كورەيانىڭ ونەر ۋنيۆەرسيتەتى قازاقستاندىق جاستارعا ارنايى گرانت ءبولدى
كورەيانىڭ ۇلتتىق ونەر ۋنيۆەرسيتەتى 1993-جىلى اشىلعان جانە وڭتۇستىك كورەيانىڭ سەۋل قالاسىندا ورنالاسقان. ۋنيۆەرسيتەتتە مۋزىكا مەكتەبى، دراما، كينو جانە مۋلتيمەديا، ءبي، بەينەلەۋ ونەرى جانە كورەي ءداستۇرلى ونەرى سياقتى التى فاكۋلتەت بويىنشا 26 دەپارتامەنت جۇمىس ىستەيدى.
ۋنيۆەرسيتەت ارتىستىك تالانتى بار جاستاردى قولداۋ ماقساتىندا 2019-جىلعا ارنالعان «Art Major Asian» (AMA) ستيپەنديالىق باعدارلاماسىن ۇسىنادى. اتالمىش باعدارلاما ارقىلى باكالاۆرياتقا جانە ماگيستراتۋراعا تۇسۋگە مۇمكىندىك جاسالعان.
ستيپەنديانىڭ ىشىنە مىنالار كىرەدى: نەگىزگى باعدارلاما بويىنشا تەگىن ءبىلىم الۋ، اي سايىنعى 800000 ۆون سوماسىنداعى ستيپەنديا، 3 اي قارقىندى تۇردە كورەي ءتىلىنىڭ كۋرسىن وقۋ، ءىشىنارا مەديتسينالىق ساقتاندىرۋ.
تىركەۋ جانە ىرىكتەۋ ۋاقىتى: تىركەۋ 2018-جىلدىڭ 31- شىلدەسىندە اياقتالادى، ال ىرىكتەۋ ناتيجەسى 2018-جىلدىڭ 1-7 قىركۇيەگىنە دەيىن شىعادى، گرانت يەلەنگەن تالاپكەرلەر 2018-جىلدىڭ 29- قازانىنا دەيىن كورەياعا اتتانۋى كەرەك، ولار 2018-جىلدىڭ قاراشاسىنان 2019-جىلدىڭ اقپانىنا دەيىن ءتىل كۋرستارىن وقيدى.
وقۋ 2019-جىلدىڭ ناۋرىز ايىندا باستالادى.
وقۋعا تۇسۋگە قاجەتتى قۇجاتتاردىڭ ءتىزىمىن، وقۋعا ءتۇسۋ جونىندەگى نۇسقاۋلىقتى جانە ءوتىنىم ۇلگىسىن ۋنيۆەرسيتەتتىڭ سايتىنان جۇكتەپ الۋعا مۇمكىندىك جاسالعان.
كورەياعا وقۋعا تۇسۋگە قاتىستى بارلىق سۇراقتاردىڭ جاۋابىن global@karts.ac.kr ەلەكتروندى پوشتاسى نەمەسە 8227469073 تەلەفونى ارقىلى سۇراپ بىلۋگە بولادى.
