تاتارستان پرەزيدەنتى قازاقستانداعى تاتارلارمەن كەزدەستى

استانا. قازاقپارات - تاتارستان پرەزيدەنتى رۋستام ميننيحانوۆ قازاقستانداعى تاتار جانە باشقۇرت كونگرەسىنىڭ اكتيۆىمەن كەزدەستى، دەپ حابارلايدى قازاقپارات ءتىلشىسى.

كەزدەسۋ «تاتارستان - جاڭا عاسىر» تەلەراديوكومپانياسىنىڭ كوررەسپوندەنتتىك پۋنكتىنىڭ قازمەديادا وتكەن اشىلۋ سالتاناتىنان كەيىن بولدى. ت ر ۆيتسە-پرەمەرى، تاتارلاردىڭ دۇنيەجۇزىلىك كونگرەسىنىڭ «ميللي شۋرا» ۇلتتىق كەڭەسىنىڭ ءتوراعاسى ۆاسيل شايحرازيەۆ مودەراتور رەتىندە ءسوز سويلەدى.

قازاقستانداعى تاتار جانە باشقۇرت كونگرەسىنىڭ باسشىسى، قازاقستان حالقى اسسامبلەياسى كەڭەسىنىڭ مۇشەسى، تاتارلاردىڭ دۇنيەجۇزىلىك كونگرەسىنىڭ «ميللي شۋرا» ۇلتتىق كەڭەسىنىڭ ءتوراعاسى تاۋفيك كاريموۆ پرەزيدەنت رۋستام ميننيحانوۆكە قازاقستانداعى تاتارلار قاۋىمداستىعىنىڭ دامۋى تۋرالى باياندادى.

«قازاقستان پرەزيدەنتى نۇرسۇلتان نازاربايەۆتىڭ جانە ءسىزدىڭ تاتارستانعا جاساعان ساپارلارىڭىز استانا مەن قازان اراسىنداعى ەكونوميكالىق جانە مادەني ىنتىماقتاستىقتى دامىتۋعا زور ىقپالىن تيگىزەدى. قازاقستانداعى تاتار حالقىنىڭ اتىنان استانادا اشىلعان «ت ج ع» كوررەسپوندەنتتىك پۋنكتى ءۇشىن العىسىمدى بىلدىرەمىن. ءبىز وسى ماقساتتا بىلتىر تامىز ايىندا سىزگە تالدىقورعاندا ءوتىنىش بىلدىرگەن ەدىك. ال ەندى استانانىڭ 20 جىلدىعىنا وراي جەكە قاتىسۋىڭىزبەن سالتاناتتى اشىلۋ ءراسىمىن تاماشالاپ وتىرمىز. رەسەيدەن تىس جەردەگى ت ج ع- نىڭ العاشقى كوررەسپوندەنتتىك پۋنكتى اقپارات تاراتۋ سالاسىنا زور ۇلەسىن قوسىپ، ۇلتتار اراسىنداعى دوستاستىقتى نىعايتادى. وندا كورسەتىلەتىن باعدارلامالار تەك تاتار حالقىنا ەمەس، قازاقتار ءۇشىن دە قىزىقتى بولادى. سەبەبى ءبىزدىڭ ءدىنىمىز دە، ءداستۇرىمىز دە، ءتىلىمىز دە - ءبىر»، - دەدى ت. كاريموۆ.

ونىڭ ايتۋىنشا، ءدال قازىر قازاقتاردىڭ دۇنيەجۇزىلىك قاۋىمداستىعى مەن تاتارلاردىڭ دۇنيەجۇزىلىك قاۋىمداستىعى اراسىندا، سونداي- اق، ەكى ەلدىڭ ىرگەلى اقپاراتتىق اگەنتتىكتەرى - قازاقپارات جانە تاتار-اقپارات اراسىندا مەموراندۋمعا قول قويۋ بويىنشا جۇمىستار اتقارىلىپ جاتىر.

كەزدەسۋگە قازاقستان تاراپىنان قازاقستان حالقى اسسامبلەياسىنىڭ ءتوراعا ورىنباسارى يسلامبەك سالجانوۆ، قازاقتاردىڭ دۇنيەجۇزىلىك قاۋىمداستىعىنىڭ ءتوراعا ورىنباسارى ارعىن وسپانوۆ، «قازاقپارات» حالىقارالىق اقپارات اگەنتتىگىنىڭ باس ديرەكتورى اسقار وماروۆ، قازانداعى ق ر باس كونسۋلى ەركىن تۇقىموۆ قاتىستى. شارا بارىسىندا تاتارستاننىڭ قازاقستانداعى جاڭادان تاعايىندالعان ۋاكىلەتتى وكىلى دەنيس ۆالەيەۆ تانىستىرىلدى.