ابايدىڭ حاتى استانا كورمەسىنە قويىلدى

 استانا. قازاقپارات - استانا قالاسىنداعى قازاقستان رەسپۋبليكاسىنىڭ ۇلتتىق مۋزەيىندە ابايدىڭ «جيدەباي- ءبورىلى» مەملەكەتتىك قورىق- مۋزەيىنىڭ ۇيىمداستىرۋىمەن حاكىم اباي مەن دانىشپان شاكارىمنىڭ ءومىرى مەن شىعارماشىلىعانا ارنالعان «ۇلى تۇلعالار ۇندەستىگى» كورمەسىنىڭ سالتاناتتى اشىلۋ ءراسىمى بولىپ ءوتتى.

- «ۇلى تۇلعالار ۇندەستىگى» كورمەسى قازاقستان رەسپۋبليكاسىنىڭ پرەزيدەنتى ن. ءا. نازاربايەۆتىڭ «رۋحاني جاڭعىرۋ: بولاشاققا باعدار» باعدارلامالىق ماقالاسى اياسىندا جانە استانا قالاسىنىڭ 20 جىلدىق مەرەيتويىنا وراي ۇيىمداستىرىلىپ وتىر، - دەپ حابارلادى ابايدىڭ مەملەكەتتىك قورىق مۋزەيىنىڭ ديرەكتورى بولات جۇنىسبەكوۆ، - قاسيەتتى مەكەن -  شىڭعىستاۋدا دۇنيەگە كەلگەن اباي مەن شاكارىم قازاق حالقىنىڭ ماڭدايىنا بىتكەن ۇلى اقىندار، جاڭا جازبا ادەبيەتتىڭ نەگىزىن قالاۋشىلار. قوس الىپتىڭ شىعارمالارى ارقىلى قازاق ادەبيەتى، قازاق مادەنيەتى شىعىستىڭ، باتىستىڭ تاڭداۋلى ويشىلدارىنىڭ الەمدىك فيلوسوفيالىق يدەيالارىمەن بايىپ، جاڭا دەڭگەيگە كوتەرىلدى.

كورمەدە دانىشپان اباي مەن ويشىل شاكارىمنىڭ ءومىرى مەن شىعارماشىلىعى جانە قوعامدىق قىزمەتىنەن سىر شەرتەتىن ءبىرقاتار قۇندى دەرەكتەر، جادىگەرلەر، اباي وقىعان مەدرەسە كىتاپتارى: «كيتاب شاراحا الاما» ، «تاريحي جاۋدات» ، يبن حالدۋننىڭ مۇسىلمان ەلدەرى جانە افريكا ەلدەرىنىڭ تاريحى جازىلعان ەڭبەكتەرىنە ورىن بەرىلگەن. ابايدىڭ «جيدەباي- ءبورىلى» مەملەكەتتىك قورىق- مۋزەيىنىڭ باسپا ءسوز قىزمەتىنىڭ مالىمەتىنە سۇيەنسەك، استانا قالاسىنىڭ تۇرعىندارى مەن قوناقتارى كورمەدەگى ابايدىڭ ولكەتانۋ مۋزەيىنە ءوز قولىمەن تاپسىرعان زاتتارىن، ابايدىڭ ۇلى ماعاۋياعا جازعان حاتىن، ابايدىڭ ناعاشى اتاسى تۇرپاننىڭ ەر- توقىمىن، شاكارىمنىڭ شوقپارى مەن ساپتىاياعىن، توبىقتى ەلىندە كەڭ تاراعان ءۇش ىشەكتى دومبىرانى 2018 -جىلدىڭ 8 - شىلدەسىنە دەيىن تاماشالايتىن بولادى.

راۋشان نۇعمانبەكوۆا، سەمەي

«ايقىن»