قىتاي ساراپشىلارى ق ر پرەزيدەنتىنىڭ ش ى ۇ اياسىنداعى باستامالارىن جوعارى باعالادى
قىتايدىڭ جەتەكشى «اقىل-وي» ورتالىقتارىنىڭ ءبىرى سانالاتىن قىتايدىڭ قازىرگى زامانعى حالىقارالىق قاتىناستارى اكادەمياسىنىڭ عىلىمي قىزمەتكەرى سيۋي تاو نۇرسۇلتان نازاربايەۆتىڭ بەيجىڭ-استانا-ماسكەۋ-بەرلين باعىتى بويىنشا ەۋرازيالىق جوعارى جىلدامىقتى تەمىرجول ماگيسترالىن سالۋ جونىندەگى ۇسىنىسىنا نازار اۋدارعان.
«قازاقستان پرەزيدەنتى ۇسىنعان مەگاجوبانىڭ ماڭىزى وتە زور. ويتكەنى ول ساۋدا-ەكونوميكالىق جانە مادەني-گۋمانيتارلىق بايلانىستاردى ودان ءارى دامىتا وتىرىپ، ش ى ۇ- نا مۇشە مەملەكەتتەرىنىڭ ەۋروپا ەلدەرىمەن ءتيىمدى قارىم-قاتىناستارىن قالىپتاستىرۋعا قاجەتتى جاعداي جاسايدى»، - دەدى ساراپشى.
ول سونىمەن قاتار، نۇرسۇلتان نازاربايەۆتىڭ ش ى ۇ- نا مۇشە مەملەكەتتەردىڭ بارلىعىنىڭ ۇلتتىق ۆاليۋتالارىمەن ەسەپتەسۋگە كوشۋ قاجەتتىگى جونىنەگى باستاماسىنىڭ ماڭىزى زور ەكەنىنە توقتالدى.
«مۇنداي تاجىريبە سىرتقى فاكتورلاردىڭ سالدارىنان پايدا بولاتىن قارجىلىق تاۋەكەلدەردى ازايتادى»، - دەدى سيۋي تاو.
قىتاي قوعامدىق عىلىمدار اكادەمياسىنىڭ رەسەي، شىعىس ەۋروپا جانە ورتالىق ازيا ينستيتۋتى ديرەكتورىنىڭ ورىنباسارى سۋن ليدىڭ پىكىرىنشە، نۇرسۇلتان نازاربايەۆتىڭ تسينداوداعى ش ى ۇ سامميتىندە كوتەرگەن باستامالارى مەن ق ح ر ءتوراعاسى شي جينپيڭمەن وتكىزگەن كەلىسسوزدەردىڭ قورىتىندىلارى قازاقستان باسشىسىنىڭ كورەگەندى كوشباسشى ەكەندىگىن كورسەتتى.
«ن. نازاربايەۆ ەكونوميكانى سيفرلاندىرۋ مەن جاڭعىرتۋعا كوپ كوڭىل ءبولىپ وتىر. قازاقستان باسشىسى اتالعان ماسەلەگە مەملەكەتتىڭ ىشكى جاعدايىندا دا، ناقتىراق ايتقاندا ءوزىنىڭ قازاقستان حالقىنا جولداعان جولداۋىندا دا جانە حالىقارالىق دەڭگەيدە دە باسىمدىق بەرىپ وتىر. مەن ق ر پرەزيدەنتىنىڭ ش ى ۇ سامميتىندە سيفرلاندىرۋ مەن جاڭا تەحنولوگيالار سالاسى بويىنشا تاجىريبە الماسۋ ماقساتىندا الاڭ قالىپتاستىرۋ جونىندەگى باستامالارى تۋرالى ايتىپ وتىرمىن. بۇل راسىندا دا جاھاندىق ەكونوميكانىڭ ترەندتەرىنىڭ ءبىرى جانە ونسىز قازىرگى زاماندا قارقىندى قادام جاساۋ مۇمكىن ەمەس»، - دەدى ول.
ساراپشى ەكونوميكانى ءارتاراپتاندىرۋ، سيفرلاندىرۋ، ەلەكتروندى ساۋدا سياقتى ماسەلەلەردىڭ قازاقستان مەن قىتاي باسشىلارىنىڭ كەزدەسۋىنىڭ قورىتىندىسى بويىنشا جاسالعان مالىمدەمەگە كىرگىزىلگەندىگىن ايتتى.
«قازاقستان پرەزيدەنتى قازاقستان مەن وزگە ەلدەرگە اۋقىمدى ينفراقۇرىلىمدىق قۇرىلىستىڭ كەلۋىنە ىقپال ەتەتىن مۇمكىندىك پەن مۋلتيپليكاتيۆتى ەكونوميكالىق قارقىندى ءبىرىنشى بولىپ بايقاعان ازاماتتاردىڭ ءبىرى. سونداي-اق نۇرسۇلتان نازاربايەۆ ق ح ر ءتوراعاسىنىڭ «ءبىر بەلدەۋ - ءبىر جول» باستاماسىن ءبىرىنشى بولىپ قولدادى جانە «نۇرلى جول» جاڭا ەكونوميكالىق ساياساتىن ۇسىنىپ، وسى باعىتتا ىنتىماقتاستىقتا تاباندى جۇمىس ىستەپ كەلەدى.
مىسالى تسينداودا وتكەن ش ى ۇ سامميتىندە نۇرسۇلتان نازاربايەۆ بەيجىڭ-استانا-ماسكەۋ-بەرلين باعىتى بويىنشا ەۋرازيالىق جوعارى جىلدامىقتى تەمىرجول ماگيسترالىن سالۋ جوباسىن سالۋدى ۇسىندى»، - دەدى سۋن لي.
