دەنيس تەن جانە ونىڭ دوستارى قازاقتىڭ ۇلتتىق كيىمىندە ونەر كورسەتتى
مانەرلەپ سىرعاناۋ جۇلدىزدارى، جاندى مۋزىكا، تەاترلىق قويىلىم، يننوۆاتسيالىق تەحنيكالىق ەلەمەنتتەر - وسىنىڭ بارلىعى دەنيس تەننىڭ مۇزدى شوۋىنان كورىنىس تاپتى. اتالعان شارا استانانىڭ 20 جىلدىعىنا وراي ق ر مادەنيەت جانە سپورت مينيسترلىگى مەن استانا قالاسى اكىمدىگىنىڭ قولداۋىمەن ۇيىمداستىرىلدى.
ەرەكشە شوۋدا كارولينا كوستنەر، ەلەنا راديونوۆا، الەنا ساۆچەنكو، برۋنو ماسسو، يان حان جانە تاعى باسقا مانەرلەپ سىرعاناۋدان الەمدىك دەڭگەيدەگى سپورت شەبەرلەرى ونەر كورسەتتى. ءاربىر مانەرلەپ سىرعاناۋشى ونەرىمەن ءتانتى ەتۋمەن قاتار قازاقستان تۋرالى ىستىق ىقىلاستارىمەن ءبولىسىپ، ونىڭ ىشىندە استانانىڭ الەمدە ەشقانداي قالاعا ۇقسامايتىن، وزىندىك ەرەكشەلىگى بار ەكەنىن ايتا كەلە ەلوردانىڭ 20 جىلدىق مەرەيتويىمەن قۇتتىقتادى.
دەنيس تەن كورسەتكەن ەرەكشە قويىلىمداردىڭ ءبىرى - ديماش قۇدايبەرگەننىڭ انىنە دايىندالعان ارنايى باعدارلاما.
«بۇل قويىلىمدى پحەنچحان قىسقى وليمپياداسىنىڭ فينالىندا كورسەتۋىم كەرەك ەدى، وكىنىشكە قاراي ول كەزدە ءساتى تۇسپەدى، سوندىقتان دايىندىعىمنىڭ كوپ ۋاقىتى جۇمسالعان باعدارلامامدى بۇگىن كورسەتۋدىڭ رەتى كەلگەن سەكىلدى»، - دەپ، ءوز ويىمەن ءبولىستى ول.
كورەرمەندەر ءۇشىن شارانىڭ باستى توسىنسىيى شوۋ سوڭىندا دەنيس تەن جانە ونىڭ دوستارى قازاقتىڭ ۇلتتىق كيىمىندە، قازاق ۇلتتىق-سيمفونيكالىق وركەسترىنىڭ قولداۋىمەن ونەر كورسەتۋى بولدى. ءتانتى بولعان كورەرمەندەر ورىندارىنان تۇرىپ، دۋ قول شاپالاقپەن ەرەكشە ىقىلاستارىن ءبىلدىردى.
مۇزدى شوۋداعى قويىلىمدار مەن ايرىقشا دەكوراتسيا، ادەمى كوستيۋمدەر مەن مانەرلەپ سىرعاناۋداعى قايتالانباس قيمىلدار استانا تۇرعىندارى مەن قوناقتارىنا ەرەكشە كوڭىل-كۇي سىيلادى.
