اتاقتى كۇيشىنىڭ ەلباسىنا سىيلاعان دومبىراسى اتىراۋدا ساقتاۋلى
دومبىرا مەملەكەت باسشىسىنا 2000-جىلى كۇي اتاسى قۇرمانعازىعا ارنالعان ەسكەرتكىشتىڭ اشىلۋ سالتاناتىندا تاپسىرىلعان، دەپ حابارلايدى قازاقپارات ءتىلشىسى.
سول كەزدەگى وقيعانى وبلىستىق تاريحي-ولكەتانۋ مۋزەيىنىڭ بۇرىنعى باسشىسى ناريمان ۇلكەنباي ۇلى بىلاي ەسكە الادى.
«ەلباسى ن. نازاربايەۆ اتىراۋعا كەلگەن ساپارىندا ازاتتىق كوشەسىنىڭ بويىنداعى قۇرمانعازى بابامىزعا ارنالعان ەسكەرتكىشتىڭ اشىلۋ سالتاناتىنا قاتىساتىندىعى جوسپارلانعان بولاتىن. وسى سالتاناتتى شارادا ءسوز سويلەيتىن قارشىعا احمەدياروۆ كۇنى بۇرىن شەبەر جاقسىلىق وسپانوۆقا ارنايى تاپسىرىس بەرىپ، دومبىرا جاساتتى. ەلباسى كۇي قاعانىنىڭ قولىنان دومبىرانى ريزاشىلىقپەن الىپ، ونى وبلىستىق تاريحي-ولكەتانۋ مۋزەيىنە تاپسىرعان بولاتىن»، - دەدى ناريمان ۇلكەنباي ۇلى.
قارشىعى احمەديار ۇلى شىعارماشىلىق جولىندا قازاق مادەنيەتى مەن ونەرىمەن الەمگە تانىلعان، كۇي قۇدىرەتىن مويىنداتقان تۇلعا.
«دومبىرانىڭ بەتىندە «قۇرمەتتى نۇرسۇلتان ءابىش ۇلى! قۇرمانعازى بابامىزدىڭ ارۋاعى قولداسىن! قارشىعا. 4. VII.2000» دەگەن جازۋ بار. «ۇيەڭكى اعاشتىڭ كوپ جىلدىق كەپتىرىلگەن تۇرىنەن جەتى شاناقتى ەتىپ جاسالىپ، سابىنىڭ بەتىنە مايىسپاي، مىقتى بولۋى ءۇشىن قارا قاعازدان جاپسىرما سالىنعان دومبىراعا قىزىعۋشىلىق تانىتاتىندار كوپ»، - دەيدى مۋزەيدىڭ ءبولىم باسشىسى سۆەتلانا نۇرپەيىسوۆا.
سونداي-اق، نۇرپەيىسوۆا جالپى مۋزەيدە ساقتالعان باسقا دا دومبىرالار تۋرالى ايتتى.
«قازاقتىڭ ءبىرتۋار ۇلدارى مەن قىزدارىنىڭ قولدانعان دومبىرالارى مۋزەي ەكسپوزيتسياسىنان ورىن العان. ءيا، كۇللى قازاققا ەسىمدەرى بەلگىلى ونەر يەلەرىنىڭ، اتاپ ايتساق قۇرمانعازى، دينا نۇرپەيىسوۆا، قارشىعا احمەدياروۆ دومبىرالارىنىڭ اتىراۋ مۋزەيىندە ساقتالۋى ۇلكەن ماقتانىش. مۋزەيگە كەلۋشى كورەرمەندەردىڭ دومبىرانى ۇستاپ، شەرتۋىنە مۇمكىندىك قاراستىرىلعان»، - دەيدى ول.
