كەروسيندى ءوزىمىز شىعارساق، ۇشاق بيلەتتەرى ارزانداي ما
اتالعان ۇيىمنىڭ ورتالىق ازيا بويىنشا ايماقتىق مەنەدجەرى دجوردان قارامالاقوۆتىڭ ايتۋىنشا، بۇگىندە وتاندىق اۋە كومپانيالارىنا جىل سايىن 600-650 مىڭ توننا كەروسين كەرەك. الايدا قازاقستان اتالعان سۇرانىستىڭ تەك 50 پروتسەنتىن، شامامەن 300 مىڭ استام توننانى عانا وندىرەدى. قالعانى سىرتتان جەتكىزىلەدى. «نەگىزى، سۇرانىستىڭ وسەتىنىن دە ەسكەرۋ كەرەك. بيىل 650 مىڭ توننا كەرەك بولسا، كەلەسى جىلى 700 مىڭ توننا قاجەت بولادى. سەبەبى اۆياتسيا ءوسىپ كەلەدى. قازاقستان سياقتى مەملەكەتتەردە اۆياتسيا جىل سايىن 10 پروتسەنتكە ءوسىپ تۇرادى. سوندىقتان كەروسينگە دەگەن سۇرانىس دا ارتا تۇسەدى. وسىنى ەسكەرۋ كەرەك» ، - دەدى ج. قارامالاقوۆ قازاقپارات تىلشىسىنە بەرگەن سۇحباتىندا.
ساراپشىنىڭ ايتۋىنشا، قازاقستان كەروسيندى ءوز كۇشىمەن كوپتەپ شىعارسا، جاڭا ۇلگىدەگى ءونىمدى ساقتاۋ ماسەلەسىن دە ەسكەرۋ كەرەك. ال اۋەجايلار وعان دايىن ەمەس. قازىرگى كەزدە ساقتاۋ قويمالارى تس-1 ۇلگىسىندەگى كەروسينگە ارنالعان. ال جاڭا ۇلگىدەگى Jet A-1- ءدى ساقتاۋ شارتتارى وزگەشە. «جوسپار بويىنشا ءونىم وندىرۋشەلەر Jet A-1- ءدى شىعارۋعا كوشەدى. دەمەك، تۇتىنۋشىلار، ياعني اۋەجايلار دا جاڭا ستاندارتتارعا كوشۋى ءتيىس. ازىرشە، اۋەجايلار ونداي كەروسيندى ساقتاۋعا دايىن ەمەس. دەمەك، جانار- جاعار ماي بولادى. ءبىراق ونى ەشكىم ساقتاي المايدى. بۇنداي ستسەنارييمەن كەتە بەرسەك، قيىن بولادى» ، - دەپ اتاپ كورسەتتى ج. قارامالاقوۆ.
Jet A-1 ءۇشىن اۋەجايلار ساقتاۋ قويمالارىن كەڭەيتىپ قانا قويماي، قۇبىرلار جۇيەسىن وزگەرتىپ، جاڭا ۇلگىدەگى كەروسيندى باقىلاۋ زەرتحانالارىن ارنايى قۇرال- جابدىقتارمەن قامتاماسىز ەتۋى كەرەك. وعان دا ءبىراز اقشا كەتەدى.
«ءدال وسى ماسەلەلەردى شەشۋدىڭ ناقتى جوسپارى جوق. مەنىڭشە، مەملەكەت دەڭگەيىندە جوسپار بولۋى قاجەت. اتالعان قۇجاتتا قويمالاردى جاڭارتۋ مەرزىمى، شىعىندار جانە سول شىعىنداردى وتەۋ جاعىن ەسكەرگەنىمىز ءجون. ونسىز اۋەجايلار قاتتى شىعىندالادى. ال ونداي شىعىن كوپ بولسا، بيلەتتىڭ باعاسى وزگەرەدى. ويتكەنى بيلەت باعاسىنىڭ 30 پروتسەنتى - ول كەروسيننىڭ باعاسى» ، - دەيدى دج. قارامالاقوۆ.
