استانادا «قۇرالاي» حالىقارالىق قۋىرشاقتار تەاترىنىڭ فەستيۆالى باستالدى
استانانىڭ كوشەلەرىمەن ۇرلەمەلى وركەستردى سۇيەمەلدەگەن ۇلتتىق كيىمدەگى بالالار مەن ارتيستەر، ۇزىن بويلى قۋىرشاقتار، «زارا» شوۋ- بالەتىنىڭ اتريستەرى، اعاشاياقتاعى شوۋ ءجۇرىپ ءوتتى.
استانا ساحناسىندا 1-4 - شىلدە ارالىعىندا تۋنيس، بوسنيا، گەرتسەگوۆينا، بەلگيا، يتاليا، پولشا، رەسەي، تۇركيا، ەستونيا، سەربيا جانە قازاقستان ەلدەرىنىڭ قۋىرشاقتار تەاترىنىڭ ۇجىمدارى ونەر كورسەتەدى. فەستيۆال باعدارلاماسىنىڭ العاشقى سپەكتاكلى 13:30-دا باستالدى. «قاڭباق شال» اتتى قازاق حالىق ەرتەگىسىن الماتى مەملەكەتتىك قۋىرشاق تەاترى كورسەتتى.
كورەرمەندەر سونداي- اق «ادادجو» مينياتيۋرالىق قويىلىمىن تاماشالادى. بۇل رەسەيدىڭ رمسوي قۋىرشاق تەاترى فاكۋلتەتى مەن (بوسنيا جانە گەرتسەگوۆينا) «كۋلتۋرنا سسەنا مالي ستۆاري ترەبينە» تەاترىمەن بىرلەسكەن شىعارماشىلىق جوبا.
قوناقتاردىڭ كەيبىرى وسى قويىلىمدى تاماشالاسا، وزگەسى سەربيالىق رەجيسسەر امەل ۆۋچەنوۆيچتىڭ «قۋىرشاق جانە بالا»، «ادەپكە تاربيەلەۋ»، «قۋىرشاق تانۋ ونەرى» شەبەرلىك سىنىبىنا باردى. فەستيۆالدىڭ العاشقى كۇنىن يتاليانىڭ «ۆەردي» ينتەراكتيۆتى قۋىرشاق تەاترى اياقتادى.
2 - شىلدەدە تاڭعى ساعات 10-دا كورەرمەندەردى «قوقىس مونسترى» اتتى كورىنىس كۇتىپ تۇر، ونى تۇركيانىڭ ستامبۋلىنان كەلگەن «قاراكوز» قۋىرشاق تەاترى ورىندايدى.
ارتىنشا سانكت- پەتەربۋرگتەن كەلگەن ۆيكتور انتونوۆ «جىپتەگى سيركتى» ۇسىنادى. سونداي- اق باعدارلامادا ەستونيانىڭ «Projekt» تەاترى قويعان «ۋمكا» جانە پولشانىڭ «MarekWaszkiel» تەاترى ۇسىنعان «پوبۋدكا، پودەم ي سيانيە» سپەكتاكلى قويىلادى. فەستيۆالدىڭ ءۇشىنشى كۇنى، ياعني 3 - شىلدەدە تۋنيستىڭ ۇلتتىق قۋىرشاق ونەر ورتالىعىنىڭ «كەزدەسۋىمەن» اشىلادى. بەلگيا «كىشكەنتاي قارا شوجەنىڭ تاريحىن»، تامبوۆتىق مەملەكەتتىك قۋىرشاق تەاترى «جۋچانى» ۇسىنادى. فەستيۆالدى استانانىڭ قۋىرشاقتار تەاترى «ماڭگىلىك بالا بەينەسىمەن» اياقتايدى.
اتالمىش سپەكتاكلدى وتاندىق تانىمال دراماتۋرگ روزا مۇقانوۆا جازعان، ول 1949 بەن 1989 - جىلعى سەمەيدەگى پوليگوننىڭ سادارىنان يادرولىق سىناقتىڭ قۇربانى بولعان بالالارعا ارناپ جازىلعان.
4 - شىلدە كەشكىسىن استانانىڭ قۋىرشاق تەاترى زالىندا «قۇرالاي» حالىقارالىق فەستيۆالىنىڭ قاتىسۋشىلارىن ماراپاتتاۋ ءراسىمى مەن سالتاناتتى جابىلۋى وتەدى.
