ەلباسى قىتايلىق بيزنەسمەندەرگە «استانا» قارجى ورتالىعىنىڭ جۇمىسىن تانىستىردى

 بەيجىڭ. قازاقپارات - بۇگىن قىتايعا مەملەكەتتىك ساپارى اياسىندا وسى ەلدىڭ بيزنەس كاپيتاندارىمەن كەزدەسكەن ەلباسى نۇرسۇلتان نازاربايەۆ «استانا» حالىقارالىق قارجى ورتالىعىنىڭ جۇمىسى جايىندا ايتتى، دەپ حابارلايدى قازاقپارات ءتىلشىسى.

«ءبىز وتكەن جىلى ەكسپو-2017 كورمەسىن تابىستى وتكىزدىك. وعان قىتايلىق كومپانيالار دا بارىنشا بەلسەندىلىكپەن قاتىستى، سول ءۇشىن ريزاشىلىعىمىزدى بىلدىرەمىز. ەندىگى ۋاقىتتا اتالعان نىسانداردىڭ ورنىندا «استانا» حالىقارالىق قارجى ورتالىعى جۇمىس ىستەي باستايدى. ونىڭ قۇقىقتىڭ مارتەبەسى كونستيتۋتسيالىق زاڭمەن بەكىتىلگەن، ال جۇمىس ءتىلى اعىلشىن ءتىلى سانالادى، اعىلشىن قۇقىعى مەن تاۋەلسىز اربيتراج قولدانىلادى» ، - دەپ اتاپ ءوتتى ەلباسى.

مەملەكەت باسشىسىنىڭ ايتۋىنشا، «استانا» حالىقارالىق قارجى ورتالىعىنا قاتىسۋشىلارعا 50 جىلعا سالىقتىق جەڭىلدىكتەر بەرىلەدى. ۆاليۋتالىق، ۆيزالىق جانە قۇقىقتىق رەجىم وڭايلاتىلادى.

«بۇل - وڭىردەگى جۇمىسى اعىلشىن قۇقىعىنا نەگىزدەلگەن جالعىز ورتالىق. تاۋەلسىز سوت، حالىقارالىق اربيتراجدىق ورتالىق تاراپتاردىڭ قۇقىقتارىنىڭ ءادىل قورعالۋىنا كەپىلدىك بەرەدى. ا ح ق و جوعارى تەحنولوگيالى بيرجاسىن قۇرۋعا شانحاي قور بيرجاسى مەن امەريكالىق Nasdaq بيرجاسى تارتىلدى. ا ح ق و- نىڭ جاسىل، يسلامدىق، يننوۆاتسيالىق قارجىلىق قۇرالداردى دامىتۋدا وڭىرلىك ورتالىققا اينالۋعا بارلىق مۇمكىنشىلىگى بار. بۇعان دەيىن ايتقانىمداي 5 - شىلدەدە حالىقارالىق قوعامداستىق ءۇشىن «استانا» حالىقارالىق قارجى ورتالىعىنىڭ رەسمي تۇساۋكەسەرىن وتكىزۋدى جوسپارلاپ وتىرمىز» ، - دەدى نۇرسۇلتان نازاربايەۆ.

ايتا كەتەيىك، ەلباسى نۇرسۇلتان نازاربايەۆ قىتايعا مەملەكەتتىك ساپارمەن كەلىپ، كەشە ق ح ر ءتوراعاسى سي تسزينپينمەن كەڭەيتىلگەن قۇرامدا كەلىسسوزدەر وتكىزدى.

ناتيجەسىندە بىرنەشە قۇجاتقا قول قويىلدى.