ۇلتتىق ۆاليۋتامەن ساۋدا-ساتتىق جۇرگىزۋ نە ءۇشىن قاجەت - ەلباسىنىڭ جاۋابى

چيڭداۋ. قازاقپارات - قىتايعا مەملەكەتتىك ساپارىن قورىتىندىلاپ، قازاقستاندىق ب ا ق وكىلدەرىنە سۇحبات بەرگەن ق ر پرەزيدەنتى نۇرسۇلتان نازاربايەۆ ۇلتتىق ۆاليۋتامەن ساۋدا-ساتتىق جۇرگىزۋ نە ءۇشىن قاجەت ەكەنىن ايتتى، دەپ حابارلايدى قازاقپارات ءتىلشىسى.

ش ى ۇ سامميتى بارىسىندا ەلباسى ش ى ۇ-نىڭ بارلىق ەلدەرىنىڭ ۇلتتىق ۆاليۋتاسىندا ءوزارا ەسەپ ايىرىسۋعا كوشۋدى ەكونوميكانىڭ قاۋىپسىزدىك اسپەكتىلەرىنىڭ ءبىرى رەتىندە ويلاستىرعان ءجون ەكەندىگىن ايتقان بولاتىن. سۇحبات بارىسىندا مەملەكەت باسشىسى وسى ماسەلەگە كەڭىنەن توقتالدى.

«بۇل باياعىدان كوتەرىلىپ كەلە جاتقان ماسەلە. رەسەي مەن قىتاي اراسىنداعى ساۋدا-ساتتىق وتكەن جىلى 80 ميلليارد دوللارعا جەتتى. امەريكالىق دوللار دا كىرپياز. نە ىستەگىسى كەلسە، سونى جاسايدى دەۋگە دە بولادى. قىتاي مەن قازاقستان اراسىنداعى ساۋدانى تەڭگەمەن جانە يۋانمەن جۇرگىزسەك، بىزگە پايدالى بولار ەدى. بۇل تەك ءبىزدىڭ عانا ماسەلەمىز ەمەس. بۇكىل ءوڭىر، رەسەي بۇل جۇمىستاردى جۇرگىزىپ كەلەدى جانە ول وڭاي دا ەمەس. ولار بىزدەن تەڭگەمەن، ءبىز ولاردان يۋانمەن ساتىپ الامىز. ول ءۇشىن اتالعان قاراجاتتىڭ بازاسىن قۇرۋ قاجەت. بانكتەردە مۇنداي اقشا، قانداي دا ءبىر دەپوزيت بولۋى ءتيىس»، - دەدى نۇرسۇلتان نازاربايەۆ.

ق ر پرەزيدەنتىنىڭ ايتۋىنشا، ساۋدا-ساتتىقتى ۇلتتىق ۆاليۋتادا جۇرگىزۋدىڭ كەلەشەگى بار.

«مەن مۇنداي جەلىنى قولدايمىن. بۇل ءتيىمدى بولادى. ءتىپتى بىزدە قازاقستان مەن رەسەي اراسىندا رۋبل مەن تەڭگەگە كوشۋ قاجەت دەگەن پىكىر بار. 100 پايىز بولا قويماس. سەبەبى باتىستان يمپورت الاتىن بولساق، ءبارىبىر دە دوللار قاجەت»، - دەدى مەملەكەت باسشىسى.

مەملەكەت باسشىسى بۇل باعىتتا ءتيىستى تاپسىرمالاردىڭ بەرىلگەنىن جانە ۇلتتىق ۆاليۋتادا ساۋدا-ساتتىق جاساۋ ناقتى بيىل ەنگىزىلمەيتىندىگىن ايتتى.

«ش ى ۇ-عا مۇشە ەلدەردىڭ ەشقايسى قارسىلىق تانىتقان جوق. ەندى قارجىگەرلەر بىرلەسىپ جۇمىس ىستەپ، بىزگە ۇسىنىس ەنگىزۋى ءتيىس. اعىمداعى جىلى انىق بولمايدى»، - دەدى ەلباسى.