بازالىق زەينەتاقىنى وزگەرتۋ: جۇمىسسىز جۇرگەن جىلدار ەڭبەك ءوتىلى دەپ جازىلادى
ال 33 جىلدىق ءوتىلى بار ادامدار ودان ەكى ەسە ارتىق الادى، دەپ حابارلايدى قازاقپارات ءتىلشىسى.
ق ر ەڭبەك جانە حالىقتىق الەۋمەتتىك قورعاۋ ۆيتسە-ءمينيسترى سۆەتلانا جاقىپوۆانىڭ ايتۋىنشا، بەلگىلى ءبىر سەبەپتەرمەن جيناقتاۋشى زەينەتاقى جۇيەسىنە قاتىسا الماعان كەيبىر ازاماتتارعا جەڭىلدىك جاسالادى.
«بىرىنشىدەن، بالا كۇتىمىمەن ءۇش جىل ءجۇرىپ قالعاندارعا اتالعان ۋاقىت ەڭبەك ءوتىلى دەپ جازىلادى. ءبىراق ول ۋاقىت 12 جىلدان اسپاۋى ءتيىس. سول سياقتى I جانە II توپتاعى مۇگەدەكتەرگە، سونداي-اق، 80 جاستان اسقان ادامدارعا كۇتىپ جاساعاندارعا دا ەڭبەك ءوتىلى جازىلادى. سوسىن اسكەري ادام قىزمەت بابىنا بايلانىستى باسقا ءبىر جەرگە جىبەرىلسە، ال ول جەردە ونىڭ جۇبايىنا جۇمىس تابىلماسا، ونىڭ دا وتكىزگەن ۋاقىتى ەڭبەك وتىلىنە جاتقىزىلادى. ديپلوماتتاردىڭ جۇبايلارىنا دا تۋرا سونداي جەڭىلدىك جاسالادى»، - دەدى س. جاقىپوۆا ۇكىمەت ۇيىندە وتكەن باسپا ءسوز ءماسليحاتىندا.
ايتا كەتەيىك، كەلەسى ايدان باستاپ بازالىق زەينەتاقىنى تاعايىنداۋ ءتارتىبى وزگەرەدى. مەملەكەتتىك بيۋدجەتتەن تولەنەتىن بازالىق زەينەتاقىنىڭ مولشەرى ەڭبەك ءوتىلى مەن زەينەتاقى جۇيەسىنە قاتىسۋ مەرزىمىنە تاۋەلدى بولادى. بۇگىندە بازالىق زەينەتاقى بارلىعىنا بىردەي تولەنىپ وتىر. ال ونىڭ مولشەرى ەڭ تومەنگى كۇنكورىس دەڭگەيىنىڭ 54 پروتسەنتىن قۇرايدى. ول - شامامەن 15274 تەڭگە. ەندى، شىلدە ايىنان باستاپ بازالىق زەينەتاقى ەڭبەك ءوتىلى مەن زەينەتاقى جۇيەسىنە قاتىسۋ مەرزىمىنە قاراي تولەنەدى.
«ماسەلەن، زەينەتكەردىڭ ەڭبەك ءوتىلى بولماسا، سوسىن زەينەتاقى جيناقتاۋ جۇيەسىنە مۇلدەم قاتىسپاسا، ءيا بولماسا، ەڭبەك ءوتىلى 10 اق جىل بولسا، وعان جاڭاعى ەڭ تومەنگى كۇنكورىس دەڭگەيىنىڭ 54 پروتسەنتىن - 15274 تەڭگەنى تولەي بەرەدى. ال 10 جىلدان ارتىق ەڭبەك ءوتىلى بار ادامعا قوسىمشا ءاربىر جىل ءۇشىن 2 پروتسەنت قوسىلادى. سوندا 33 جىلدىق ەڭبەك ءوتىلى بار ادام بازالىق زەينەتاقىنىڭ تولىق مولشەرىن - 28284 تەڭگەنى الا الادى. ءاربىر ادام ءوزىنىڭ زەينەتاقى مولشەرىن «ەلەكتروندى ۇكىمەت» پورتالىنان، ءيا بولماسا، «ازاماتتارعا ارنالعان ۇكىمەتتىڭ» فرونت-كەڭسەلەرىنەن بىلە الادى. سول جەردە تولىق انىقتامانى دا الۋعا مۇمكىندىك بار»، - دەپ اتاپ كورسەتتى س. جاقىپوۆا.
