نۇرسۇلتان نازاربايەۆ ءابۋ ءدابيدىڭ مۇراگەر حانزاداسىنا اكەسى تۋرالى كىتاپتى سىيعا تارتتى
«كەلگەنىڭىزگە وتە قۋانىشتىمىن. مەنىڭ ساپارىم ناۋرىزدا بولدى، ىلە-شالا كەلدىڭىز. ءسىزدىڭ اكەڭىزدىڭ 100 جىلدىعى ەلىڭىزدە تويلانىپ جاتىر، ءىس- شارالارىڭىز كوپ. سوعان قاراماي مەنىڭ شاقىرۋىمدى قابىل الىپ كەلدىڭىز، ريزامىن. قاشان بولسا دا بىزدەگى مەرەكەلەردىڭ بارلىعىنا قاتىساسىز»، - دەپ اتاپ ءوتتى كەلىسسوزدەر بارىسىندا ەلباسى.
نۇرسۇلتان نازاربايەۆ الماتى مەن استانادا وتكەن قىسقى ۋنيۆەرسيادادا ويىندارىنا شەيح مانسۋر، ال ازيا ويىندارىنا شەيح مۇحاممەدتىڭ قاتىسقانىن اتاپ ءوتتى. بىرىككەن اراب امىرلىكتەرىنە فورۋمدارعا قاتىسۋ ءۇشىن بارىپ تۇراتىندىعىن ەسكە سالدى.
«ءسىزدىڭ اكەڭىز مارقۇم بەن زايدپەن كەزدەسىپ ەدىم. وتە كەمەڭگەر، مەيىرىمدى ادام ەدى. ماعان زور ىلتيپاتپەن، اكەلىك مەيىرىممەن قاراعان ەدى. ءبىز ول كىسى تۋرالى كىتاپ شىعاردىق. سونى سىزگە تابىس ەتكىم كەلىپ وتىر»، - دەگەن نۇرسۇلتان نازاربايەۆ ءابۋ دابيدىڭ مۇراگەر حانزاداسىنا كىتاپتى سىيلادى. سونىمەن قاتار مەملەكەت باسشىسى شەيح مۇحاممەد بەن زايد ءال ناحاياندى استانانىڭ 20 جىلدىعى مەرەيتويلىق مەدالىمەن ماراپاتتادى.
