اقتوبەلىك جاس ديزاينەر تۇركيادا وتكەن فەستيۆالدە باس جۇلدەنى جەڭىپ الدى

اقتوبە. قازاقپارات - اقتوبەلىك ديزاينەر ءسابينا جانزاقوۆا تۇركيادا وتكەن فەستيۆال كەزىندە ۇلتتىق كيىم ۇلگىلەرىن ساحناعا الىپ شىعىپ، باس جۇلدەنى جەڭىپ الدى، دەپ حابارلايدى قازاقپارات ءتىلشىسى.

ءسابينا جانزاقوۆا تەك ۇلتتىق ناقىشتاعى كيىم ۇلگىلەرىن تىگىپ، شەتەلدىك بايقاۋلارعا، فەستيۆالدەرگە قاتىسىپ ءجۇر. قازاقتىڭ سالت-ءداستۇرى مەن ۇلتتىق ەرەكشەلىگىن تانىتۋعا ۇلەس قوسىپ جۇرگەن جاس سانگەر بۇل جولى تۇركيانىڭ كەمەر قالاسىندا وتكەن بالالار جانە جاسوسپىرىمدەر شىعارماشىلىعىنىڭ حالىقارالىق فەستيۆالىندە توپ جاردى. بارلىعى 15 ەلدەن 25 شىعارماشىلىق ۇجىم قاتىسقان فەستيۆالدە اقتوبە باس جۇلدەنى جەڭىپ الدى.

«بالالار مەن جاسوسپىرىمدەرگە ارنالعان ۇلتتىق كيىمدى تىگۋ ءۇشىن 2-3-اي ۋاقىت كەتتى. مەن ءۇشىن بارىنەن ۇلتتىق كيىمدەرىمىزدى شەتەلدىكتەرگە تانىستىرۋ ماڭىزدى. سەبەبى، وزگە ەلگە بارعاندا قازاقتى تانىتاتىن، ونىڭ ەرەكشەلىگىن پاش ەتەتىن كيىمىمىز، ونەرىمىز. «كۇنكەي» دە وسى باعىتتى نىق ۇستانىپ، تۇركيادا ۇلتتىق كيىمدى دامىتۋعا قوسقان ۇلەسىمىز جانە بيدە «سوعىسسىز الەم» قويىلىمىن شەبەر ورىنداعانىمىز ءۇشىن ديپلوممەن ماراپاتتالدى. «ناۋرىز» اتتى دەفيلە گران-پريدى يەلەنىپ، Ⅲ حالىقارالىق فەستيۆالدىڭ باستى سىيى اقتوبەگە بۇيىردى. ءبىزدى ساحناعا شىعارىپ، ۇلتتىق كيىم تۋرالى جان- جاقتى سۇرادى. قاي ۇلتتىق كيىمدى قاي ۋاقىتتا كيۋگە بولاتىنى دا قىزىقتىردى»، - دەدى جاس سانگەر ءسابينا جانزاقوۆا.