قازاقستاندىق ءونىم شىعارا الاتىن شەتەلدىك جاستارعا جاعداي جاسالادى - ۇكىمەت باسشىسى
بۇل تۋرالى بۇگىن استانادا ءوتىپ جاتقان Kazakhstan Global Investment Roundtable جاھاندىق ينۆەستيتسيالار جونىندەگى «دوڭگەلەك ۇستەل» بارىسىندا ق ر پرەمەر-ءمينيسترى باقىتجان ساعىنتايەۆ ايتتى، دەپ حابارلايدى قازاقپارات ءتىلشىسى.
«ەلىمىزدىڭ كوشى-قون ساياساتى وزگەرۋدە. بۇرىندارى ءبىز بارىنشا جابىق بولدىق جانە تالاپتارىمىز دا قاتاڭ ەدى. ال بۇگىندە تەحنولوگيالاردىڭ وزگەرىپ جاتقانىن جانە سول جوعارى تەحنولوگيالارمەن جۇمىس ىستەي الاتىن مامانداردىڭ كەرەك ەكەنىن تۇسىنەمىز. قىسقا عانا ۋاقىتتىڭ ىشىندە ءوزىڭنىڭ كادرلارىڭدى دايىنداپ شىعارۋ دا وتە قيىن. بەلگىلى ءبىر ۋاقىت قاجەت. سوندىقتان دا بۇگىندە بىزگە بىلىكتىلىگى جوعارى ماماندار قاجەت ەكەندىگىن ايتۋدامىز. ولار ءۇشىن ءبىزدىڭ ەسىگىمىز اشىق. قازىرگى ۋاقىتتا بۇكىل الەمدە تالانتتار ءۇشىن تالاس ءجۇرىپ جاتىر. ال ءدال سول كەزدە ەسىگىمىزدى جاۋىپ الىپ وتىرساق، بۇل دا دۇرىس بولمايدى»، - دەدى ۇكىمەت باسشىسى.
ونىڭ ايتۋىنشا، قازاقستان بىلىكتىلىگى جوعارى كادرلاردى قابىلداۋعا جانە ينۆەستورلارمەن بىرگە جەرگىلىكتى قىزمەتكەرلەردى قوسا العاندا ماماندار دايىنداۋعا ءازىر.
«ءبىز حالىقارالىق IT Startup Hub قۇرىلعانىن جاريا ەتتىك. ول دا «استانا» حالىقارالىق قارجى ورتالىعى سياقتى بۇرىنعى ەكسپو اۋماعىندا ورنالاساتىن بولادى. ونى تاياۋ ارادا ىسكە قوسامىز جانە تالابى زور جاستار ەلىمىزگە كەلۋى ءۇشىن بارلىق جاعداي جاسايمىز. گرانتتار، جۇمىس ورىندارى مەن باسپانا ۇسىناتىن بولامىز. ەڭ باستىسى ولار ءوز يدەيالارىمەن ەلىمىزگە كەلىپ، سول يدەيالارىن قازاقستاندىق ءونىم رەتىندە جۇزەگە اسىرۋى ءتيىس»، - دەدى باقىتجان ساعىنتايەۆ.
