم ءجۇرىپ جاتقان كەز بولاتىن. ەرتەڭ العاشقى قوڭىراۋ، بالالاردىڭ مەكتەپكە باراتىن كۇنى. قاليحاندى اناسى ەكى شەلەك بەرىپ، سۋعا جۇمسايدى. ويىن بالاسى شەلەكتى داڭعىرلاتىپ بارىپ، سۋ باسىنان الپامىستى كورىپ ويناپ كەتەدى. اناسى ءبىر جاعىنان كىر جۋىپ جاتادى. سۋ بولسا جوق. ءبىراز ۋاقىت وتكەن سوڭ ەكى شەلەك سۋدى الىپ كەلە جاتقان قاليحانعا ۇرسامىن دەپ، «قايدا ءجۇرسىڭ؟!» دەپ ايقاي سالىپ، ۇمتىلىپ ۇرايىن دەگەنىمدە وماقاسا قۇلادىم. بالا قاشىپ كەتتى. بۇكىل دەنەمدى، اياعىمدى اۋىرتىپ الدىم. ەسەسىنە ابدوللا اعا ريزا بولدى. ول كىسىگە كەرەگى سول ەدى. «كەرەمەت كادر بولدى» دەدى. سول سيۋجەت فيلمدە شىقتى. ال مەنىڭ بىرنەشە كۇنگە دەيىن بۇكىل دەنەم اۋىرىپ ءجۇردى. ەڭبەگىمىز اقتالدى، فيلم ءساتتى شىقتى. ماسكەۋدە ءبىر جىلعا تاياۋ ۋاقىت ەكراننان تۇسپەپتى.
- ابدوللا اعانىڭ رەجيسسەرلىگىنە بەرەر باعاڭىز قانداي؟
- ابدوللا اعا - ناعىز شىعارماشىلىقتىڭ ادامى ەدى. ءبىراق ول كىسىگە قيانات كوپ جاسالدى. ابدوللا اعا ءبىر كينوفەستيۆالدە رادج كاپۋرمەن كەزدەسىپتى. ەكەۋى تانىسىپ، دوستاسىپ كەتەدى. رادج كاپۋر ابدوللا اعانىڭ فيلمدەرىنە ريزا بولادى. كەلەسى ءبىر فەستيۆالدە ابدوللا اعانىڭ جولى كەس-كەستەلىپ، قولى جەتكەن باسقا بىرەۋ بارادى. رادج كاپۋر بىردەن ءوزىنىڭ ەسكى دوسىن سۇرايدى. سويتسە، بىزدەن بارعان ادام اۋزى-باسى قيسايماي «ابدوللا قايتىس بولعان» دەپتى. انا كىسى قاتتى قايعىرىپ «قانداي رەجيسسەر ەدى... قانداي تالانت!» دەپ وكىنىش ءبىلدىرىپ قالا بەرىپتى. كەلەسى ءبىر فەستيۆالگە ابدوللا دا بارادى، سويتسە رادج كاپۋر قۇشاقتاي الىپ «سەنى قايتىس بولدى دەپ ەدى عوي» دەگەن ەكەن. ابدوللا اعاعا بۇل وقيعا دا وڭاي تيمەيدى.
- فيلمدەگى ۇلىڭىز قاليحانمەن كەيىن ارالاسىپ تۇردىڭىز با؟
- فيلمنەن كەيىن ارالاسا المادىق. كەيىن ىزدەستىرىپ كورىپ ەدىم، قايتىس بولىپ كەتكەنىن ەستىدىم. جانىپ تۇرعان بالا ەدى عوي. ومىردەن وتكەنىن ەستىگەندە جۇرەگىم اۋىردى. جىگىت بولعانىن كورسەم دەۋشى ەدىم...
madeniportal.kz
