نۇرسۇلتان نازاربايەۆقا قازان فەدەرالدىق ۋنيۆەرسيتەتىنىڭ «قۇرمەتتى دوكتورى» اتاعى بەرىلدى

قازان. قازاقپارات - قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ تاتارستان رەسپۋبليكاسىنا جۇمىس ساپارىمەن كەلدى.

«قازان» حالىقارالىق اۋەجايىندا قازاقستان پرەزيدەنتىن تاتارستان پرەزيدەنتى رۋستام ميننيحانوۆ جانە رەسپۋبليكا باسشىلىعى قارسى الدى.

مەملەكەت باسشىسىنىڭ جۇمىس باعدارلاماسى قازان فەدەرالدىق ۋنيۆەرسيتەتىنەن باستالدى. وندا قازاقستان پرەزيدەنتىنە ۋنيۆەرسيتەتتىڭ «قۇرمەتتى دوكتورى» اتاعى بەرىلدى.

سالتاناتتى راسىمگە تاتارستان پرەزيدەنتى رۋستام ميننيحانوۆ قاتىستى.

«ءبىز قازاق حالقىنىڭ ءبىرتۋار پەرزەنتى قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆقا قوشەمەت بىلدىرەمىز. قازاق پەن تاتار - تاعدىرلاس حالىقتار. ءبىزدىڭ مەنتاليتەتىمىز بەن رۋحانياتىمىز جاقىن. ورتاق مەرەكەلەرىمىز بەن داستۇرلەرىمىز كوپ. ءبىر-بىرىمىزبەن ءتىل تابىسۋىمىز ءۇشىن بىزگە اۋدارماشى قاجەت ەمەس. ەكى ۇلتتىڭ قارىم-قاتىناسى تەرەڭگە كەتەدى. سونىڭ ماڭىزدى تۇسىنىڭ ءبىرى - قازان ۋنيۆەرسيتەتى»، - دەدى ق ف ۋ رەكتورى يلشات عافۋروۆ.

تاريحي قالىپتاسقان بايلانىستار تۋرالى ايتا كەلە، ول ⅩⅨ عاسىرداعى قازاقتىڭ بەلگىلى مەملەكەت قايراتكەرى جاڭگىر حاننىڭ ۋنيۆەرسيتەتكە جاناشىر بولىپ، وندا قازاق جاستارىنىڭ ءبىلىم الۋى ءۇشىن كوپ كۇش سالعانىن تىلگە تيەك ەتتى. جاڭگىر حاننىڭ ارقاسىندا ۋنيۆەرسيتەتتىڭ بازارباي مامەتوۆ، مۇحامەدجان قارابايەۆ، شاۆكات بەكمۇحامەتوۆ سىندى كوپتەگەن تۇلەكتەرى بەلگىلى مەملەكەت جانە قوعام قايراتكەرلەرى، عالىم، اعارتۋشى بولىپ جەتىلگەنىن ايتتى.

«قازاندا وقىعان قازاق حالقىنىڭ پەرزەنتتەرى ۇلتتىق ينتەلليگەنسيانىڭ بەلدى بۋىنىنا اينالىپ، قازاقستاننىڭ قوعامدىق، ساياسي، مادەني جانە عىلىمي ومىرىندە وشپەستەي ءىز قالدىرعان»، - دەدى ق ف ۋ رەكتورى.

وسى ورايدا رەكتور ەكى رەسپۋبليكا اراسىنداعى تىعىز ەكونوميكالىق جانە مادەني بايلانىستارعا توقتالدى.

«مۇنىڭ بارىنە قازاقستاننىڭ ساياسي تۇراقتىلىعى مەن اشىقتىعىنىڭ ارقاسىندا قول جەتىپ وتىر. بۇل رەتتە قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ الاتىن ورنى وراسان زور. نۇرسۇلتان ءابىش ۇلىنىڭ كاسىبيلىگى مەن بەدەلى ەلدەرىمىز جانە رەسپۋبليكالارىمىز اراسىنداعى ىنتىماقتاستىق پەن تاتۋ كورشىلىك قارىم- قاتىناستارىن نىعايتۋ مەن دامىتۋدىڭ باستى فاكتورى بولدى»، - دەدى ول.

«وسى فاكتىلەر مەن قازاقستان پرەزيدەنتىنىڭ قازاقستاننىڭ عىلىمي، ءبىلىم بەرۋ ۇيىمدارى مەن ءبىزدىڭ ۋنيۆەرسيتەت اراسىنداعى دوستىق، سەرىكتەستىك قاتىناستاردى دامىتۋداعى ءرولىن ەسكەرە وتىرىپ، قازان فەدەرالدىق ۋنيۆەرسيتەتىنىڭ عىلىمي كەڭەسى 2017 -جىلعى قازان ايىندا قازاقستان رەسپۋبليكاسىنىڭ پرەزيدەنتى، ەكونوميكا عىلىمدارىنىڭ دوكتورى نازاربايەۆ نۇرسۇلتان ءابىش ۇلىنا «قازان فەدەرالدىق ۋنيۆەرسيتەتىنىڭ قۇرمەتتى دوكتورى» اتاعىن بەرۋگە ءبىراۋىزدان شەشىم قابىلدادى»، - دەدى ي. عافۋروۆ.

ءوز كەزەگىندە، قازاقستان پرەزيدەنتى رەسپۋبليكا باسشىلىعىنا ىستىق ىقىلاس ءۇشىن العىس ءبىلدىرىپ، ۋنيۆەرسيتەتتىڭ باي اكادەميالىق جانە عىلىمي بازاسىن، يننوۆاتسيالار سالاسىنداعى ءىس جۇزىندەگى جەتىستىكتەرىن اتاپ كورسەتتى.

«سوناۋ 1804 -جىلى قۇرىلعان قازان فەدەرالدىق ۋنيۆەرسيتەتى - رەسەيدىڭ ەڭ كونە جوعارى وقۋ ورىندارىنىڭ ءبىرى. ول الەمنىڭ ۇزدىك 350 جوعارى وقۋ ورنى تىزىمىنە كىرەدى. وسىنداي بەدەلدى ج و و- دا قازاقستاندىق جاستاردىڭ ءبىلىم الىپ جاتقانى قۋانتادى. قازىرگى تاڭدا مۇندا ءتۇرلى باعدارلامالار بويىنشا 500-دەن استام قازاقستاندىق ستۋدەنتتەر، ال بۇكىل تاتارستاندا 1217 ۇل-قىزىمىز وقىپ ءجۇر»، - دەدى نۇرسۇلتان نازاربايەۆ.