شىمكەنتتە «ەرلىك» مۇراجايىنىڭ جاڭا عيماراتى اشىلدى

شىمكەنت. قازاقپارات - شىمكەنتتە «ەرلىك» مۇراجايىنىڭ قوسىمشا عيماراتىنىڭ اشىلۋ سالتاناتى ءوتتى.

جاڭادان اشىلعان ەكى قاباتتى عيماراتتا ەكى ەكسپوزيتسيالىق زال، 50 ورىندىق ءماجىلىس زالى، ەكسپوناتتاردى ساقتايتىن جانە قىزمەتكەرلەر جۇمىس ىستەيتىن بولمەلەر بار، دەپ حابارلايدى قازاقپارات ءتىلشىسى.

عيماراتتىڭ اۋماعى بۇرىن 209,6 شارشى مەتر بولعان ەدى. وبلىس اكىمدىگىنىڭ قولداۋىمەن اۋماعى 285 شارشى مەترلىك قوسىمشا جاڭا عيمارات سالىندى. بۇل مۇراجايدا سوعىس ارداگەرلەرىنىڭ ەرلىكتەرىن دارىپتەۋمەن قاتار زيالى قاۋىم وكىلدەرىمەن كەزدەسۋلەر جانە وزگە دە تاريحي- تانىمدىق ءىس-شارالار وتكىزىلەتىن بولادى. شاراعا قاتىسقان وبلىس اكىمى جانسەيىت تۇيمەبايەۆ پەن ءوڭىر ارداگەرلەرى، زيالى قاۋىم وكىلدەرى «جەڭىس» ساياباعىنداعى ۇلى وتان سوعىسىنىڭ باتىرى، گەنەرال سابىر راقىموۆتىڭ ەسكەرتكىشىنە گۇل شوقتارىن قويدى. جيىندا ايماق باسشىسى جۇرتشىلىقتى جاڭا عيماراتتىڭ اشىلۋىمەن قۇتتىقتادى.

«قوعامدىق سانانى جاڭعىرتۋعا باعىتتالعان ەلباسى نۇرسۇلتان ءابىش ۇلى نازاربايەۆتىڭ «رۋحاني جاڭعىرۋ» باعدارلاماسىنىڭ ۇسىنىلۋى زامان تالابىنا ساي ماڭىزدى شەشىم بولدى. بۇگىنگى شارا - ەرلىكتى دارىپتەۋگە، جاستاردىڭ بويىنا وتانشىلدىق سەزىمدى سىڭىرۋگە باعىتتالعان. باتىرلارىمىزدىڭ، اتا-اجەلەرىمىزدىڭ ۇلى وتان سوعىسى جىلدارىنداعى ەرلىكتەرى مەن جەڭىستەرىن، تىلداعى ەڭبەكتەرىن، اۋعان سوعىسى ارداگەرلەرىنىڭ ەرجۇرەكتىلىگىن ناسيحاتتايتىن بۇل مۋزەيدىڭ ماڭىزى جوعارى. جاستاردى وتانشىلدىققا تاريبەلەۋدە بۇل ورتالىقتىڭ دا قوسار ۇلەسى مول»، - دەدى ءوڭىر باسشىسى.

ايتا كەتەيىك، «ەرلىك» مۋزەيى 2012 -جىلى جەلتوقسان ايىندا اشىلىپ، 2013 -جىلى 19 -شىلدەدە وبلىستىق تاريحي- ولكەتانۋ مۋزەيىنىڭ قاراماعىنا وتكەن.

 فوتو اۆتورى: يسامەتوۆ سابىرجان