قازاق قىزدارىنا ارنالعان مۋزەي بەدەلدى حالىقارالىق ۇيىمعا مۇشە بولدى
«بۇل ۇلتىمىزدىڭ ۇلىلىعىن ۇلىقتاۋ ماقساتىندا قولعا الىنىپ وتىرعان يگىلىكتى ءىس. سونىمەن قاتار، قازاق حالقىنىڭ رۋحاني قۇندىلىقتارىن شەتەلدە ناسيحاتتاۋعا باعىتتالعان ناقتى قادام دەپ سانايمىز. بۇگىندە اتالعان قاۋىمداستىق قۇرامىندا الەمنىڭ بەدەلدى مۋزەيلەرى بار»، - دەپ اتاپ ءوتتى ءباسپاسوز جانە قوعاممەن بايلانىس ءبولىمىنىڭ باسشىسى جاندار اسان.
ۋنيۆەرسيتەت مۋزەيى قىزمەتكەرلەرى بيىلعى جىلدىڭ قازان ايىندا تۇركيانىڭ ىستانبۇل قالاسىندا وتەتىن I ەۋروپا جانە ازيا كونگرەسىنە قاتىسىپ، «قازاقستاننىڭ ايەلدەر تاريحىن قايتا جاڭعىرتۋ» تاقىرىبىنداعى بايانداما جاساماق. سونىمەن قاتار، وقۋ ورنىنىڭ تاريحىنان سىر شەرتەتىن فوتو كورمەنى الەم جۇرتشىلىعىنىڭ نازارىنا ۇسىنعالى وتىر. الداعى ۋاقىتتا حالىقارالىق ۇيىممەن بىرلەسكەن جوبالار دا جۇزەگە اسىرىلماق.
ايتا كەتەيىك، بۇگىندە حالىقارالىق ايەلدەر مۋزەيى قاۋىمداستىعىنا دۇنيەجۇزىنىڭ 80 نەن استام مادەني نىسانى مۇشە.
«اقتۇمار» مۋزەيى 2002 -جىلدىڭ قاراشا ايىندا قۇرىلدى. كەشەن «مادەني مۇرا» مەملەكەتتىك باعدارلاماسىنا سايكەس ءداستۇرلى، مادەني- رۋحاني قۇندىلىقتار ارقىلى ستۋدەنت جاستارعا ەلىنىڭ تاريحىن، ءتىلىن جانە كوپ ۇلتتى قازاقستاننىڭ تاريحىن قۇرمەتتەۋ قاسيەتتەرىن قالىپتاستىرۋ ماقساتىندا قىزمەت اتقارادى. مۋزەي قورىندا وقۋ ورنىنىڭ قۇرىلعان ۋاقتىسىنان باستاپ سىر شەرتەتىن جادىگەرلەر مەن سيرەك فوتوسۋرەتتەر ورنالاسقان. اتاپ ايتقاندا، قىزدار ۋنيۆەرسيتەتىنىڭ قالىپتاسۋى، دامۋىندا ەڭبەك سىڭىرگەن مەملەكەت جانە قوعام قايراتكەرلەرىنىڭ، رەكتورلاردىڭ ەڭبەكتەرى، ءبىلىم ورداسىنىڭ داڭقتى تۇلەكتەرى تۋرالى اقپارات بەرىلگەن. سونداي- اق، مۋزەي ەكسپوزيتسياسىندا قازاق مەملەكەتىنىڭ قالىپتاسۋىنداعى قازاق ايەلىنىڭ ءرولى - كونە زاماننان قازىرگى زامانعا دەيىن تىنىس- تىرشىلىگى كورسەتىلگەن.
مۋزەيدە «انالار ۇلاعاتى - ەلگە امانات»، «ۋنيۆەرسيتەت تاريحى»، «ايەل الەمى» ەتنو- كوللەكسياسى»، «ايەلدەر شىعارماشىلىعى» جانە «ايەلدەردىڭ قوعامداعى ءرولى» اتتى بولىمدەر بار.
مادەني كەشەندە ەكسكۋرسيالار، ستۋدەنتتەر مەن تۇلەكتەردىڭ شىعارماشىلىق جۇمىستارىنىڭ كورمەسى، تانىمدىق ساباقتار، دوڭگەلەك ۇستەلدەر تۇراقتى تۇردە وتكىزىلىپ تۇرادى.
