قازاقستاندا ەسەپ ايىرىسۋدا شەتەل ۆاليۋتاسىن قىسقارتۋ مىندەتى تۇر - ۇلتتىق بانك ءتوراعاسى
«قازاقستاندا «استانا» حالىقارالىق قارجى ورتالىعى قۇرىلدى. «قورعاس» ارنايى ەكونوميكالىق ايماعى قۇرىلدى. بۇل وبەكتىلەردىڭ اۋماعىندا ۆاليۋتالىق وپەراتسيالاردى رەتتەۋ كەرەك. سونداي-اق، قازاقستاننىڭ دۇنيەجۇزىلىك ساۋدا ۇيىمىنا كىرگەنىن ەسكەرە وتىرىپ، زاڭ جوباسىن ازىرلەۋ قاجەت بولدى. نەگىزگى مىندەت ۆاليۋتالىق وپەراتسيالاردىڭ مونيتورينگىن كەڭەيتۋ بولىپ تابىلادى. قازاقستان اۋماعىنداعى ەسەپ ايىرىسۋدا شەتەل ۆاليۋتاسىن قىسقارتۋ مىندەتى تۇر. زاڭ جوباسىن قابىلداۋ قاراپايىم ازاماتتارعا اسەر ەتپەيدى. سەبەبى ولار ءۇشىن ۆاليۋتالىق رەتتەۋدىڭ ليبەرالدى ۇستانىمدارى ساقتالدى»، - دەپ اتاپ ءوتتى ۇلتتىق بانك ءتوراعاسى دانيار اقىشەۆ.
بەلگىلى بولعانداي، شەتەلدىك ۇيىمداردىڭ فيليالدارىن رەزيدەنت رەتىندە تانۋ ەسكەرىلگەن. قولدانىستاعى زاڭناماعا سايكەس، شەتەلدىك ۇيىمداردىڭ فيليالدارى بەيرەزيدەنت رەتىندە قازاقستاندا ۆاليۋتالىق وپەراتسيالاردى جۇزەگە اسىرادى. ولاردىڭ قازاقستان تۇلعالارىمەن ەسەپ ايىرىسۋىن تەڭگەگە اۋىستىرۋ ۇسىنىلادى. وسى تۇزەتۋلەر جەرگىلىكتى كومپانيالار مەن شەتەلدىك ۇيىمداردىڭ فيليالدارى ءۇشىن بيزنەس جۇرگىزۋدىڭ تەڭ تالاپتارىن قامتاماسىز ەتۋگە مۇمكىندىك بەرەدى.
مۇنىمەن قوسا، ۆاليۋتالىق وپەراتسيالار تۋرالى اقپارات جيناۋ راسىمدەرىن جەڭىلدەتۋ شارالارى قامتىلىپ وتىر. تىركەۋ مەن حابارلاۋدىڭ كۇردەلى رەجىمى جويىلادى. ولاردىڭ ورنىنا ۆاليۋتالىق شارتتاردى ءبىرىڭعاي ەسەپتىك تىركەۋ ەنگىزىلەدى.
اقشانى ەلدەن شىعارۋعا قارسى ءىس-قيمىلدى كۇشەيتۋگە ماسەلەسىنە توقتالعان د. اقىشەۆ، اقشانى ەلدەن اكەتۋ بەلگىلەرى بار ۆاليۋتالىق وپەراتسيالاردىڭ تىزبەسىن ەنگىزۋ، مەملەكەتتىك كىرىس ورگانىمەن بەلسەندى اقپاراتتىق جانە وزگە دە ءوزارا ءىس-قيمىل ەسكەرىلەتىنىن اتاپ ءوتتى. اقپاراتپەن ءتيىمدى الماسۋ ءتۇرلى مەملەكەتتىك ورگاندارعا ءبىر مامىلە بويىنشا جالعان مالىمەتتەردى انىقتاۋعا مۇمكىندىك بەرەدى.
بۇدان بولەك، قازاقستانداعى ۆاليۋتالىق قۇندىلىقتاردىڭ اينالىس ءتارتىبىن ناقتىلاۋ كوزدەلگەن. مىسالى، زاڭ جوباسى بانكتىك ەمەس ايىرباستاۋ پۋنكتتەرىنە ۇلتتىق بانكتىڭ شاعىن قۇيمالارىن ساتىپ الۋ جانە ساتۋ قۇقىعىن ۇسىنادى.
