ولجاس سۇلەيمەنوۆتىڭ نەمەرەسىن كولىگىمەن قاققان جۇرگىزۋشى ءى ءى د باستىعىنىڭ قىزى بولىپ شىقتى

استانا. قازاقپارات - استانا قالاسىنىڭ ىشكى ىستەر دەپارتامەنتى ولجاس سۇلەيمەنوۆتىڭ نەمەرەسى - ەسكەندىر سۇلەيمەنوۆتى كولىگىمەن قاعىپ ولتىرگەن جۇرگىزۋشى قىزىلوردا وبلىستىق ىشكى ىستەر دەپارتامەنتىنىڭ باستىعىنىڭ قىزى ەكەنىن راستادى، دەپ حابارلايدى قازاقپارات ءتىلشىسى.

«مۇحيتوۆانىڭ اكەسى ىشكى ىستەر ورگانىندا ەڭبەك ەتەتىنىن، قىزىلوردا وبلىستىق ءى ءى د باستىعى پوليتسيا پولكوۆنيگى قايرات مۇحيتوۆ ەكەنىن راستايمىز»، - دەدى قالالىق ءى ءى د-دە وتكەن باسپا ءسوز ءماسليحاتىندا دەپارتامەنت باستىعىنىڭ ورىنباسارى سانجار ءادىلوۆ.

ايتا كەتسەك، سانجار ءادىلوۆ كۇدىكتى جۇرگىزۋشىگە قاتىستى كەپىل رەتىندەگى بۇلتارتپاۋ شاراسى قولدانىلعانىن حابارلاعان بولاتىن. كەپىل سوماسى - 601250 تەڭگە. سونداي-اق جول اپاتى كەزىندە ونىڭ رۋلدە ماس كۇيىندە بولماعانى اتاپ ءوتىلدى.

22 -ماۋسىم كۇنى استانادا جول اپاتىنان ولجاس سۇلەيمەنوۆتىڭ 26 جاستاعى نەمەرەسى ەسكەندىر سۇلەيمەنوۆ مەرت بولعانىن بۇعان دەيىن حابارلاعان بولاتىنبىز.