ناسا مارسقا ۇشۋعا ءازىلقوي ادامداردى تاڭدايدى - زەرتتەۋ
ءبىرىنشى كەزەكتە عارىشكەرلەردىڭ كوپشىلىك ورتاعا تەز بەيىمدەلىپ، كوماندادا جۇمىس ىستەي الۋ قابىلەتى ەسكەرىلەدى. سەبەبى، قىزىل عالامشارعا بارعاندا ولاردىڭ ءبىر- بىرىمەن قارىم- قاتىناسى جاقسى بولۋى ءتيىس، دەپ حابارلايدى naked-science.ru سايتى.
عالىمداردىڭ جاڭا زەرتتەۋ جۇمىسى American Psychologist جۋرنالىندا جاريالاندى. بۇل زەرتتەۋ جۇمىسىندا NASA- نىڭ عارىشتى مەڭگەرەتىن كوماندا مۇشەلەرىن پسيحولوگيالىق تۇرعىدان قالاي باعالايتىنى تۋرالى جازىلعان. زەرتتەۋ جۇمىسىنىڭ ناتيجەسىندە NASA- نىڭ كوماندا قۇرۋ بارىسىندا ونىڭ مۇشەلەرىن پسيحولوگيالىق تۇرعىدان باعالاپ، ازىلگە جاقىن ادامداردى تاڭدايتىنى بەلگىلى بولدى.
NASA ەكستراۆەرتتەردى تاڭدايتىنىنا قاراماستان، كوماندا مۇشەلەرىنىڭ تىم اڭگىمەشىل بولعاندارىن قالامايدى. سونداي- اق، ولارعا تۇيىق ادامدار دا قاجەت ەمەس. اگەنتتىك نەلىكتەن سوزشەڭ ادامداردى تاڭدامايتىنىن تۇسىندىرگەن جوق.
NASA عارىشكەرلەرگە قوياتىن ناقتى تالاپتارىن قۇپيادا ۇستاسا دا، سوڭعى زەرتتەۋ جۇمىسىنىڭ ارقاسىندا ولاردىڭ عارىشكەرلەر بويىندا تومەندەگى قاسيەتتەردىڭ بولۋىن ەسكەرەتىنى انىقتالدى.
«ۇسىنىپ وتىرعان تۇلعا پروفيلى ەموتسيونالدىق تۇراقتىلىق، جوعارى جانە وتە جوعارى كىشىپەيىلدىلىك، تاجىريبە جيناۋدا ورتاشا اشىقتىق، ادامگەرشىلىك، تىم جوعارى باعادان ساقتاندىراتىن تومەننەن باستاپ ورتاشا جوعارى مولشەردەگى ەكستراۆەرسيانى قامتيدى. تىم جوعارى نەمەسە تىم تومەن كورسەتكىشتەر ادامنىڭ عارىشكەر بولا المايتىنىنىڭ بەلگىسى» ، - دەلىنگەن زەرتتەۋ جۇمىسىندا.
سونداي- اق، زەرتتەۋ جۇمىسىندا مارسقا جىبەرەتىن كوماندا قۇرۋدا ءازىلقويلىق قاسيەتى جوعارى باعالاناتىنى تۋرالى جازىلعان. سەبەبى، كەي ادامدار قيىندىققا تاپ بولعاندا ازىلدەسىپ، كوماندانىڭ رۋحىن كوتەرە الادى. الايدا بۇل ايتىلاتىن ازىلدەر ەشكىمنىڭ نامىسىنا تيمەيتىندەي ورىندى بولۋى ءتيىس.
Baq.kz
