قازاقستان- قىتاي مادەني- ءبىلىم بەرۋ ورتالىعى اشىلدى
ورتالىقتىڭ سالتاناتتى اشىلۋى ونلاين جۇيەسى ارقىلى كورسەتىلىپ، وعان ەۋرازيا ۇلتتىق ۋنيۆەرسيتەتىنىڭ وقىتۋشىلارى مەن ستۋدەنتتەرى، سونداي- اق قىتايداعى Southwest ۋنيۆەرسيتەتىنىڭ وكىلدەرى قاتىستى، دەپ حابارلايدى Baq.kz اقپارات اگەنتتىگىنىڭ ءتىلشىسى.
وڭتۇستىك- باتىس ۋنيۆەرسيتەتى - قىتاي حالىق رەسپۋبليكاسىنىڭ جەتەكشى وقۋ ورنى. 80000 ستۋدەنت پەن 6000 پروفەسسور- وقىتۋشىلار قۇرامى بار.
اتالعان وقۋ ورداسى جانىنان اشىلعان ورتالىققا ل. ن. گۋميليەۆ اتىنداعى ە ۇ ۋ- ءدىڭ پراكتيكالىق قازاق ءتىلى كافەدراسىنىڭ وقىتۋشىلارى قازاق ءتىلى پانىنەن ساباق بەرەدى. پراكتيكالىق قازاق ءتىلى كافەدراسى ورتالىققا قازاق ءتىلى ماماندارىن جىبەرىپ، قاجەتتى وقۋ- ادىستەمەلىك ەڭبەكتەرمەن جانە كورنەكى قۇرالدارمەن قامتامسىز ەتپەك.
«ناۋرىز ايىندا ە ۇ ۋ دەلەگاتسياسى شيان جانە Southwest ۋنيۆەرسيتەتتەرىنە باردى. عىلىم- بىلىمگە قاتىستى ورتاق جوبالاردى ىسكە اسىرۋ ماقساتىندا مەموراندۋمعا قول قويدى. مەموراندۋمنىڭ العاشقى قادامى - بۇگىنگى ورتالىقتىڭ اشىلۋى. قىتاي ستۋدەنتتەرى قازاق ءتىلىن شەت ءتىلى رەتىندە تاڭدادى. ياعني قىركۇيەكتەن باستاپ قىرىق شاقتى ادام قازاق ءتىلىن وقيدى» ، - دەيدى ل. ن. گۋميليەۆ اتىنداعى ە ۇ ۋ- ءنىڭ فيلولوگيا فاكۋلتەتىنىڭ دەكانى شولپان جارقىنبەكوۆا.
بۇگىنگى تاڭدا ەۋرازيا ۇلتتىق ۋنيۆەرسيتەتىنىڭ قىتايدىڭ جوعارى وقۋ ورىندارىمەن ىنتىماقتاستىعى ينتەرناتسيونالداندىرۋدى دامىتۋدىڭ باسىم باعىتتارىنىڭ ءبىرى. اراداعى بۇل قارىم- قاتىناسقا 10 جىلدان استام ۋاقىت بولدى. وسى ۋاقىت ىشىندە ەۋرازيا ۇلتتىق ۋنيۆەرسيتەتى ىنتىماقتاستىقتىڭ باعىتتارىن نىعايتىپ، ءورىسىن كەڭەيتە ءتۇستى. سوندىقتان، ە ۇ ۋ قازىر قىتايدىڭ 17 جوعارى وقۋ ورىندارىمەن (شيان شەت تىلدەر ۋنيۆەرسيتەتى، مينزۋ ۋنيۆەرسيتەتى، شانحاي ۋنيۆەرسيتەتى جانە ت. ب) تىعىز بايلانىستا جۇمىس ىستەيدى. نەگىزگى باعىتتارى - اكادەميالىق ۇتقىرلىق، عىلىمي- زەرتتەۋ قىزمەتى، پروفەسسور- وقىتۋشىلار الماسۋ، قوس ديپلوم باعدارلاماسى، ت. ب.
«ە ۇ ۋ بۇگىنگە دەيىن دۇنيەجۇزىندەگى جەتەكشى وقۋ ورىندارىمەن تىعىز قارىم- قاتىناس ورناتقان. سوڭعى 4-5 جىلدا قازاق ءتىلدى ورتالىقتار اشىپ، سول ەلدەگى قازاق ءتىلىن وقۋعا، مادەنيتەتتى تانۋعا قىزىعۋشىلىق تانىتقان تالاپكەرلەرگە جاعداي جاساپ جاتىر» ، - دەيدى ل. ن. گۋميليەۆ اتىنداعى ە ۇ ۋ- ءنىڭ قىتاي ءتىلى كافەدراسىنىڭ مەڭگەرۋشىسى دۇكەن ءماسىحان ۇلى.
تۇڭعىش جارىق كورگەن قازاقشا- قىتايشا سوزدىكتىڭ اۆتورى دۇكەن ءماسىمحان ۇلىنىڭ ايتۋىنشا، ورتالىقتىڭ اشىلۋى ەكى ەلدىڭ دوستىق قارىم- قاتىناسىنىڭ نىعايۋۋىنا ۇلكەن سەرپىن بەرەتىن شارا.
ايتا كەتەيىك، ل. ن. گۋميليەۆ اتىنداعى ە ۇ ۋ- دە سوڭعى ءۇش جىل ىشىندە قىتايدان كەلگەن 60 تان استام ستۋدەنت اكادەميالىق ۇتقىرلىق باعدارلاماسى بويىنشا ءبىلىم السا، ءبىزدىڭ ستۋدەنتتەر مەن ماگيسترانتتار كۇنشىعىس ەلىندەگى ورتالىق مينزۋ ۋنيۆەرسيتەتى، شەت تىلدەر ۋنيۆەرسيتەتى، انشان ۋنيۆەرسيتەتىنە وقۋعا بارىپ قايتادى.
اقمارال اعزام قىزى
