ساكەن سەيفۋلليننىڭ ءوز قولىمەن جازىلعان ءومىربايانى تابىلدى
الاش ارىسى ءوزى تۋرالى ءومىربايان، انىقتامالاردى پارتيزان قاتارىندا، قىزىل گۆارديا ساپىندا بولعانىن دالەلدەپ، الماتى قالالىق اتقارۋ كوميتەتىنىڭ جانىنان قۇرىلعان كوميسسياعا وتكىزگەن. اتىلارىنان ەكى جىل بۇرىن جينالعان قۇجاتتار قىزىل جەندەتتەردىڭ قولىنا قالاي تۇسپەي قالعان؟
ساكەن سەيفۋلليننىڭ جەكە ءىس قۇجاتى الماتى قالالىق مەملەكەتتىك ارحيۆىنىڭ ءنومىرى 177-قورىندا ساقتالعان. 8 بەتتەن تۇراتىن اسا ماڭىزدى قۇجاتتىڭ ىشىندە ەڭ قۇندى بولىپ سانالاتىن ول ساكەن سەيفۋلليننىڭ ءوزىنىڭ قولىمەن جازعان ءومىربايانى جانە قىزىل پارتيزان قوعامدىعىنا مۇشەلىككە ءوتۋ ءۇشىن جازعان ءوتىنىشى. بۇل ءىس قاعازدارى الداعى ۋاقىتتى اسا قۇندى قۇجاتتار ەنگىزىلىپ، 500 جىلعا دەيىن ساقتالاتىن ساقتاندىرۋ قورىنا جىبەرىلمەك.
ارحيۆتى اقتارعان ادامداردىڭ ايتۋىنشا، ساكەن قۇجاتتاردى قالالىق اتقارۋ كوميتەتىنىڭ جانىنان قۇرىلعان كوميسسياعا ءوزىنىڭ پارتيزان قاتارىندا كولچاك اسكەرىنە قارسى سوعىسقانىن دالەلدەۋ جانە قىزىل گۆارديا بيلەتىن الۋ ماقساتىندا وتكىزگەن. 1935 -جىلعى جازدىڭ ەكى ايىندا جيناعان قۇجات بارىسىندا ساكەن ءومىربايانىن ايتا وتىرىپ، ساياسي قۇيتۇرقى ساۋالدارعا دا جاۋاپ بەرەدى.
«كولچاكوۆ باستاعان كونتررەۆوليۋتسينەرلەرگە قارسى وترياد قۇرىلا باستاعاندا ساكەن سەيفۋللين سول بۇلىكشىلەرگە قارسى كۇرەسكەن ەكەن. وكىنىشكە وراي، ساكەن بۇلىك كەزىندە قولعا ءتۇسىپ قالىپ، «ءولىم ۆاگونىنا» جونەلتەدى دە، انەنكوۆتىڭ جازالاۋ وتريادىنا بەرەدى. ول جەردە بۇلاردى ءولىم كۇتىپ تۇرعانى بىلەدى دە، ساكەن قوقىس شىعاراتىن اربامەن قاشىپ شىعۋعا مۇمكىندىك الادى»، - دەدى الماتى قالاسى ورتالىق مەملەكەتتىك ارحيۆىنىڭ باس قور ساقتاۋشىسى گۇلباقىت قۇرمانجانوۆا.
ماسكەۋدىڭ رەۆوليۋتسيالىق قوزعالىسقا قاتىسقاندارعا جەڭىلدىك بەرۋ دەگەن جەلەۋىمەن جيناعان قۇجاتتارىنان سوڭ، ءسادۋاقاس قىزىل پارتيا قوعامىنىڭ مۇشەسىنە ءوتىپ، بيلەت العان. ءبىراق كەيىن قارجىلىق جەڭىلدىك العان- الماعانى بەلگىسىز. تەك ساۋالنامادا ءوزىن «كەدەيمىن، تابىسىم 500 رۋبل»، «كولىك پەن باسپا ماشيناسى كەرەك» دەپ كورسەتكەن ەكەن. ال ەكى جىلدان سوڭ ءوزىن تەرگەپ، تەكسەرىپ، سوڭىندا اتۋ جازاسىنا كەسكەن قىزىل جەندەتتەردىڭ قولىنا قولجازبانىڭ تۇسپەي قالۋ سەبەبىن، ارحيۆتەگىلەر قۇجاتتاردى «قىزىلگۆارديا» دەگەن توپتامانىڭ ىشىندە كەتىپ قالۋى مۇمكىن ەكەندىگىمەن ءتۇسىندىردى. 83 جىلدان سوڭ جاريا بولعان قولجازبانى ماماندار ميكروفيشقاعا اينالدىرماق.
«ميكروفيشكاعا اينالادى. بۇل ميكروفيشكاعا 98 بەتكە دەيىن سيادى. بۇل مينكروفيشكالار 500 جىلعادەيىن ساقتالادى، بەس عاسىرعا. الداعى ۋاقىتتا ساكەن سەيفۋلليننىڭ دە قۇجاتتارىن وسىنداي ميكروفيشتەرگە اۋدارامىز»، - دەدى الماتى قالاسى ورتالىق مەملەكەتتىك ارحيۆىنىڭ ءبولىم جەتەكشىسى دينارا سادىربايەۆا.
مامانداردىڭ مالىمەتىنشە، مۇراعاتتا 1 ميلليون 52 مىڭنان استام ءىس قۇجاتتارى بولسا، وسى ۋاقىتقا دەيىن ولاردىڭ 25 مىڭى اسا قۇندى قۇجاتتاردىڭ تىزىمىنە كىرگەن. 1749 قوردىڭ تەك 150 ى عانا ساراپتاۋدان وتكەنىن ەسكەرسەك، ءالى الاش ارىستارىنىڭ وسى كۇنگە دەيىن بەلگىسىز قىرلارى كوپ اشىلماق - دەيدى وسىنداعى زەرتتەۋشىلەر.
