اپكەسىن جەتى جىل بويى ىزدەگەن ايەل ونىمەن كورشى تۇرعان

 استانا. قازاقپارات- بيولوگيالىق اپكەسىن جەتى جىل بويى ىزدەگەن ايەل، سونشا ۋاقىت ىزدەگەن تۋىسىنىڭ كورشىسى ەكەنىن انىقتادى.

بۇل تۋرالى Life.ru عا سىلتەپ، Stan.kz اقپاراتتىق اگەنتتىگى حابارلايدى.

31 جاستاعى حيللاري حارريس اپكەسىنىڭ اتى- ءجونى دون دجونسون ەكەنىن عانا بىلگەن. بىردە ول كورشى ءۇيدىڭ اۋلاسىندا تۋىسىمەن اتتاس ادامعا سالەمدەمە كەلگەنىن كورىپ قالدى.

سودان كەيىن حيللاري كورشى ايەل مەن اپكەسىنىڭ ەسىمى جاي عانا سايكەستىك پە، الدە 50 جاستاعى دون راسىندا سونشا ىزدەگەن تۋىسى بولدى ما، سونى انىقتاۋ ءۇشىن ونىڭ وزىمەن كەزدەسۋگە شەشىم قابىلدادى.

حيللاري مەن ونىڭ اعاسىن 1987 -جىلى بوتەن بىرەۋلەر اسىراپ العان بولاتىن. دەگەنمەن، ايەل ءوزىنىڭ بيولوگيالىق اتا- اناسىن بىلگىسى كەلىپ، ولار تۋرالى اقپارات ىزدەگەن.

سودان ول اسىراپ الۋ اگەنتتىگىنە بارعان. ونداعىلار دا حيللاريدىڭ تۋىستارى تۋرالى اقپارات بەرۋگە كەلىستى.

تەكسەرۋ كەزىندە ايەلدىڭ تۋعان اكەسىنىڭ 2002 -جىلى قايتىس بولىپ كەتكەنى انىقتالدى.

دەگەنمەن، نەكرولوگتا ونىڭ دون مەن رەنە ەسىمدى قىزدارىنىڭ بولعانى ايتىلعان.

دون ەسىمدى تۋىسىنىڭ بار ەكەنىن بىلگەن حيللارى ونى Facebook ارقىلى ىزدەگەن، ءبىراق ودان ەش ناتيجە شىقپاعان.

الايدا، ول ءبىراز ۋاقىتتان كەيىن كورشىسىنىڭ ۇيىنە كەلگەن سالەمدەنى كورىپ قالىپ، ول ايەلدەن اكەسى تۋرالى سۇراۋعا بەل بۋعان.

وسىلايشا، حيللاري جەتى جىل بويى ىزدەگەن اپكەسىن كەزدەيسوق سالەمدەمەنىڭ ارقاسىندا تاۋىپ الدى.