ەلباسى استانا ماڭايىندا اعاش وتىرعىزىپ، قىرعاۋىلداردى ەركىندىككە ۇشىردى
مەملەكەت باسشىسى ورمان شارۋاشىلىعىنىڭ قىزمەتكەرلەرىنەن استانا ماڭىنا كوشەت وتىرعىزۋ جۇمىستارى قالاي جۇرگىزىلىپ جاتقانىن سۇرادى. جۇمىستىڭ يگى باعىتتا جالعاسىپ جاتقانىن كورگەن پرەزيدەنت بۇل شارۋالارعا كوڭىلى تولاتىنىن ءبىلدىردى.
وسىدان كەيىن ەلباسى «جاسىل ەل» قاتارىندا قارقىندى جۇمىس جاساپ جاتقان جاستارعا جاقىنداپ، اعاش وتىرعىزدى. اعاش وتىرعىزۋ بارىسىندا نۇرسۇلتان نازاربايەۆ جاستاردىڭ اراسىنداعى جىگىتتىڭ ەسىمىن سۇرادى. «ەسىمىم ەسپەمبەت» ، - دەپ جاۋاپ بەرگەن جۇمىسكەر ستۋدەنتكە مەملەكەت باسشىسى الىستاعى بيىك توعايدى كورسەتتى.
«اناۋ ءبىرىنشى وتىرعىزىلعان اعاشتاردى كوردىڭ بە؟ ول كەزدە مىناداي كوشەت جوق بولاتىن. ال مىنا تالدار مىنەكەي - 5-7 -جىلدىقتار. اناۋ جايقالىپ تۇرعان اعاشتاردىڭ وتىرعىزىلعانىنا 20 جىل ءوتىپ كەتتى. قالانى سالدىق. بۇرىن قالا تۇرعىندارى قالا شەتىنە شىقسا، باراتىن جەر جوق بولاتىن. سودان باستاپ 20 جىل بويى وسى جەرلەردى ارالاپ كەلە جاتىرمىن» ، - دەدى نۇرسۇلتان نازاربايەۆ.
ايتا كەتسەك، استانا قالاسىن جەلدەن ساقتاۋ ءۇشىن، حالىقتىڭ قولايلى كليماتتا تۇرۋىن قالىپتاستىرۋ ءۇشىن ق ر پرەزيدەنتى 1997 -جىلدىڭ قىركۇيەگىندە جوبانى جۇزەگە اسىرۋدىڭ قيىندىعىنا قاراماستان، استانا قالاسىنىڭ جاسىل بەلدەۋىن قۇرۋ تۋرالى شەشىم قابىلداعان بولاتىن.
ءبىرىنشى كەزەڭدە - 1998 -جىلدان باستاپ 2004 -جىلدار ارالىعىندا استانا قالاسىنىڭ شەگىندە ورنالاسقان ەلوردانىڭ جاسىل بەلدەۋىن قۇرۋ كوشەتتەردى ىقتىرماارالىق كەڭىستىكتەردى ساقتاي وتىرىپ، ورمان القابى ەتىپ وتىرعىزۋ جولىمەن جۇرگىزىلدى. وسى ۋاقىتتا ءبىرىنشى كەزەڭنىڭ جۇمىسى تولىعىمەن اياقتالدى. استانانىڭ جاسىل بەلدەۋىنىڭ جالپى اۋدانى 14827 گەكتاردى قۇرايدى. سونىڭ 11 502,2 گەكتارىندا 9,6 ميلليون اعاشتار جانە 1,8 ميلليون شامالاس بۇتالار ءوسىپ- ءونىپ جاتىر.
استانا قالاسىنىڭ اينالاسىنداعى جاسىل بەلدەۋدى كۇتىپ ۇستاۋ ماقساتىندا 2005 -جىلى قۇرىلتايشىسى ەلوردا اكىمدىگى بولىپ تابىلاتىن مامانداندىرىلعان كاسىپورىن - «استانا ورمانى» قۇرىلدى. كاسىپورىن ءبىزدىڭ ءوڭىردىڭ ماۋسىمدىلىعى مەن تابيعي- كليماتتىق جاعدايىن ەسكەرە وتىرىپ ەكپە كوشەتتەردى وتىرعىزۋ، توپىراقتى مەحانيكالاندىرىلعان تۇردە وڭدەۋ، تۇپتەۋ جانە اعاشتار مەن بۇتالاردى قالىپتاستىرۋ، اۋرۋلارمەن جانە زيانكەستەرمەن كۇرەسۋ ماقساتىندا حيميالىق وڭدەۋ، ورتكە قارسى جۇمىستار، اعاش ەكپەلەردى شابۋدان، لاستاۋدان جانە تاعى دا باسقا بۇزۋشىلىقتاردان كۇزەتۋ ءتارىزدى كەشەندى اگروتەحنيكالىق جۇمىستاردى جۇرگىزەدى.
ەكىنشى كەزەڭ جۇمىستارى 2009 -جىلدىڭ ماۋسىمىندا قازاقستان رەسپۋبليكاسى پرەزيدەنتىنىڭ كەزەكتى كەلۋىنەن كەيىن باستالدى. وندا جاسىل بەلدەۋدى ورمان الابىنا اينالدىرۋ ماقساتى قويىلدى. «استانا ورمانى» ج ش س جۇمىستاردى ورمان شارۋاشىلىعىنىڭ قازاق عىلىمي- زەرتتەۋ ينستيتۋتىمەن بىرلەسە (شۋچينسك ق. ) 2010 -جىلى باستاعان. ال 2011 -جىلى بەكەم، ونىمدىلىگى جوعارى ءارتۇرلى اعاش ءتۇرىنىڭ ورمان ەكپەلەرىن قۇرۋ بويىنشا عىلىمي- وندىرىستىك تاجىريبەلەردى جاساۋ جۇرگىزىلدى.
2019 -جىلدان باستاپ ەكىنشى قابىلداۋداعى ورمان ەكپەلەرىن قۇرۋ بويىنشا IV كەزەك (جىلىنا 500 مىڭ كوشەت وتىرعىزۋ) جوباسى قولعا الىنادى. جوبالاردىڭ بارلىق كەزەكتەرىن جۇزەگە اسىرۋ ورمان قورعاۋ القاپتارىن وتىرعىزۋىنىڭ ىقتىرمالى ءتاسىلىن ورمان الابىنا اينالدىرۋعا، اعاش داقىلدارىنىڭ جاڭا ۇزاق عۇمىرلى قىلقانجاپىراقتى تۇرلەرىن ەنگىزۋگە جانە اۋدانداستىرۋعا مۇمكىندىك بەرەدى.
