نۇرسۇلتان نازاربايەۆ شي جينپيڭنەن قانداي سىيلىق العانىن ايتتى

چيڭداۋ. قازاقپارات - كەشە قىتايعا مەملەكەتتىك ساپارىن قورىتىندىلاپ، قازاقستاندىق ب ا ق وكىلدەرىنە سۇحبات بەرگەن ق ر پرەزيدەنتى نۇرسۇلتان نازاربايەۆ ق ح ر ءتوراعاسى قانداي سىيلىق بەرگەنىن ايتتى، دەپ حابارلايدى قازاقپارات ءتىلشىسى.

«ادەتتە مەملەكەت باسشىلارى ءبىر نارسە سىيلاپ جاتادى. ەگەر ماعان نە سىيلاعانىن بىلگىلەرىڭىز كەلسە مۋزەيگە بارىڭىزدار. سوندا بارلىعى تۇر، بىرەۋلەر ۆازا سىيلاعان. بۇل جەردە دە ادەمى ۆازالار سىيلاپ جاتادى. كىتاپحانادا پرەزيدەنت مۋزەيى بار (استاناداعى ەلباسى كىتاپحاناسى). بارلىعى سول جەرگە تابىستالادى. كەشە ماعان 15 مەترلىك جىبەك ماتا سىيلادى. وندا قىتاي تاۋلارى بەينەلەنگەن، جازۋ بار. ونى دا تاپسىرامىن. مۇنداي تاجىريبە بار، اڭگىمە قىمبات، باعاسىندا ەمەس. مۇنى ايتۋ ادەپكە جاتپايدى. ەڭ ماڭىزدىسى كوڭىل اۋدارۋ. مەن قوراپتاعى تاۋ بارىسىنىڭ كۇمىس بەينەسىن سىيعا تارتتىم»، - دەدى ەلباسى.

نۇرسۇلتان نازاربايەۆ قىتاي ءتوراعاسىنىڭ رەسەي پرەزيدەنتىنە وردەن بەرگەنىن ايتتى.

«مۇنداي جاعدايدا رەسەي پرەزيدەنتىنە بارلىعىمىز قولداۋ كورسەتۋىمىز قاجەت. مەن قولداۋ كورسەتۋ ءۇشىن فۋتبول ويىندارىنىڭ اشىلۋىنا بارامىن. ادەتتە فينالدىق ويىنعا بارىپ جاتادى. ال مەن قولداۋ ءۇشىن بارامىن. كەيبىرەۋلەر نارازىلىق تانىتىپ جاتىر. ال ءبىز جاقىن دوسپىز، بارۋىمىز قاجەت. مەملەكەت باسشىلارىنىڭ اراسىنداعى قارىم-قاتىناس ءارتۇرلى قالىپتاسىپ جاتادى. دوستىق قارىم-قاتىناس دوستىقتى تۋىنداتادى. ساياساتكەرلەردىڭ دوستىعى ماحاببات ەمەس»، - دەدى مەملەكەت باسشىسى.