استانادا گاز الدىمەن جەكە ۇيلەرگە تارتىلادى - مينيستر بوزىمبايەۆ
ق ر ەنەرگەتيكا ءمينيسترى قانات بوزىمبايەۆتىڭ ايتۋىنشا، شىلدە ايىندا «سارىارقا» گاز قۇبىرىنىڭ قۇرىلىسى سالتاناتتى تۇردە باستالادى. ال جىلدىڭ اياعىنا دەيىن قۇبىردىڭ العاشقى بولىگى - «قىزىلوردا- جەزقازعان- قاراعاندى- تەمىرتاۋ- استانا» جەلىسى اياقتالۋى قاجەت. وعان شامامەن 267,3 ميلليارد تەڭگە جۇمسالادى. «بۇگىندە قاراعاندى مەن اقمولا وبلىستارى، سونداي- اق استانا قالاسىنىڭ اكىمدىگى گازدى تاراتۋ جەلىلەرىنە قاتىستى جوسپاردى ازىرلەدى. اتالعان يفراقۇرىلىم ماگيسترال قۇرىلىسىمەن قاتار تارتىلۋى قاجەت. ەلورداعا دەيىنگى ارالىقتا 171 ەلدى مەكەن گازبەن قامتىلادى دەگەن جوسپار بار. ال استانانىڭ وزىندە كوگىلدىر وتىن الدىمەن كوكتال-1، كوكتال-2، تەمىرجولشىلار، وڭتۇستىك- شىعىستىڭ وڭ جانە سول جاعىنا تارتىلادى. سونداي- اق، جىلۋ ەلەكتر ستانساسىنا دا گاز تارتىلاتىن بولادى. سونىڭ ارقاسىندا ەكولوگيانى ايتارلىقتاي جاقسارتۋعا مۇمكىندىك بار»، - دەدى ق. بوزىمبايەۆ قوعامدىق كەڭەستىڭ وتىرىسىندا.
ايتا كەتەيىك، بۇگىنگى كەڭەستە ق. بوزىمبايەۆ مۇناي ءوندىرۋ كولەمىنە قاتىستى بولجام جاسادى. ونىڭ ايتۋىنشا، قازاقستاندا مۇناي ءوندىرۋ كولەمى 104 ميلليون تونناعا جەتەتىن بولادى. جاقىن ارادا قازاقستان ىشكى نارىقتى وتاندىق جانار- جاعار مايمەن تولىعىمەن قامتاماسىز ەتە الادى. «بيىل شىمكەنت مۇناي وڭدەۋ زاۋىتىن جاڭارتۋ جۇمىستارى اياقتالادى. وسىلايشا، مۇناي وڭدەۋدىڭ جالپى كولەمى 16 ميلليون تونناعا جەتەتىن بولادى. سوسىن مۇناي وڭدەۋ زاۋىتتارىن جىل سايىن جوندەۋ ۋاقىتى 45 كۇننەن 20 كۇنگە دەيىن قىسقارتۋ تۋرالى شەشىم قابىلداندى. ەندى، 45 كۇندىك جوندەۋ جۇمىستارى ءۇش جىلدا ءبىر رەت قانا جاسالادى. قالعان ۋاقىتتا 20 كۇندىك جوندەۋ جۇرگىزىلەدى. بۇنىڭ بارلىعى جوندەۋ جۇمىستارىن باسقارۋدىڭ اۆتوماتتى جۇيەسى اياسىندا اتقارىلادى. اتالعان جۇيەنى ءبىز اعىمداعى جىلدا ەنگىزەتىن بولامىز. ال جوندەۋ مەرزىمى قىسقارعاننان كەيىن مۇناي وڭدەۋ كولەمى ارتادى. ءسويتىپ، ءاربىر زاۋىتتا دايىن مۇناي ونىمدەرى شامامەن 300 مىڭ تونناعا كوبەيەدى. الداعى ۋاقىتتا ءبىز ىشكى نارىقتى تولىعىمەن وتاندىق جانار- جاعارمايمەن قامتاماسىز ەتە الامىز»، - دەپ اتاپ كورسەتتى ق. بوزىمبايەۆ.
