تۇرعىن ءۇي قۇرىلىس جيناق بانكى دەپوزيتتەرىن ءۇشىنشى تۇلعالارعا ساتۋعا رۇقسات بەرىلدى

استانا. قازاقپارات - تۇرعىن ءۇي قۇرىلىس جيناق بانكىنىڭ («بايتەرەك» حولدينگتىنىڭ ەنشىلەس ۇيىمى) سالىمشىلارى ءوز دەپوزيتتەرىن باسقالارعا ساتا الادى. بۇل ونلاين- تابىستاۋ جاڭا قىزمەتىن ىسكە قوسۋ ارقىلى قولجەتىمدى بولدى جانە «ت ق ج ب 24» ينتەرنەت- بانكينگىنە ەنگىزىلدى، - دەپ حابارلايدى قازاقپارات ءتىلشىسى بانكتىڭ باسپا ءسوز قىزمەتىنە سىلتەمە جاساپ.
«جىل باسىنان بەرى 83 مىڭنان استام قازاقستاندىق تۇرعىن ءۇي قۇرىلىس جيناق بانكىندە ەسەپشوت اشتى. ەگەر ولار تۇراقتى تۇردە اقشا جيناپ، بانك تالاپتارىن ورىنداسا، ياعني ەڭ كەمى ءۇش جىل اقشا جيناپ، باعالاۋ كورسەتكىشىن 16 عا دەيىن جەتكىزسە، % 5 مولشەرلەمەدە تۇرعىن ءۇي زاەمىن بەرەدى. بانكتە مۇنداي كليەنتتەر كوپ، ءبىراق زاەمگە جەتسە دە، بەلگىلى ءبىر سەبەپتەرمەن كەلىسىمشارتتى توقتاتىپ، جيناقتى الىپ كەتەتىندەر بار. ءدال وسى جاعدايدا ولارعا جاڭا ونلاين- تابىستاۋ قىزمەتى كادەگە جارايدى. سەبەبى، جيناق مەرزىمى جەتكىلىكتى ەسەپشوتتى ساتىپ العىسى كەلەتىندەر كوپ. سوندا ولار دا ۇزاق كۇتپەي، تومەن پروتسەنتپەن تۇرعىن ءۇي زايەمىن الا الادى»، - دەپ ءتۇسىندىردى تۇرعىن ءۇي قۇرىلىس جيناق بانكى باسقارماسىنىڭ ءتورايىمى ءلاززات يبراگيموۆا.
قازىر دەپوزيتتەردى جاقىن تۋىستارعا عانا قايتا تابىستاۋعا بولادى. سالىمشىلار اراسىنداعى الىپساتارلىققا جول بەرمەۋ جانە مەملەكەتتىك باعدارلامالار اياسىندا پاتەر الۋ ءتارتىبىن بۇزباۋ ماقساتىندا بانك ءبىر كەزدەرى دەپوزيتتەردى ءۇشىنشى تۇلعالارعا ساتۋعا تىيىم سالعان ەدى. ونلاين- تابىستاۋ قىزمەتىن ازىرلەۋ مەن ىسكە قوسۋدا بۇل جاعداي ەسكەرىلدى. جاڭا تاسىلمەن ساتىپ الىنعان ەسەپشوتتار كومەگىمەن باسپانانى تەك كوممەرتسيالىق نارىقتا عانا ساتىپ الۋعا بولادى. مۇنداي دەپوزيتتەرمەن مەملەكەتتىك باعدارلامالارعا قاتىسۋعا تىيىم سالىنادى. سوندىقتان، جەڭىلدىكپەن الەۋمەتتىك باسپانا العىسى كەلەتىن، ۋاقىتىلى اقشا جيناپ جۇرگەن سالىمشىلار مۇددەسى قورعالادى.
دەپوزيتتەردى ساتۋدىڭ جاڭا قىزمەتى بارىنشا ايقىن، اشىق جانە انونيمدى بولادى. دەپوزيت ساتۋشى «ج س س ب 24» ينتەرنەت- بانكينگىندە ءوز شوتىن ساتىلىمعا شىعاراتىنى تۋرالى حابارلاندىرۋ جاساپ، باستاپقى باعانى كورسەتەدى. ول ساتىلاتىن شوتتاعى جيناقتاردىڭ جالپى سوماسىنىڭ %20 نان اسپاۋى ءتيىس. ماسەلەن، بانك كليەنتىنىڭ شوتىندا 1 ميلليون تەڭگە جينالسا، ول دەپوزيت ءۇشىن 200000 1 تەڭگەدەن اسپايتىن باستاپقى باعانى قويا الادى.
دەپوزيتتى ساتىپ الۋعا نيەت بىلدىرگەن ادام ساۋداعا قاتىسۋ ءۇشىن ونلاين- تولەمنىڭ كومەگىمەن 20000 تەڭگە كولەمىندەگى كەپىلدىك جارناسىن تولەيدى. بۇل ونىڭ شىن مانىندە شوت الۋعا نيەتتى ەكەنىن راستايدى. وسىدان كەيىن وزىنە ىڭعايلى حابارلاندىرۋدى تاڭداپ، دەپوزيتتى ساتىپ الا الاتىن باعانى كورسەتىپ، ءوتىنىش جىبەرەدى. باعانىڭ ءوسۋ قادامى 20000 تەڭگە. ساتىپ الۋشى ۇسىناتىن ەڭ جوعارى ۇستەمەاقى جيناق سوماسىنىڭ ەكى ەسە كولەمىنەن اسپاۋى ءتيىس.
ءوتىنىمدى قابىلداۋ مەرزىمى اياقتالعان سوڭ، جۇيە جەڭىمپازدى، ياعني ەڭ جوعارى باعا ۇسىنعان ادامدى انىقتايدى. ال باسقا قاتىسۋشىلارعا كەپىلدىك جارناسى اۆتوماتتى تۇردە قايتارىلادى.
وسىدان كەيىن دەپوزيتكە يەلىك ەتۋ قۇقىعىن اۋىستىرۋ ءراسىمى باستالادى. ساتۋشى قۇجاتتارعا قول قويىپ، دەپوزيت اقىسى اۋدارىلۋى ءتيىس شوت رەكۆيزيتتەرىن كورسەتەدى. ساتىپ الۋشى دا ءتيىستى قۇجاتتارعا قول قويىپ، سالىم اقىسىن تولەيدى. مۇنىڭ ءبارى ونلاين- رەجيمدە جۇرەدى.
بۇل كەزەڭدە ساتىپ الۋشى مامىلەدەن باس تارتامىن دەپ شەشسە، ونىڭ كەپىلدىك جارناسى قايتارىلمايدى، بۇل سوما ساتۋشىعا بەرىلەدى. ساتۋشى باس تارتقان جاعدايدا، دەپوزيتتى ساتىپ العىسى كەلگەن ادامعا كەپىلدىك جارناسى قايتارىلادى، ال ساتۋشى 1-اي بويى سالىمىن قايتا ساتىلىمعا شىعارا المايدى.. بۇل پروتسەسكە قاتىسۋشىلاردىڭ مامىلەگە بارىنشا بايىپپەن قاراپ، جاۋاپكەرشىلىكتى سەزىنۋى ءۇشىن جاسالىپ وتىر. دەپوزيتتى ءۇشىنشى تۇلعاعا ساتۋ - بانكتىڭ اقىلى قىزمەتى بولىپ سانالادى. كوميسسيا قۇنى جيناق سوماسىنىڭ %0,5 نا تەڭ. ول ساتىپ الۋشىدان الىنادى.
قازىرگى ۋاقىتتا ونلاين- تابىستاۋ سەرۆيسى ينتەرنەت- بانكينگتىڭ ۆەب- نۇسقاسىندا عانا قولجەتىمدى. قىزمەتتىڭ ءموبيلدى نۇسقاسى ازىرلەنىپ جاتىر.