يلحام اليەۆ: استاناعا كەلگەن سايىن ساۋلەتتىڭ تىڭ شەشىمدەرى تاڭداي قاقتىرادى

استانا. قازاقپارات - ازەربايجان رەسپۋبليكاسىنىڭ پرەزيدەنتى يلحام اليەۆ استانا ارقىلى تاۋەلسىز قازاقستاننىڭ جاڭا سيمۆولى پايدا بولعانىن تىلگە تيەك ەتتى، دەپ حابارلايدى قازاقپارات ءتىلشىسى.

«استاناعا كەلگەن سايىن دامۋدىڭ قارقىندىلىعىن بايقايمىن. ءبىر قاراساڭىز، قالا تۇرعىندارىنا جايلى جاعدايدىڭ، ساۋلەتتىك دامۋ تۇرعىسىنان ءبارى جاسالعان سەكىلدى دەپ ويلاپ قاراپ وتىرساڭ دا، كەلگەن سايىن استانا جاڭا جوبالارىمەن، جاڭا ساۋلەتتىك شەمىمىمەن، دامۋدىڭ جاڭا باعىتتارىمەن تاڭداي قاقتىرادى. سوندىقتان، استانا - زاماناۋي ءارى تابىستى قالا قۇرىلىسىنىڭ جارقىن ۇلگىسى بولىپ تابىلادى. بۇل جەردە ساۋلەتتىك شەشىمدەر ينفراقۇرىلىمدىق شەشىمدەرمەن ۇشتاسىپ جاتىر. سول سەبەپتى، قالا تۇرعىندار ءۇشىن وتە ىڭعايلى. استاناعا كەلگەندەردىڭ بارىنە وتە جايلى شاھار. قالانىڭ دامۋىنا قازاقستان باسشىلىعى زور ماحابباتپەن قارايتىنى كورىنىپ تۇر»، - دەيدى يلحام اليەۆ «حابار» ارناسىنداعى ەرلان بەكحوجيننىڭ «ۇلى دالانىڭ استاناسى» اتتى دەرەكتى فيلمىندە.

ازەربايجان پرەزيدەنتىنىڭ ايتۋىنشا، 20 جىل بۇرىن قازاقستاننىڭ ەكونوميكالىق الەۋەتى قازىرگىدەي بولماعان. ول شاق - ءىرى ەكونوميكالىق رەفورمالاردىڭ كەزەڭى بولعان. سوندىقتان، استانانىڭ كوشىرۋ تۋرالى باستاما ۇلكەن ەرلىكتى جانە اقىلدى تالاپ ەتكەن.

«قالا بوس جاتقان اۋماقتا تۇرعىزىلدى. مەن استانانىڭ ىرگەسىنىڭ قالانۋ كەزەڭىن بىلەمىن. البەتتە، بۇل وراسان زور كۇش- جىگەردى جانە ادامي، قارجىلىق رەسۋرستاردى تالاپ ەتكەن. استانانى كوشىرۋ تۋرالى شەشىمدى كوپتەگەن ادامدار كۇتپەگەن دە ەدى. ءبىراق، ءومىردىڭ ءوزى كورسەتىپ وتىرعانداي، بۇل وتە ءساتتى شەشىم بولدى. ويتكەنى، زامانعا ساي الشاڭ باسىپ كەلە جاتقان الىپ شاھار تۇرعىزىلدى»، - دەيدى ول.

يلحام اليەۆتىڭ سوزىنە سايكەس، استانانىڭ دامۋى ءجۇز مىڭداعان جۇمىس ورىندارىن اشۋعا مۇمكىندىك بەرگەن.

«قالاداعى قۇرىلىس قارقىنى قۇرىلىس ماتەريالدارىنىڭ يندۋسترياسىنىڭ جانە ينجەنەريانىڭ دامۋىن قامتاماسىز ەتتى. دەمەك، ەلوردا ءوزىنىڭ سوڭىنان دامۋدىڭ داڭعىلىن الىپ كەلە جاتقان ەدى. سوندىقتان، شەشىم استە قاراپايىم ەمەس ءارى دۇرىس بولدى. ۇلكەن شىعىندارعا قاراماستان، ەكونوميكالىق تۇرعىدان ءوزىن تولىعىمەن اقتادى دەپ ايتا الامىن. دامۋدىڭ جاڭا قىرلارىن كورسەڭ، ءاردايىم وزىڭە دە سىڭىرگىڭ كەلىپ تۇرادى. استانانىڭ تاجىريبەسىن، ەڭ الدىمەن جوسپارلاۋدىڭ دۇرىس ءادىسىن زەرتتەي وتىرىپ، استانانىڭ ساۋلەتى وتە ۇلكەن قىزىعۋشىلىقتى تۋدىرىپ وتىرعانىن بايقاۋعا بولادى. ونەر تۋىندىسىنداي - قالا ۇلكەن ماحابباتپەن جانە تىلەكپەن تۇرعىزىلعان. ءاۋ باستا مەنىڭشە، استانا تۇرعىزىلار كەزدە تاۋەلسىز قازاقستاننىڭ جاڭا سيمۆولىن قالىپتاستىرۋ كوزدەلگەن سەكىلدى. مىنە، بۇل ماقساتقا قول جەتكىزىلدى»، - دەيدى يلحام اليەۆ.

ايتا كەتسەك، ەرلان بەكحوجيننىڭ «ۇلى دالانىڭ استاناسى» اتتى دەرەكتى فيلمىندە پوستكەڭەستىك ەلدەردىڭ باسشىلارى قازاقستان پرەزيدەنتى نۇرسۇلتان نازاربايەۆ پەن استانا قالاسى تۋرالى وزدەرىنىڭ وي-پايىمدارىمەن بولىسكەن.