بۋرابايدا «بوتاي» مادەني- تاريحي مۋزەيىنىڭ ۆيزيت ورتالىعى اشىلدى
«قازاقستاننىڭ كيەلى جەرلەرىنىڭ گەوگرافياسى» جوباسى شەڭبەرىندە بۋرابايداعى جەكەباتىر تاۋىنىڭ باۋرايىنداعى اقىلباي ورمان شارۋاشىلىعى اۋماعىندا سالىنعان ۆيزيت ورتالىقتىڭ اشىلۋى راسىمىنە ق ر اقپارات جانە كوممۋنيكاتسيالار ءمينيسترى داۋرەن ابايەۆ، اقمولا وبلىسىنىڭ اكىمى مالىك مىرزالين جانە جوبانىڭ اۆتورلارىنىڭ ءبىرى تاريح عالىمدارىنىڭ دوكتورى، ارحەولوگ، بوتاي مادەنيەتىن اشقان ۆيكتور زايبەرت پەن «EQUUS» كوركەم كينوتريلوگياسىنىڭ پروديۋسەرى نۇربول بايمۇحانوۆ قاتىستى.
بوتاي مادەنيەتىنە ءتان نىسان سول داۋىردەگى جەتى باسپانادان تۇرادى. ءار باسپانانىڭ ديامەترى 8-10 مەتردى قۇرايدى. ۇيلەردىڭ جەرتولەلەرى ءبىر مەتر تەرەڭدىكتە، ال جوعارى جاعى اعاشتان قيىلىپ سالىنعان. توبەسى ءشوپ، تەرى، بالشىق جانە سابانمەن جابىلعان. بارلىق ۇيلەر جەراستى جولى ارقىلى ءبىر- بىرىمەن جالعاسادى. ءار ءۇيدىڭ سول كەزەڭگە ساي وزىندىك ەرەكشەلىكتەرى بار. بىرەۋىندە قارۋ- جاراق ساقتالسا، ەكىنشىسىندە سول كەزدەگى كاسىپ پەن ۇلتتىق تاعامدار ازىرلەۋ تاسىلدەرى كورسەتىلگەن. كەلگەن ادام ەسكى داۋىرگە ساپار شەككەندەي اسەردە بولادى
قۇرىلىس جۇمىستارى اينالاسى ەكى ايدىڭ ىشىندە جۇزەگە اسىرىلدى. نىسانعا جول- ينجەنەرلىك كوممۋنيكاتسيا جۇيەلەرى دە تارتىلعان ەكەن. جوبا ق ر اقپارات جانە كوممۋنيكاتسيا مينيسترىلىگىنىڭ باستاماسىمەن اقمولا وبلىسى اكىمدىگىنىڭ قولداۋىمەن جۇزەگە اسىرىلىپ وتىر.
ۆيكتور زايبەرتتىڭ سوزىنە قاراعاندا، ءبىزدىڭ داۋىرىمىزگە دەيىنگى 6 مىڭ جىلدىقتا قازىرگى اقمولا، سولتۇستىك قازاقستان، پاۆلودار جانە قوستاناي وبلىستارى اۋماعىندا ۇلكەن تاريحي وقيعالار ورىن العان.
«ءدال وسى جەرلەردە ات- كولىكتىك كوممۋنيكاتسيا ءداۋىرى قالىپتاسىپ، دالالىق وركەنيەت باستاۋ العان. مۇنىڭ بارلىعى كونە بوتاي مادەنيەتىمەن بايلانىستى. بۇگىن اشىپ وتىرعان اشىق اسپان استىنداعى تەڭدەسىز مۇراجاي سونىڭ ايقىن ءبىر كورىنىسى. كەلەشەكتە تۋريستەر بۇل جەردە بوتاي مادەنيەتىمەن تانىسىپ قانا قويمايدى، قازاقستان تاريحى مەن كونە وركەنيەت تۋرالى دا قۇندى ماعلۇماتتار الادى»، - دەيدى ۆيكتور زايبەرت.
اۆتور: اسلان وسپانوۆ
