ستۋدەنتتەر قازاقستان جەتىستىكتەرىن شەتەلدە ناسيحاتتاۋدىڭ تىڭ جولىن تاپتى
نەگىزگى ماقسات - قازاقستان جەتىستىكتەرىن شەتەلگە ناسيحاتتاۋدىڭ تىڭ ءادىسىن تالقىلاپ، باسقا ۋنيۆەرسيتەتتەرگە تاراتۋ، دەپ حابارلايدى قازاقپارات ءتىلشىسى.
ۋنيۆەرسيتەت رەكتورى ەرلان سىدىقوۆتىڭ ايتۋىنشا، اتالعان جوعارى وقۋ ورنىندا وقىپ جۇرگەن شەتەل ستۋدەنتتەرى تىڭ باستامانى وزدەرى كوتەردى. «ولار: «ءبىر جىلدىڭ ىشىندە قازاقستاندا رۋحاني جاڭعىرۋعا قاتىستى ءبىراز شارالار اتقارىلدى. سونى ءوز كوزىمىزبەن كورىپ، ءتانتى بولدىق. بىزگە قاتتى ۇناپ وتىر. قازىر دەمالىسقا شىعىپ جاتىرمىز. ەندى، وسى جەردە كورىپ- بىلگەنىمىزدى ءوز ەلىمىزگە جەتكىزسەك، حالقىمىزعا وي سالىپ، ناسيحاتتاساق» ، - دەيدى. وسىعان بايلانىستى ارنايى فورۋم ۇيىمداستىرىلىپ وتىر. بۇنىڭ بارلىعى - ءوز ۋنيۆەرسيتەتىمىزدە وقىپ جاتقان 500 شەتەل ستۋدەنتى مەن 50 شاقتى شەتەلدىك عالىمنىڭ باستاماسى. ولار ءبىر اپتادان كەيىن دەمالىسقا شىعىپ، ءوز ەلدەرىنە قايتادى. سوندا قازاقستانداعى قازىرگى وزگەرىستەردى ءوز ەلىمىزگە دە ايتامىز دەپ وتىر» ، - دەدى ە. سىدىقوۆ قازاقپارات تىلشىسىنە بەرگەن سۇحباتىندا.
رەكتوردىڭ سوزىنە قاراعاندا، ۋنيۆەرسيتەت پرەزيدەنتتىڭ «رۋحاني جاڭعىرۋ. بولاشاققا باعدار» اتتى ماقالاسىن التى تىلگە اۋدارىپ، بارلىق ماتەريالداردى شەتەل ستۋدەنتتەرىنە تاراتىپ بەرگەن.
«ولار ەكى باعىتتى ۇسىندى. بىرەۋىن «1001 قادام» دەپ اتادى. ءبىز ءارقايسىسىمىز ءۇش ايدىڭ ىشىندە قازاقستانعا قاتىستى «1001 قادام» جاساۋىمىز قاجەت دەدى. الەۋمەتتىك جەلىدە ايتارىمىز بار، قازاقستان تۋرالى كىتاپتاردى تاراتامىز، بولماسا، جەرگىلىكتى تەلەديدار مەن گازەت ارقىلى اقپارات بەرەمىز دەپ، وزدەرى وسىنداي مىندەت الىپ وتىر. مەن ءوزىم قازاقستان رەكتورلارى كەڭەسىنىڭ ءتوراعاسى بولعاننان كەيىن ءوزىمنىڭ ارىپتەستەرىمە دە وسى باستامانى قولعا الۋدى ۇسىنىپ وتىرمىن. ويتكەنى قازاقستاندا 13 مىڭنان استام شەتەلدىك ستۋدەنت وقيدى. ولاردىڭ بارلىعى جازدا ءوز ەلدەرىنە قايتادى. 13 مىڭ ادام قازاقستان تۋرالى ايتسا، ءوز ەلىمىزدى كەڭىنەن تانىتا الامىز. وسىنى باسقا ۋنيۆەرسيتەتتەر ارى قاراي الىپ كەتەدى دەگەن ءۇمىت بار»، - دەپ اتاپ كورسەتتى ە. سىدىقوۆ.
