اسەت يسەكەشيەۆ ءمىنسىز قالانىڭ باستى شارتتارىن اتادى

استانا. قازاقپارات - استانادا جىبەك جولى قالا مەرلەرى فورۋمىنىڭ پلەنارلىق ءماجىلىسى باستالدى. سول جەردە استانا قالاسىنىڭ اكىمى اسەت يسەكەشيەۆ ءمىنسىز قالانى قۇرۋدىڭ باستى تالاپتارى تۋرالى ايتىپ بەردى، دەپ حابارلايدى قازاقپارات ءتىلشىسى.

«ءسوز جوق، بولاشاقتا ۋربانيزاتسيا كۇشەيە تۇسەدى. ال ءىرى مەگاپوليستەردىڭ ءرولى ارتادى. ونى تانىمال ساراپشىلار دا راستاپ وتىر. ماسەلەن، شۆەد عالىمدارىنىڭ بولجامى بويىنشا، 50 جىلدان كەيىن 218 مەملەكەت ەمەس، 600 قالا ەكونوميكالىق تۇرعىدا بەلسەندى بولادى. وسىلايشا، قالالار جەلىسى جاڭا الەمنىڭ ساياسي- ەكونوميكالىق قاڭقاسىنا اينالادى. ءىرى قالالار ەكونوميكانىڭ باستى قوزعاۋشى كۇشى بولادى»، - دەيدى ءا. يسەكەشيەۆ.

ونىڭ ايتۋىنشا، 2050 -جىلعا قاراي قازاقستان حالقىنىڭ 70 پروتسەنتى قالادا تۇرادى. سول سەبەپتى قالالاردى دامىتۋ ماسەلەسىنە باسا نازار اۋدارىلىپ كەلەدى.

«ارينە، ونداي قالالار الەمدىك ترەندتەرگە ساي بولۋى كەرەك. سول سەبەپتى ءبىز ونداي قالالاردى قۇرۋ تاجىريبەسىن جان- جاقتى زەرتتەپ كەلەمىز. ولاردى ءارقالاي اتايدى. مەگاقالالار، جاھاندىق قالالار، greenfield citіes, new global cities  دەيدى. بۇنداي قالالار ءوز ەلىنىڭ عانا ەمەس، تۇتاس ءبىر ايماقتىڭ درايۆەرىنە اينالادى. ماسەلەن، تاياۋ شىعىستا - دۋباي مەن ابۋ- دابي، وڭتۇستىك- شىعىس ازيادا - سينگاپۋر جانە تاعىسىن تاعى. اتالعان قالالار يننوۆاتسيالار، ينۆەستيتسيالار، دەنساۋلىق، ءبىلىم، ساۋدا مەن تۋريزمنىڭ نەگىزگى وشاعى بولىپ وتىر. دامىعان ينفراقۇرىلىم مەن ساپالى باسقارۋ - قالانى دامىتۋدىڭ باستى شارتتارى. بۇدان بولەك، جاھاندىق ەكونوميكامەن بايلانىسى بار ساۋدا، قالادا دارىندى ادامداردى ۇستاي ءبىلۋ ساياساتى جانە تۇراقتى يننوۆاتسيالىق ەكوجۇيە بولۋى قاجەت. ءدال وسى شارتتاردىڭ نەگىزىندە ءمىنسىز قالانى قۇرۋعا بولادى»، - دەپ اتاپ كورسەتتى ءا. يسەكەشيەۆ.

اۆتور: ارمان اسقاروۆ