شەتەلدىك ينۆەستورلار قازاقستانعا نە ءۇشىن قىزىعادى
بۇگىن استانادا ءوتىپ جاتقان Kazakhstan Global Investment Roundtable جاھاندىق ينۆەستيتسيالار جونىندەگى دوڭگەلەك ۇستەل - ءوز كەزەگىندەگى ەكىنشى وتىرىس. العاشقىسى وتكەن جىلدىڭ جەلتوقسانىندا ءوتىپ، قازاقستان الەمدىك ءىرى كومپانيالاردى جيناپ، «شەتەلدىك ينۆەستورلارعا نە ۇسىنا الامىز، قانداي مۇمكىندىكتەر بار» دەگەن سۇراقتاردى تالقىلاپ، سونىڭ ناتيجەسىندە قازاقستاننىڭ العاشقى ينۆەستيتسيالار ستراتەگياسى قابىلدانعان بولاتىن.
اراعا التى اي سالىپ، حالىقارالىق كومپانيالاردىڭ باسىن قايتا قوسقان ءىس- شارادا ناقتى ينۆەستيتسيالاردى تارتۋ ماسەلەسى قارالۋدا. اتالعان مەرزىمنىڭ ىشىندە شەتەلدىك كومپانيالار قازاقستاننىڭ ىشكى جانە سىرتقى نارىعىن تانىپ ءبىلدى. قازاقستان ءوز تاراپىنان 6 ايدىڭ ىشىندە باسىم دەپ تانىلعان 11 مەملەكەتتىڭ كومپانيالارىنا تانىستىرىلىم جاسادى.
بۇگىنگى شاراعا 300 دەي الەمدىك كومپانيا كەلەدى دەپ كۇتىلگەن، ناتيجەسىندە 40 ەلدەن 600 دەن استام ءىرى كومپانيا باسشىلارى، جالپى سانى 1000 نان استام ادام قاتىسۋدا.
«وسىنشاما ءىرى ينۆەستورلاردىڭ بىزگە كەلۋىنىڭ ءبىرىنشى سەبەبى - قازاقستاننىڭ نارىعى. وسىدان 10 جىل بۇرىن ءبىزدىڭ نارىق ولار ءۇشىن ازدىق ەتەتىن. بۇگىندە نارىق اشىق جانە ەركىن، بۇل ءبىزدىڭ ە ە و- عا (ەۋروپالىق ەكونوميكالىق وداق) كىرۋىمىزدىڭ ارقاسىندا مۇمكىن بولدى. ودان بولەك، قىتايمەن جۇرگىزىلگەن جۇمىستاردىڭ ناتيجەسىندە جىبەك جولى باعدارلاماسىنا سايكەس ينفراقۇرىلىم مەن لوگيستيكا دامۋدا. ياعني ءوندىرىس بولسا، بيزنەس بولسا قازاقستاننىڭ نارىعى - ولار ءۇشىن تاپتىرماس پايدا كوزى. ەكىنشى سەبەپ، قازاقستانعا سالىنعان ينۆەستيتسيانىڭ كەپىلدىگى مەن قاۋىپسىزدىگى. بۇعان دالەل - دۇنيەجۇزىلىك بانكتىڭ رەيتينگىندە ءبىز 36- ورىندامىز، بۇل ۇلكەن كورسەتكىش جانە دە ءبىزدى وەسر (ەكونوميكالىق ىنتىماقتاستىق جانە دامۋ ۇيىمى) ينۆەستيتسيالار كوميتەتىنە مۇشە رەتىندە قابىلدادى. بۇل ءوز كەزەگىندە قازاقستاندا ىشكى رەفورمالار مەن زاڭنامالاردىڭ رەتتەلگەنىن كورسەتەدى» ، - دەدى Kazakh Invest ۇ ك ا ق باسقارما ءتوراعاسى ساپاربەك تۇياقبايەۆ.
سونىمەن قاتار Kazakh Invest باسشىسى دوڭگەلەك ۇستەل اياسىندا بىرنەشە شەتەلدىك كومپانيامەن جالپى سوماسى 4,7 ميلليارد دوللاردى قۇرايتىن 32 مەموراندۋمعا قول قويىلعانىن جانە ول مەموراندۋمدار مۇناي، قۇرىلىس، ساۋدا، IT، تاماق ونەركاسىبى، فارماتسيەۆتيكا جانە تاعى باسقا سالالاردى قامتيتىنىن ايتتى.
ايتا كەتەيىك، اتالعان جوبالاردىڭ بارلىعى كەلەسى جىلدان باستاپ جۇزەگە اسىرىلادى. ودان بولەك، استانادا حالىقارالىق قارجى ورتالىعىن اشۋ جوسپارلانۋدا. ورتالىقتىڭ بازاسىندا بريتاندىق تاسىلمەن جاڭا سوت جۇيەسى قۇرىلىپ، بۇل ءوز كەزەگىندە قازاقستانعا كەلگەن جانە كەلەتىن ينۆەستورلاردىڭ قاۋىپسىزدىگى مەن ەركىن جۇمىس ىستەۋىنە مۇمكىندىك بەرەدى.
