دومبىرا-اقپارات: «قازاقستان» تەلەراديوكورپوراتسياسى تىڭ باستامانى قابىل الدى
اۋەلى «ەگەمەن قازاقستان» گازەتى باستامانى ءىلىپ اكەتىپ، كەلەسى كەزەكتى «قازاقستان» ۇلتتىق ارناسىنا جولداعان بولاتىن.
ءوز كەزەگىندە «قازاقستان» ر ت ر ك باسشىسى ەرلان قارين ەستافەتانى قابىل الاتىنىن الەۋمەتتىك جەلىدە ءمالىم ەتكەن ەدى. ال كۇنى كەشە ول فەيسبۋكتەگى پاراقشاسىندا كوپشىلىككە اتالعان ۆيدەونى جاريا ەتتى.
«ۇلتتىق دومبىرا كۇنىنە وراي «ەگەمەن قازاقستان» گازەتىندەگى ارىپتەستەرىمىز جولداعان ەستافەتانى زور قۇرمەتپەن قابىل الدىق. العىس بىلدىرە وتىرىپ، ءبىز دە قولىمىزعا قاسيەتتى دومبىرانى الىپ، تىلەگىمىزدى ولەڭمەن ورنەكتەدىك. ەندى بۇل ەستافەتانى «استانا» تەلەارناسىنا جولدايمىز. «قازاقستان» تەلەراديوكورپوراتسياسىنىڭ قىزمەتكەرلەرى قۋانىش سۇلتان ۇلى مەن نۇرمات مانسۇردىڭ لەبىزىن تىڭداڭىزدار» دەپ جازدى ول الەۋمەتتىك جەلىدە.
ايتا كەتەيىك، «قازاقپارات» حالىقارالىق اقپارات اگەنتتىگىنىڭ قىزمەتكەرلەرى ۇلتتىق دومبىرا كۇنى قارساڭىندا ارىپتەستەرىن Dombyra-ينفورمعا شاقىرعان بولاتىن. مۇنداعى ماقسات مەملەكەت باسشىسى جاريالاعان ۇلتتىق دومبىرا كۇنى مەرەكەسىنە ۇلەس قوسۋ.
اگەنتتىكتىڭ شىعارۋشى رەداكتورى ەربول جانات پەن ءتىلشى ايان ورىبايەۆ اقپاراتتى دومبىرا ارقىلى حالىققا ۇسىندى. ەكى جارىم مينۋتتىق شاعىن روليكتە اقپاراتتى ولەڭمەن ورنەكتەگەن اگەنتتىكتىڭ قىزمەتكەرلەرى ىزگى باستامانى باسقا دا جۋرناليست ارىپتەستەرىنە جولداعان ەدى.
