بەكبولات تىلەۋحان: استانانىڭ تويىندا ات شاپپاسا سىن بولار
بۇل تۋرالى و ك ق- دا وتكەن باسپا ءسوز ءماسليحاتىندا ۇلتتىق سپورت تۇرلەرى قاۋىمداستىعى پرەزيدەنتى بەكبولات تىلەۋحان ءمالىم ەتتى، دەپ حابارلايدى قازاقپارات ءتىلشىسى.
ايتا كەتسەك، استانا قالاسىنىڭ 20 جىلدىعىنا ارنالعان ۇلتتىق سپورتتىڭ سەگىز تۇرىنەن ءۇش ايعا سوزىلاتىن دودا 16 -قىركۇيەككە دەيىن جالعاسادى.
«مادەنيەت جانە سپورت مينيسترلىگى تاراپىنان «ۇلى دالا رۋحى» فەستيۆالىنە ارنايى بيۋدجەتتەن اقشا ءبولىندى. جاسىراتىنى جوق، ۇلتتىق سپورت وڭتۇستىك وڭىرلەردە عانا وتە جوعارى دارەجەدە دامىعان. سوندىقتان، جارىستى مينيسترلىك جانە قاۋىمداستىق تاراپىنان ويلاسا كەلىپ، ءار وڭىرلەردە وتكىزۋ كەرەك دەپ شەشتىك. «ۇلى دالا رۋحى» فەستيۆالىنىڭ ىرىكتەۋ كەزەڭدەرى سولتۇستىك ايماقتار ءۇشىن استانادا، شىعىس وڭىرلەرىندەگى سپورتشىلار ءۇشىن پاۆلوداردا وتكىزىلەدى. سول سەكىلدى باتىس جاقتا، ماڭعىستاۋدا كوكپار كومانداسى قالاي جاقسى دامىپ كەلە جاتىر. اتىراۋ وبلىسىندا اكىمشىلىكتىڭ قولداۋىمەن ۇلتتىق سپورتتى دامىتۋ ءۇشىن پارمەندەر بولىپ جاتىر»، - دەيدى بەكبولات تىلەۋحان.
ءماجىلىس دەپۋتاتى سونىمەن بىرگە، 6 -شىلدەدە وتەتىن «استانا كۋبوگى» بايگەسى تۋرالى تولىعىراق مالىمەت بەردى.
«استانانىڭ 20 جىلدىعى ءار قازاق بالاسىنىڭ رۋحىنىڭ، ەلدىگىنىڭ مەرەكەسى ەكەنىن بىلەتىن بولساق، مۇنداي مەرەكەدە ات شاپپاسا ۇلكەن سىن بولادى. كەز كەلگەن تويدا ات شاپتىرىپ، بايگە جاسايدى. بايگە - قازاق ءۇشىن سالتاناتتىڭ ەڭ بيىك شوعىرى. تۋرا وسى ءسوزىمدى استانا قالاسىنىڭ اكىمى اسەت يسەكەشيەۆكە ايتتىم. 6 -شىلدە كۇنى جاقسىلاپ تۇرىپ، ءبىر بايگە جاسايمىز دەپ وتىرمىز. جۇلدە قورى - 20 ميلليون تەڭگە بولادى. بايگە - ۇلكەن جانە كىشى الاماننان وتەدى (25 شاقىرىم جانە 16 شاقىرىم). وسى ۋاقىتقا دەيىن 14 وبلىستان جانە 2 قالادان قاتىسادى دەپ كەلگەنبىز. ال قازىر جوسپار جاقسى جاعىنا وزگەرىپ، 14 وبلىستان جانە 3-ايماقتان كەلەتىن بولدى، ياعني شىمكەنت قالاسى مەن تۇركىستان وبلىسى قوسىلدى. ءار جەردەن ەكى اتقا عانا ليميت بەرىلەدى. سودان كەيىن سپورت باسقارمالارى ەڭ مىقتى اتتارىن جارىسقا قوسادى»، - دەيدى ول.
بەكبولات تىلەۋحاننىڭ ايتۋىنشا، ۇلكەن الاماننان توپ جارعانى ءۇشىن ءبىرىنشى ورىنعا - 20 مىڭ ا ق ش دوللارى بەرىلەدى.
«قىسقا قاشىقتىقتاعى بايگەلەردى وتكىزىپ جاتقاندار بار. ول ەۋروپا ەلدەرىندە دە ۇيىمداستىرىلادى. ال ءبىز قازاقى بايگەگە كوبىرەك دەن قويىپ وتىرمىز. ەڭ ازى بىزدە - 16 شاقىرىم. ونى ءبىز كىشى الامان دەپ وتىرمىز. ۇلكەن الامان - 25 شاقىرىم. 20 مىڭ دوللارلىق جۇلدەنى 25 شاقىرىمدا كىم توپ جارادى - سول الادى. ال ۇلكەن الاماندا ەكىنشى ورىنعا 10 مىڭ، ءۇشىنشى ورىنعا 5 مىڭ دوللار، ءتورتىنشى ورىنعا 650 مىڭ تەڭگە، بەسىنشى ورىنعا 500 مىڭ تەڭگە تابىستالادى. ال ەندى كىشى الاماننىڭ باس بايگەسى - 10 مىڭ دوللار بولادى»، - دەدى بەكبولات تىلەۋحان.
