قىرعىزستان پرەزيدەنتى قازاقستاندى ماڭىزدى سەرىكتەس دەپ اتادى

بىشكەك. قازاقپارات - بۇگىن قىرعىزستاننىڭ پرەزيدەنتى سوورونباي جەەنبەكوۆ جوعارعى كەڭەستىڭ وتىرىسى كەزىندە وتانداستارىنا ارناعان جولداۋىندا ەلدىڭ سىرتقى ساياساتىنداعى باسىم باعىتتاردى ايقىندادى، دەپ حابارلايدى قازاقپاراتتىڭ مەنشىكتى ءتىلشىسى.

«قازاقستان، وزبەكستان، تاجىكستان جانە تۇرىكمەنستان سىندى كورشىلەس ەلدەرمەن دوستىق قارىم-قاتىناستى نىعايتۋ حالقىمىزدىڭ جاعدايىنا وڭ اسەرىن تيگىزەدى. ءبىز مۇنى سىرتقى ساياساتتىڭ باسىم باعىتتارىنىڭ ءبىرى رەتىندە باعالايمىز»، - دەدى س. جەەنبەكوۆ.

قىرعىزستاننىڭ ستراتەگيالىق سەرىكتەسى جانە وداقتاسى رەسەيمەن جان-جاقتى بايلانىستى دامىتۋى - سىرتقى ساياساتتاعى تاپجىلماس باسىمدىعى بولىپ سانالادى. سونداي-اق، كورشىلەس قىتاي حالىق رەسپۋبليكاسىمەن ورناعان اراداعى قارىم-قاتىناس ستراتەگيالىق دەڭگەيگە كوتەرىلگەن.

«تۇركيا، جاپونيا، كورەيا، ا ق ش، ەۋرووداققا مۇشە ەلدەر، سونداي-اق، اراب ەلدەرىمەن ەكىجاقتى جانە كوپجاقتى قارىم-قاتىناستى ودان ءارى نىعايتامىز»، - دەدى قىرعىز رەسپۋبليكاسىنىڭ پرەزيدەنتى.

سونداي-اق، ەل پرەزيدەنتى قىرعىزستاننىڭ ە ا ە و- عا مۇشە بولۋىنىڭ ماڭىزدىلىعىن ەرەكشە اتاپ ءوتتى.

«ءبىز قىرعىزستاننىڭ تاۋارلارىن الەمدىك نارىققا ەكسپورتتاۋ ءۇشىن بار مۇمكىندىكتى پايدالانۋعا ءتيىسپىز. ەلدىڭ ترانزيتتىك جانە وندىرىستىك الەۋەتىن ودان ءارى دامىتامىز»، - دەدى ءوز سوزىندە س. جەەنبەكوۆ.