ەۋرازيالىق ەكونوميكالىق وداق استانادا يران جانە قىتايمەن كەلىسىمگە قول قويادى - ۆلاديمير پۋتين

سوچي. قازاقپارات - ەۋرازيالىق ەكونوميكالىق وداق استانادا قىتاي جانە يران ەلدەرىمەن كەلىسىمگە قول قويماق. بۇل تۋرالى رەسەي پرەزيدەنتى ۆلاديمير پۋتين ءمالىم ەتتى، دەپ حابارلايدى قازاقپارات ءتىلشىسى.

«وسى اپتادا استانادا قىتايمەن ساۋدا-ەكونوميكالىق كەلىسىم تۋرالى جانە يرانمەن ەركىن ساۋدا اۋماعىن قۇرۋ تۋرالى ۋاقىتشا كەلىسىمگە قول قويۋ جوسپارلانىپ وتىر. سونىمەن بىرگە، يزرايل، سەربيا جانە سينگاپۋرمەن ارتىقشىلىقتى بەرە بىلەر كەلىسىمگە كەلۋ بويىنشا كەلىسسوزدەر جالعاسىپ جاتىر. جۋىق ارادا مىسىر ەلى جانە ۇندىستانمەن وسىعان ۇقساس كەلىسسوزدەر باستالادى»، - دەدى ۆلاديمير پۋتين جوعارى ەۋرازيالىق ەكونوميكالىق كەڭەستىڭ وتىرىسىندا سويلەگەن سوزىندە.

ەۋرازيالىق ەكونوميكالىق كوميسسيانىڭ (ە ە ك) ماكروەكونوميكا جانە ينتەگراتسيا بويىنشا القا (مينيستر) مۇشەسى تاتيانا ۆالوۆايا قازاقستاندىق تىلشىلەرگە بەرگەن سۇحباتىندا وسى كەلىسسوزدەرمەن قاتار، ە ە ك حالىقارالىق ىنتىماقتاستىقتاردىڭ كەڭ اۋقىمدى بلوكتارىمەن اينالىسىپ جاتقانىن ءتۇسىندىردى.

«قازاقستان 2016-جىلى ە ا ە و - دا ءتوراعالىق ەتكەندە قازاقستاندىق ءتوراعالىقتىڭ باسىم باعىتتارىنىڭ ءبىرى ءبىزدىڭ نەگىزگى ساۋدا-ەكونوميكالىق سەرىكتەستەرمەن قارىم-قاتىناستى دامىتۋ بولاتىن. بۇل مىندەت - ءبىر جىلدىڭ عانا جۇمىسى ەمەس. ءبىز ونى ءارى قاراي ىسكە اسىرۋدى جالعاستىرىپ كەلەمىز. بۇل رەتتە ەركىن ساۋدا اۋماعى جايلى عانا ەمەس، جالپى احۋال تۇرعىسىندا ايتىلىپ وتىر»، - دەپ ءتۇسىندىردى ول.

ونىڭ ايتۋىنشا، ەاەو ۇكىمەتتەرمەن، حالىقارالىق جانە ايماقتىق ۇيىمدارمەن 50 گە تارتا مەموراندۋمعا قول قويعان.

«وسى كەلىسىمدەر اياسىندا ءبىزدىڭ بايلانىستاردى العا تارتا كەلە، ءبىر مەزگىلدە بىرنەشە مىندەتتەردى اتقارىپ جاتىرمىز. ە ا ە و- داعى مەملەكەتتەرىمىزدىڭ جالپى بيزنەسى ءۇشىن الاڭ قۇرىلۋدا. ماسەلەن، لاتىن امەريكاسى. ايتارلىقتاي قاشىقتاعى جانە كۇردەلى بيزنەس دەسەك تە، ەگەر بايلانىستىڭ قوسىمشا مۇمكىندىكتەرىن رەتكە كەلتىرە بىلسەك، البەتتە قىزىقتى جوبالار پايدا بولادى»، - دەدى تاتيانا ۆالوۆايا.

سونىمەن بىرگە، تاتيانا ۆالوۆايا ءارتۇرىلى بيزنەس- فورۋمدار ۇيىمداستىرىلىپ جاتقانىن تىلگە تيەك ەتتى.

«وسى فورۋمدار اياسىندا ءبىز ە ا ە و- نىڭ مۇمكىندىكتەرى تۋرالى ايتۋعا مۇمكىندىك الامىز. ءبىزدىڭ شەتەلدەگى سەرىكتەستەرىمىزدە ەۋرازيالىق ەكونوميكالىق وداق تۋرالى جەتكىلىكتى مالىمەت جوق. ماسەلەن، ولارعا ىشكى شەكاراسىز ەكونوميكالىق وداقتىڭ بارى البەتتە قىزىقتى. تۇپتەپ كەلگەندە، ماسەلەن ولار قازاقستانمەن ينۆەستيتسيا نەمەسە ساۋدا تۇرعىسىندا قانداي دا ءبىر قارىم-قاتىناستى دامىتا وتىرىپ، ەۋرازيالىق ەكونوميكالىق وداققا كىرە الادى»، - دەدى ول.